ហាណូយ៖ កូរ៉េនឹងអាចនាំចេញសាច់បក្សីឆ្អិនស្រាប់ទៅកាន់ប្រទេសវៀតណាម បន្ទាប់ពីមេដឹកនាំនៃប្រទេសទាំងពីរបានព្រមព្រៀងគ្នាក្នុងអំឡុងពេលកិច្ចប្រជុំកំពូល នៅទីក្រុងហាណូយ កាលពីថ្ងៃទី២២ ខែមេសា ឆ្នាំ២០២៦ ដែលជាផ្នែកមួយនៃកិច្ចខិតខំប្រឹងប្រែងពង្រីកពាណិជ្ជកម្មទ្វេភាគី។
កិច្ចព្រមព្រៀងរវាងប្រធានាធិបតីកូរ៉េខាងត្បូង លោក លី ជេម្យុង (Lee Jae Myung) និងលោក តូ ឡឹម (To Lam) អគ្គលេខាធិការបក្សកុម្មុយនីស្តវៀតណាម បានបង្ហាញថា ស៊ុបមាន់យិនស៊ិនបែបប្រពៃណីកូរ៉េ (សាមយេតាង-samgyetang) និងសាច់មាន់បំពងអាចដាក់លក់រួចរាល់នៅក្នុងប្រទេសវៀតណាម ស្របពេលវប្បធម៌ធ្វើម្ហូបកូរ៉េកំពុងពេញនិយមនៅទូទាំងពិភពលោក។
លោក លី ជេម្យុង បាននិយាយនៅក្នុងសេចក្តីថ្លែងការណ៍រួមមួយ ដោយលើកឡើងថា ប្រទេសទាំងពីរបានយល់ព្រមលើការនាំចេញទៅវិញទៅមកនៃផលិតផលបសុបក្សី ដែលត្រូវបានចម្អិនដោយកំដៅ។ កាលពីខែកញ្ញា ឆ្នាំ២០២៥ ប្រទេសកូរ៉េខាងត្បូងបានអនុញ្ញាតឱ្យនាំចូលផលិតផលបែបនេះពីប្រទេសវៀតណាម។
លោកប្រធានាធិបតីបានបន្ថែមថា “យើងនឹងពន្លឿនកិច្ចសហប្រតិបត្តិការដើម្បីពង្រីកពាណិជ្ជកម្មកសិកម្ម និងបសុសត្វ ដោយកិច្ចសហប្រតិបត្តិការបែបនេះនឹងផ្អែកលើអនុស្សរណៈនៃការយោគយល់គ្នា ស្តីពីសុខភាពសត្វ និងប្រតិបត្តិការដាក់ឱ្យនៅដាច់ដោយឡែក”។
លោកបានមានប្រសាសន៍ថា ការនាំចេញសាច់បក្សីចម្អិនដោយកំដៅនឹងរួមចំណែកដល់ការពង្រីកទំហំពាណិជ្ជកម្មទ្វេភាគី ឱ្យកើនទឹកប្រាក់ដល់១៥០ពាន់លានដុល្លារ នៅឆ្នាំ២០៣០ គឺកើនឡើងពី៩៤,៥ពាន់លានដុល្លារ នៅឆ្នាំ២០២៥។
កិច្ចប្រជុំកំពូលនេះ ត្រូវបានរៀបចំឡើងក្នុងអំឡុងពេលទស្សនកិច្ចផ្លូវរដ្ឋលើកដំបូងរបស់លោក លី ជេម្យុង ទៅកាន់ប្រទេសវៀតណាម។
លោកប្រធានាធិបតី បានរៀបរាប់ពីសមិទ្ធិផលចាប់តាំងពីការបង្កើតទំនាក់ទំនងទ្វេភាគីក្នុងឆ្នាំ១៩៩២ រួមទាំងវៀតណាមបានក្លាយជាដៃគូពាណិជ្ជកម្មធំជាងគេទី៣ របស់កូរ៉េ ហើយកូរ៉េ គឺជាវិនិយោគិនបរទេសធំជាងគេរបស់វៀតណាម បន្ទាប់ពីបានលើកកម្ពស់ភាពជាដៃគូយុទ្ធសាស្ត្រគ្រប់ជ្រុងជ្រោយ នៅក្នុងឆ្នាំ២០២២។
