ភ្នំពេញ៖ នៅទីស្នាក់ការកណ្តាល ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម (ARDB) នាព្រឹកថ្ងៃទី១២ ខែឧសភា ឆ្នាំ២០២៦ បានដឹកនាំកិច្ចប្រជុំថ្នាក់ដឹកនាំធនាគារ ARDB ក្នុងគោលដៅត្រៀមខ្លួន, ក្នុងនាមជាធនាគារគោលនយោបាយ, ដើម្បីឆ្លើយតបទៅនឹងភាពមិនច្បាស់លាស់នៃស្ថានភាពហិរញ្ញវត្ថុនិងសេដ្ឋកិច្ចសកល និងការប្រែប្រួលយ៉ាងឆាប់រហ័សនៃស្ថានភាពភូមិសាស្រ្តនយោបាយក្នុងតំបន់ និងសកល។
នាកិច្ចប្រជុំដ៏មានសារៈសំខាន់នេះ និងក្នុងស្មារតីបុរេសកម្ម, ឯកឧត្តមបណ្ឌិត កៅ ថាច បានផ្តល់អនុសាសន៍ណែនាំដល់ថ្នាក់ដឹកនាំធនាគារ ARDB នូវខ្លឹមសារបង្កប់ដោយស្មារតីទទួលខុសត្រូវខ្ពស់ មួយចំនួនដូចខាងក្រោម ៖
១)- ក្នុងបរិបទនៃការវិវត្តនៃបច្ចេកវិទ្យាដ៏ឆាប់រហ័ស, ថ្នាក់ដឹកនាំនៃធនាគារ ARDB គួរចាប់យកឱសកាសនៃការប្រើប្រាស់បច្ចេកវិទ្យាថ្មីៗសម្រាប់ធ្វើអត្ថប្រយោជន៍នីយកម្ម គាំទ្រដល់ប្រតិបត្តិការធនាគារនិងការបម្រើសេវាអតិថិជន ពិសេសតាមរយៈការប្រើប្រាស់បញ្ញាសប្បនិម្មិត (Artificial Intelligence – AI) សំដៅសម្រេចបានគោលដៅជាធនាគារឌីជីថល។
២)- ក្នុងស្ថានភាពនៃភាពមិនច្បាស់លាស់នៃប្រព័ន្ធហិរញ្ញវត្ថុនិងសេដ្ឋកិច្ចសកល និងការប្រែប្រួលយ៉ាងឆាប់រហ័សនៃស្ថានភាពភូមិសាស្រ្តនយោបាយតំបន់ និងសកល, ថ្នាក់ដឹកនាំនៃធនាគារ ARDB នឹងបន្តពង្រឹង និងផ្តោតការយោគយល់ទុកដាក់បន្ថែមលើការកំណត់នូវកត្តាហានិភ័យនៃអាជីវកម្មនីមួយៗ ពិសេសអាជីវកម្មកសិកម្ម ដែលជាចំណុចសំខាន់សម្រាប់ការរៀបចំយន្តការគាំទ្របន្ថែម។
៣)-ថ្នាក់ដឹកនាំនៃធនាគារ ARDB នឹងបន្តការផ្តោតសំខាន់លើការជំរុញកញ្ចប់ហិរញ្ញប្បទានបៃតង ពិសេសក្រោមក្របខណ្ឌ Cambodia Climate Financing Facility (CCFF) ដែលទទួលបានការគាំទ្រពី Green Climate Fund (GCF) ក្នុងការឆ្លើយតបទៅនឹងការប្រែប្រួលអាកាសធាតុ។
៤)- ថ្នាក់ដឹកនាំនៃធនាគារ ARDB នឹងបន្តពង្រឹងការអនុវត្តហិរញ្ញប្បទានត្រីភាគី, ដែលជានវានុវត្តន៍នៃយន្តការផ្តល់ហិរញ្ញប្បទានថ្មី របស់ធនាគារ ARDB។
៥)- ថ្នាក់ដឹកនាំនៃធនាគារ ARDB នឹងបន្តជំរុញឱ្យការអភិវឌ្ឍមូលធនមនុស្ស (បុគ្គលិក) តាមរយៈការបង្កើតនិងចូលរួមវគ្គបណ្តុះបណ្តាល ជាប្រចាំ។
មុននឹងបញ្ចប់នៃកិច្ចប្រជុំនេះ, ឯកឧត្តមបណ្ឌិត កៅ ថាច ក៏បានរំលេចនូវភាពរឹងមាំនៃស្ថានភាពហិរញ្ញវត្ថុរបស់ធនាគារ ARDB ដែលជាធនាគារគោលនយោបាយ និងជាគ្រឹះស្ថានហិរញ្ញវត្ថុដ៏មានទំនុក និងសុវត្ថិភាពខ្ពស់ ពិសេសប្រាក់បញ្ញើអតិថិជន៕
