ប៊ូគីដណុន៖ សហព័ន្ធអភិវឌ្ឍន៍កសិកម្មអំពៅប្រកបដោយចីរភាព នៅតំបន់កោះមីនដាណាវ (Mindanao Sustainable Sugarcane Agricultural Development Federation) របស់ប្រទេសហ្វីលីព បានព្រមានកសិករមិនឱ្យដាំដំណាំអំពៅ នៅក្រោយខែមិថុនា ឆ្នាំ២០២៦នេះ ដោយសារដំណាំដាំថ្មីៗ អាចរងការខូចខាតធ្ងន់ធ្ងរ ប្រសិនបើគ្រោះរាំងស្ងួត ដែលត្រូវបានព្យាករថា នឹងអូសបន្លាយពីប្រាំមួយ ទៅប្រាំពីរខែ ដោយសារបាតុភូតមហាអែលនីញ៉ូ (Super El Nino) កើតឡើងជាក់ស្តែង។
ប្រធានសហព័ន្ធអភិវឌ្ឍន៍កសិកម្មអំពៅប្រកបដោយចីរភាព នៅតំបន់កោះមីនដាណាវ បានព្រមានបែបនេះ បន្ទាប់ពីរដ្ឋបាលសេវាអាកាសធាតុ ភូគព្ភសាស្ត្រ និងតារាសាស្ត្រហ្វីលីពីន បានព្យាករថា បាតុភូតអែលនីញ៉ូទំនងជានឹងវិវឌ្ឍទៅដល់កម្រិតខ្លាំងបំផុតនៅប៉ុន្មានខែខាងមុខ និងអាចបន្តឥទ្ធិពលរហូតដល់ដើមឆ្នាំ២០២៧។
ក្នុងវេទិកាអាកាសធាតុលើកទី១៩៧ (197th Climate Forum) ដែលរៀបចំតាមប្រព័ន្ធអនឡាញ រដ្ឋបាលសេវាអាកាសធាតុ ភូគព្ភសាស្ត្រ និងតារាសាស្ត្រហ្វីលីពីន បានឱ្យដឹងថា មានលទ្ធភាពលើសពី ៦០ភាគរយ ដែលអែលនីញ៉ូនឹងកាន់តែខ្លាំង នៅចុងឆ្នាំ២០២៦ និងបន្តដល់ដើមឆ្នាំ២០២៧។
លោកស្រី អាណា លីហ្សា សូលីស (Ana Liza Solis) ប្រធានផ្នែកតាមដាន និងព្យាករណ៍អាកាសធាតុរបស់ហ្វីលីពីន បានបញ្ជាក់ថា មានលទ្ធភាព៦៩ភាគរយ ដែលអែលនីញ៉ូនឹងវិវឌ្ឍទៅជាកម្រិតខ្លាំង ក្នុងអំឡុងខែសីហា ដល់ខែតុលា ឆ្នាំ២០២៦ ហើយមានលទ្ធភាព៦២ភាគរយ ដែលស្ថានភាពនេះនឹងបន្តពីខែតុលា ឆ្នាំ២០២៦ រហូតដល់ខែមករា ឆ្នាំ២០២៧។
លោកស្រីបានបន្ថែមថា រយៈពេលអាកាសធាតុស្ងួតហួតហែង អាចចាប់ផ្តើមនៅដើមខែវិច្ឆិកា មុននឹងវិវឌ្ឍទៅជាគ្រោះរាំងស្ងួតអូសបន្លាយ នៅដើមឆ្នាំ២០២៧។
ទោះបីរដ្ឋបាលសេវាអាកាសធាតុ ភូគព្ភសាស្ត្រ និងតារាសាស្ត្រហ្វីលីពីន បានព្យាករថា ចំនួនព្យុះត្រូពិចដែលចូលប្រទេសហ្វីលីពីន អាចមានតិចជាងធម្មតាក៏ដោយ ប៉ុន្តែព្យុះដែលកើតឡើងអាចមានកម្លាំងខ្លាំងជាងមុន ដោយអាចឈានដល់កម្រិតព្យុះទីហ្វុងធំ។
ឆ្លើយតបទៅនឹងការព្រមាននេះ សហព័ន្ធអភិវឌ្ឍន៍កសិកម្មអំពៅប្រកបដោយចីរភាព នៅតំបន់កោះមីនដាណាវ បានអំពាវនាវឱ្យរដ្ឋាភិបាលហ្វីលីពីនបញ្ចេញថវិកាសង្គ្រោះបន្ទាន់ទៅកាន់ក្រសួងកសិកម្ម និងពន្លឿនការអនុវត្តវិធានការកាត់បន្ថយផលប៉ះពាល់ពីគ្រោះរាំងស្ងួត។
លោកបានថ្លែងថា «ប្រទេសហ្វីលីពីនមិនអាចរង់ចាំរហូតដល់គ្រោះរាំងស្ងួតកាន់តែធ្ងន់ធ្ងរចូលមកដល់ ទើបចាប់ផ្តើមចាត់វិធានការនោះទេ។ សន្តិសុខស្បៀងអាហារ គឺជាសន្តិសុខជាតិ»។
លោកក៏បានកត់សម្គាល់ថា ហ្វីលីពីននៅតែនាំចូលស្បៀងអាហារប្រមាណ៣០ ទៅ៣៥ភាគរយ នៃតម្រូវការក្នុងស្រុក។ ដូច្នេះ ប្រសិនបើប្រទេសជិតខាង ដែលកំពុងប្រឈមនឹងវិបត្តិអាកាសធាតុដូចគ្នា រឹតបន្តឹងការនាំចេញ នោះការផ្គត់ផ្គង់ស្បៀងអាហាររបស់ហ្វីលីពីនអាចរងផលប៉ះពាល់យ៉ាងធ្ងន់ធ្ងរ។
ជាមួយគ្នានេះ លោកបានណែនាំឱ្យកសិករផ្លាស់ប្តូរទៅដាំដំណាំ ដែលធន់នឹងគ្រោះរាំងស្ងួត ដូចជាសណ្តែក ដំឡូងមី និងដំណាំមើមផ្សេងៗ។ លោកក៏បានអំពាវនាវដល់អាជ្ញាធរមូលដ្ឋានឱ្យចែកចាយពូជដំណាំ ដែលធន់នឹងគ្រោះរាំងស្ងួត និងពន្លឿនការត្រៀមលក្ខណៈទប់ទល់នឹងរដូវប្រាំង ដែលត្រូវបានព្យាករថា នឹងមកដល់៕ (នៅ ស៊ីវុត្ថា)