លោក លី ជេម្យុង បានចង្អុលបង្ហាញពីអាជីវកម្មកូរ៉េប្រហែល១០ ០០០ ដែលបច្ចុប្បន្នកំពុងធ្វើប្រតិបត្តិការនៅក្នុងប្រទេសវៀតណាម ក្រោមការយកចិត្តទុកដាក់ចំពោះភាពជាដៃគូសេដ្ឋកិច្ច។
លោកប្រធានាធិបតី ក៏បានលើកឡើងផងដែរថា ចំណងមិត្តភាពរាប់ទសវត្សរ៍នេះ ធ្វើឱ្យកូរ៉េក្លាយជាដៃគូដ៏ល្អ សម្រាប់ការសម្រេចចក្ខុវិស័យជាតិរបស់វៀតណាម ក្នុងការក្លាយជាប្រទេសអភិវឌ្ឍន៍ និងមានប្រាក់ចំណូលខ្ពស់នៅឆ្នាំ២០៤៥។
ក្នុងជំហានបន្ថែមទៀត ដើម្បីពន្លឿនកិច្ចសហប្រតិបត្តិការ លោកប្រធានាធិបតិបានកត់សម្គាល់ថា កិច្ចសន្យាសម្រាប់ការនាំចេញក្បាលរថភ្លើងរបស់កូរ៉េសម្រាប់ផ្លូវដែកទីក្រុងហូជីមិញផងដែរ។
លោកមានប្រសាសន៍ថា “ខ្ញុំសង្ឃឹមថា កិច្ចសន្យានេះនឹងរួមចំណែកក្នុងការកែលម្អហេដ្ឋារចនាសម្ព័ន្ធផ្លូវដែករបស់វៀតណាម និងនាំទៅរកការពង្រីកកិច្ចសហប្រតិបត្តិការនៅក្នុងគម្រោងហេដ្ឋារចនាសម្ព័ន្ធដឹកជញ្ជូន និងភស្តុភារកម្មធំៗ”។
ចំណែកលោក តូ ឡឹម អគ្គលេខាធិការបក្សកុម្មុយនីស្តវៀតណាម បានមានប្រសាសន៍ថា ប្រទេសវៀតណាមនឹងបង្កើត “បរិយាកាសវិនិយោគបើកចំហ និងប្រកបដោយតម្លាភាព” និងផ្តល់នូវភាពងាយស្រួលដល់វិនិយោគិនបរទេស រួមទាំងក្រុមហ៊ុនកូរ៉េ អាចវិនិយោគនៅក្នុងប្រទេសវៀតណាម “ប្រកបដោយស្ថិរភាព និងនិរន្តរភាព”។
មេដឹកនាំទាំងពីរបានលើកឡើងពីការផ្លាស់ប្តូររវាងប្រជាជន និងប្រជាជន ដោយកត់សម្គាល់ថា វៀតណាមគឺជាប្រទេសដែលមានប្រជាជនកូរ៉េច្រើនជាងគេទីពីរ ដោយទទួលបានភ្ញៀវកូរ៉េប្រហែល៤,៥លាននាក់ជារៀងរាល់ឆ្នាំ។
វៀតណាមក៏ជាប្រទេសកំពូលសម្រាប់ការរៀបអាពាហ៍ពិពាហ៍អន្តរជាតិ ដែលពាក់ព័ន្ធនឹងបុរសជនជាតិកូរ៉េផងដែរ ខណៈគ្រួសារពហុវប្បធម៌ប្រហែល១០០ ០០០គ្រួសារ កំពុងរស់នៅក្នុងប្រទេសកូរ៉េ រួមមានសមាជិកគ្រួសារកើតនៅវៀតណាមផងដែរ។
មេដឹកនាំទាំងពីរក៏បានឯកភាពគ្នាលើកិច្ចសហប្រតិបត្តិការជិតស្និទ្ធ ដើម្បីធានាការស្នាក់នៅប្រកបដោយស្ថិរភាព និងលើកកម្ពស់សិទ្ធិ និងផលប្រយោជន៍របស់ប្រជាពលរដ្ឋនៃប្រទេសទាំងពីរ។
ក្នុងឱកាសនៃកិច្ចប្រជុំកំពូលនេះ ប្រទេសទាំងពីរបានចុះហត្ថលេខាលើអនុស្សរណៈយោគយល់ចំនួន១២ រួមទាំងកិច្ចសហប្រតិបត្តិការលើសុវត្ថិភាពចំណីអាហារ ឱសថ គ្រឿងសម្អាង និងឧបករណ៍វេជ្ជសាស្ត្រផងដែរ៕
