ដោយ អៀវ ឈៀងនី
ភ្នំពេញ៖ សហគមន៍កសិកម្មកៅស៊ូគ្រួសារខេត្តប៉ៃលិននៅថ្ងៃទី២៩ ខែមិថុនា ឆ្នាំ២០២៦ បានប្រកាសដាក់ដេញថ្លៃជ័រកៅស៊ូ ពី១៥តោន ទៅ១៧តោន ដើម្បីការពារផលប្រយោជន៍របស់សហគមន៍ជាម្ចាស់ទំនិញ ក្នុងតម្លៃមួយដោយមិនមានការឃុបឃិតរបស់ឈ្មួញ។
លោក ផៃ សុផល មកពីសហគមន៍កសិកម្មកៅស៊ូគ្រួសារប៉ៃលិនបានឱ្យដឹងថា ការប្រកាសបិទការដេញថ្លៃ គឺនៅវេលាម៉ោង ៣រសៀល ថ្ងៃទី២៩ ខែមិថុនា ឆ្នាំ២០២៦ ដោយបានកំណត់លក់នៅថ្ងៃទី០២ ខែកក្កដា ឆ្នាំ២០២៦ តាមរយៈការដេញថ្លៃ។
សហគមន៍ខាងលើបានលើកឡើងថា មូលហេតុចម្បងនៃការប្រកាសដេញថ្លៃជាសាធារណៈនេះ គឺដើម្បីបង្កើនឱកាសឱ្យមានការប្រកួតប្រជែងតម្លៃដោយសេរី ធានាតម្លាភាព យុត្តិធម៌ និងមិនមានការលាក់លៀម។ ជាពិសេស ការពារផលប្រយោជន៍របស់សហគមន៍កសិករជាម្ចាស់ទំនិញ ជៀសវាងការត្រូវរ៉ូវគ្នាជាសម្ងាត់រវាងឈ្មួញ ឃុបឃិតគ្នាបញ្ចុះតម្លៃ ឬបង្ខំទិញក្នុងតម្លៃថោក ដែលធ្វើឱ្យអ្នកលក់ខាតបង់។
ការដាក់ដេញថ្លៃជាវិធីមួយ ដែលទទួលបានតម្លៃល្អបំផុត នៅពេលមានការប្រកួតប្រជែងជាចំហ ដូច្នេះឈ្មួញណាហ៊ានផ្តល់តម្លៃខ្ពស់ជាងគេ និងសមរម្យជាងគេនឹងទទួលបានឱកាសទិញ ដែលនេះជួយឱ្យសហគមន៍ទទួលបានផលចំណេញអតិបរមា។ សរុបមក ការដេញថ្លៃជាសាធារណៈ គឺជាឧបករណ៍មួយយ៉ាងសំខាន់ក្នុងការលុបបំបាត់ការកេងប្រវ័ញ្ច និងការផ្ដាច់មុខពីសំណាក់ឈ្មួញកណ្ដាល។
លោកស្រី ឆៃ លីនណែត ប្រធានក្រុមប្រឹក្សាភិបាលសហគមន៍កសិកម្មកៅស៊ូគ្រួសារប៉ៃលិនបានបញ្ជាក់ថា បច្ចុប្បន្ននេះ សហគមណ៍មានសមាជិកចំនួន១៩នាក់ ផ្ទៃដីដាំដុះចំនួន២០៤ ហិកតា ប្រាក់ភាគហ៊ុនចំនួនពីរលាន ប្រាំសែនរៀល។ សព្វថ្ងៃនេះសហគមន៍បានប្រមូលផ្តុំលក់ផលិផលជ័រកៅស៊ូរបស់សមាជិក គឺពីរលើកក្នុងមួយខែ ទិន្នផលអាស្រ័យទៅតាមខែជាក់ស្តែង។
ក្រោយពីការប្រមូលជ័រកៅស៊ូរបស់សមាជិកសហគមន៍រួច សហគមន៍ នឹងជូនដំណឹងដល់អាជីវករ ដែលមានបំណងចង់ដេញថ្លៃតាមរយៈលេខទូរស័ព្ទ និងតេលេក្រាមរបស់សហគមន៍ ចំពោះការលក់ គឺអាស្រ័យទៅតាមតម្លៃខ្ពស់ជាងគេ សហគមន៍នឹងធ្វើការផ្គត់ផ្គង់ជូន។
ចំពោះមូលដ្ឋាននៃការកំណត់តម្លៃ សហគមន៍យោងទៅលើទីផ្សារក្នុងស្រុកផង សួរនាំតម្លៃតាមរយៈសហគមន៍ ដែលមានទំនាក់ទំនងជាមួយគ្នា ដូចជាសហគមន៍នៅស្រុកមេមត់ ខេត្តត្បូងឃ្មុំ និងនៅក្នុងខេត្តមណ្ឌលគិរីជាដើម និងអន្តជាតិផង មានម៉ាឡេស៊ី និងសិង្ហបុរីជាដើម។
លោកស្រី បន្តទៀតថា តាមរយៈការដេញថ្លៃនេះ កសិករក្នុងសហគមន៍ទទួលបានតម្លៃខ្ពស់ជាងមុន បើប្រៀបធៀបជាមួយការលក់រៀងៗខ្លួន។ ជាពិសេសការទទួលបានប្រាក់ចំណូលបន្ថែមក្នុងសហគមន៍ផងដែរ។ លោកស្រីបន្ថែមថា សហគមន៍កសិកម្មកៅស៊ូគ្រួសារប៉ៃលិន បានដើរតួរសំខាន់ក្នុងការចរចាតម្លៃជាមួយដៃគូពាក់ព័ន្ធជាច្រើន ទាំងផ្នែកទីផ្សារ និងបច្ចេកទេស ដើម្បីធ្វើយ៉ាងណាឱ្យសមាជិកក្នុងសហគមន៍ អាចទទួលបានចំណេះដឹងលើការអនុវត្ត ដើម្បីទទួលបានតម្លៃបន្ថែមលើផលិផលរបស់ខ្លួន។
គួរបញ្ជាក់ថា គិតត្រឹមថ្ងៃទី៣០ ខែមិថុនា ឆ្នាំ២០២៦ សហគមន៍កសិកម្មកៅស៊ូគ្រួសារប៉ៃលិន បានប្រកាសដេញថ្លៃលក់ជ័រកៅស៊ូចំនួនបួនលើករួចមកហើយ ដោយលើកទី១ ប្រមូលលក់នៅថ្ងៃទី១៣ ខែឧសភា ឆ្នាំ២០២៦ មានកសិករចំនួនប្រាំមួយគ្រួសារ មានជ័រកៅស៊ូសរុបចំនួន៧ ៦៣០ឋកីឡូក្រាម លើកទី២ ប្រមូលលក់ថ្ងៃទី៣១ ខែឧសភា ឆ្នាំ២០២៦ មានកសិករចំនួន១០គ្រួសារ មានជ័រកៅស៊ូសរុបចំនួន១៣ ៤២៨ គីឡូក្រាមក្រាម លើកទី៣ ប្រមូលលក់ថ្ងៃទី១៦ ខែមិថុនា ឆ្នាំ២០២៦ កសិករចំនួន១៨គ្រួសារ មានជ័រកៅស៊ូសរុបចំនួន២០ ០៦២គីឡូក្រាម និងលើកទី៤ គ្រោងលក់ថ្ងៃទី២ ខែមិថុនា ឆ្នាំ២០២៦៕
