ដោយ រស្មី
ភ្នំពេញ៖ ការចិញ្ចឹមវារីវប្បកម្មសមុទ្រ បានកំពុងជួយរកចំណូលដល់ប្រជាសហគមន៍ត្រពាំងរពៅ ដោយបានដើរតួនាទីយ៉ាងសំខាន់ ក្នុងការលើកកម្ពស់ជីវភាពប្រជាសហគមន៍ និងផ្តល់ទាំងចំណូលផ្ទាល់ និងជួយអភិរក្សធនធានធម្មជាតិ។
សហគមន៍នេសាទត្រពាំងរពៅ ស្ថិតនៅភូមិត្រពាំងរពៅ សង្កាត់ព្រែកត្នោត ក្រុងបូកគោ ខេត្តកំពត។ សហគមន៍មួយនេះក្រៅពីរបរនេសាទ ពេលនេះពលរដ្ឋបានចាប់ផ្តើមពង្រីកការចិញ្ចឹមវារីវប្បកម្មជាច្រើនប្រភេទដូចជា ត្រីស្ពង់ ផ្ទក់សមុទ្រ ងាវ ក្តាមថ្ម ដើម្បីផ្គត់ផ្គង់លើទីផ្សារ។
អ្នកស្រី ឡោះ សាឌះ ប្រធានគណៈកម្មាធិការផ្សព្វផ្សាយរបស់សហគមន៍នេសាទ ត្រពាំងរពៅ បានប្រាប់ឱ្យដឹងថា បច្ចុប្បន្ននេះក្រៅពីនេសាទរបស់ប្រជាសហគមន៍ក្នុងការរកចំណូលចិញ្ចឹមជីវិត ពួកគាត់ចាប់ផ្តើមចិញ្ចឹមត្រីសមុទ្រផងដែរ។ របរនេះមានភាពកក់កបល្អ ដោយសារពេលចិញ្ចឹមបានផលមក មានឈ្មួញមកទិញទាំងអស់ ហើយពេលខ្លះមិនគ្រប់តម្រូវការថែមទៀត។ ក្នុងចំណោមសមាជិកសហគមន៍ជាង៤៤០នាក់ គឺស្ទើរទាំងអស់ បានប្រកបរបរនេសាទ និងចិញ្ចឹមត្រីសមុទ្រ។
ចំណែកអ្នកស្រី ឡោះ សាឌះ មានកសិដ្ឋានចិញ្ចឹមក្តាមថ្ម ពីរកន្លែងទំហំផ្ទៃដីបួនហិកតាកន្លះ ចិញ្ចឹមត្រីស្ពង់ ស្ពង់ជាង២ ០០០បែ ចិញ្ចឹមងាវប្រាំហិកតា។ ក្រៅពីនេះក៏មានចិញ្ចឹមត្រីតុកកែ និងត្រីខ្ទក់សមុទ្រ ដែលមានសមាជិកចិញ្ចឹមត្រឹមតែ១៨គ្រួសារទេ តែឈានចូលដល់ឆ្នាំ២០២៦នេះ បានកើនឡើងរហូតដល់២៧គ្រួសារ ហើយនឹងមានកំណើនបន្ថែមទៀត នៅដើមឆ្នាំក្រោយ។
អ្នកស្រីប្រធានគណៈកម្មាធិការផ្សព្វផ្សាយរបស់សហគមន៍នេសាទ ត្រពាំងរពៅ បានបញ្ជាក់ប្រាប់ដែរថា បច្ចុប្បន្នតម្រូវការត្រីសមុទ្រខ្ពស់ណាស់ ដែលក្នុងមួយសប្តាហ៍ គឺគេត្រូវការយ៉ាងហោចណាស់មួយតោនដែរ ប៉ុន្តែការផ្គត់ផ្គង់មិនបានគ្រប់តាមតម្រូវការឡើយ។ ចំណែគ្រឿងសមុទ្រ ដែលមានតម្រូវការខ្ពស់ជាងគេ មានចំនួនបីប្រភេទ គឺងាវ ត្រីតុកកែ និងត្រីផ្ទក់សមុទ្រ។ សម្រាប់តម្លៃវិញត្រីផ្ទក់សមុទ្រលក់បានមួយគីឡូក្រាម ៣ ៥០០០រៀល ត្រីតុកកែលក់ចេញក្នុងមួយគីឡូក្រាម៤០ ០០០ម៉ឺនរៀល។
អ្នកស្រីបានឱ្យដឹងថា ក្រៅពីនេះក៏មានប្រជាសហគមន៍នេសាទត្រីសម្រាប់លក់ស្រស់ និងត្រីងៀតសម្រាប់លក់លើទីផ្សារ ដែលក្នុងនេះមានលក់ក្នុងប្រទេស និងមួយចំនួនទៀតបាននាំចេញទៅក្រៅប្រទេសផង។ ជាងនេះទៅទៀត សហគមន៍អ្នកស្រីក៏មានប្រជាពលរដ្ឋកែច្នៃបង្គាសម្រាប់លក់តាមលក្ខណៈគ្រួសារក៏មានច្រើនដែរ ដោយក្នុងនេះ ពួកគាត់លក់ទាំងក្នុងសហគមន៍ និងមួយចំនួននាំទៅលក់នៅរាជធានីភ្នំពេញ។
លោក ស៊ង វ៉ាន់ អ្នកចិញ្ចឹមត្រីសមុទ្រ រស់នៅសហគមន៍នេសាទត្រពាំងរពៅ បានប្រាប់ឱ្យដឹងថា ការចិញ្ចឹមត្រីសមុទ្រនេះ ជារឿងមួយសំខាន់សម្រាប់ផ្គត់ផុ្គង់លើទីផ្សារ។ ទោះបីមានការចិញ្ចឹមច្រើន និងការនេសាទបែបធម្មជាតិ កង្វះត្រីសមុទ្រនៅកើតមានផងដែរ។
លោកស្រី រេបេកា ប៊ែល (Rebekah Bell) តំណាងអង្គការស្បៀងអាហារ និងកសិកម្ម (Food and Agriculture Organization)ប្រចាំកម្ពុជា បានឱ្យដឹងថា គម្រោង CamAdapt ក៏បានជួយគាំទ្រលើការងារស្តារព្រៃកោងកាង ជម្រកងាវសមុទ្រ ក៏ដូចជាសកម្មភាពអភិរក្សនានា ដែលដឹកនាំដោយសហគមន៍ និងការគ្រប់គ្រងធនធានជលផលប្រកបដោយចីរភាព។
កិច្ចខិតខំប្រឹងប្រែងទាំងនេះ បាននិងកំពុងជួយបង្កើនភាពរឹងមាំកាន់តែប្រសើរដល់ប្រព័ន្ធអេកូឡូស៊ីសមុទ្រ បង្កើនផលិតភាពជលផល និងជួយរក្សាបាននូវភាពធន់ដល់សហគមន៍តំបន់ឆ្នេរ។
គួរបញ្ជាក់ថា សហគមន៍នេសាទត្រពាំងរពៅ គឺជាតំបន់សក្តានុពលទាំងតំបន់ទេសចរណ៍ និងក៏ជាទីកន្លែងចិញ្ចឹមត្រីសមុទ្រ ហើយក៏ជាទីកន្លែងនេសាទបែបធម្មជាតិដ៏សក្តានុពលមួយ ក្នុងទឹកដីខេត្តកំពត៕
