តៃប៉ិ៖ ទីភ្នាក់ងារត្រួតពិនិត្យសុខភាពសត្វ និងរុក្ខជាតិ កោះតៃវ៉ាន់ បានឲ្យដឹងថា ស្តង់ដារចត្តាឡីស័កសម្រាប់ដំឡូងបារាំងនាំចូល ដែលត្រូវបានប្រើប្រាស់សម្រាប់ការកែច្នៃ គឺដូចគ្នានឹងការគ្រប់គ្រងដំឡូងបារាំងក្នុងស្រុកដែរ ហើយប្រសិនបើរកឃើញដំឡូងណាមានសញ្ញាដុះពន្លក រលួយ ឬដុះផ្សិត ត្រូវតែបោះចោល និងបំផ្លាញចោលទាំងស្រុង។
របាយការណ៍ប៉ាន់ប្រមាណផ្នែកពាណិជ្ជកម្មជាតិឆ្នាំ២០២៦ របស់អ្នកតំណាងពាណិជ្ជកម្មអាម៉េរិក ដែលបានចេញផ្សាយនៅថ្ងៃទី៣១ ខែមីនា បាននិយាយអំពីបទប្បញ្ញត្តិនាំចូលដំឡូងរបស់តៃវ៉ាន់។
យោងតាមរបាយការណ៍នេះ ចាប់តាំងពីឆ្នាំ២០១៨រហូតមក កោះតៃវ៉ាន់បានច្រានចោលការដឹកជញ្ជូនទាំងអស់ ដែលមានដំឡូងបារាំងដុះពន្លក។ ច្បាប់វិសោធនកម្មថ្មីបានអនុម័តក្នុងខែកុម្ភៈ ឆ្នាំ២០២៦ អនុញ្ញាតឱ្យការដឹកជញ្ជូន ដែលមានដំឡូងបារាំងដុះពន្លក ឬដុះផ្សិត អាចនាំចូលបាន លុះត្រាតែដំឡូងរងផលប៉ះពាល់ត្រូវបានបែងចែក និងបោះចោលនៅកន្លែងកែច្នៃ។
គោលនយោបាយថ្មីនេះ ត្រូវបានគេរាយការណ៍ថា បានបង្កឱ្យមានការព្រួយបារម្ភពីសមាជិកសភា និងមន្ត្រីរដ្ឋាភិបាលតៃវ៉ាន់ ដោយភ័យខ្លាចថា ដំឡូងបារាំងដុះពន្លូត ដែលមានផ្ទុកសារធាតុពុល គ្លីកូលកាឡយ (Glycoalkaloids) រួមទាំងសារធាតុសូឡានីន (Solanine) អាចត្រូវបានកែច្នៃទៅជាផលិតផលម្ហូបអាហារ ហើយបង្កឱ្យអ្នកបរិភោគពុលបាន។
ទីភ្នាក់ងារត្រួតពិនិត្យសុខភាពសត្វ និងរុក្ខជាតិ កោះតៃវ៉ាន់ បាននិយាយថា បន្ថែមពីលើការហាមឃាត់នាំចូលដំឡូងបារាំងមានសត្វល្អិត និងជំងឺណាមួយ ក្នុងចំណោមទំនិញប្រាំបីប្រភេទ ពិធីសារថ្មីតម្រូវឱ្យអ្នកនាំចេញអាម៉េរិក ត្រូវពង្រឹងកម្មវិធីទប់ស្កាត់ពន្លក ដើម្បីធានាថា ដំឡូងនាំចូលមិនមានដុះពន្លក និងមិនមានដីឡើយ។
ភ្នាក់ងារដដែលនេះ បាននិយាយទៀតថា ពាក់ព័ន្ធនឹងសុវត្ថិភាពចំណីអាហារ ដំឡូងបារាំងដែលបាននាំចូលត្រូវតែមានសារធាតុសូឡានីន ស្របតាមស្តង់ដារដូចគ្នាសម្រាប់ដំឡូងផលិតក្នុងស្រុក។
ទីភ្នាក់ងារត្រួតពិនិត្យសុខភាពសត្វ និងរុក្ខជាតិ បានបញ្ជាក់ថា ប្រសិនបើការកែច្នៃដំឡូងបារាំង ដែលនាំចូលពីសហរដ្ឋអាម៉េរិក បង្ហាញសញ្ញានៃការដុះពន្លក រលួយ ឬដុះផ្សិត រដ្ឋបាលចំណីអាហារ និងឱសថ នឹងត្រូវបានជូនដំណឹង ហើយការដឹកជញ្ជូនទាំងនេះនឹងត្រូវបានបញ្ជូនទៅកាន់រោងចក្រកែច្នៃដោយផ្ទាល់ ស្របតាមនីតិវិធីស្តង់ដារប្រតិបត្តិ។ នៅពេលដឹកទៅដល់រោងចក្រកែច្នៃហើយ ដំឡូងណាមានពន្លក រលួយ ឬដុះផ្សិត ត្រូវតែបោះចោល និងបំផ្លាញចោល។
ទីភ្នាក់ងារនេះ បាននិយាយទៀតថា តាមរយៈយន្តការត្រួតពិនិត្យពីរដង ការត្រួតនៅពិនិត្យព្រំដែន និងការជ្រើសរើសនៅរោងចក្រកែច្នៃ ទីភ្នាក់ងារត្រួតពិនិត្យសុខភាពសត្វ និងរុក្ខជាតិ នឹងការពារសុវត្ថិភាពបរិស្ថានកសិកម្ម និងសន្តិសុខស្បៀងសាធារណៈរបស់តៃវ៉ាន់។
កន្លងមក ដំឡូងបារាំងនាំចូលពីសហរដ្ឋអាម៉េរិក មិនថាដំឡូងស្រស់ ឬដំឡូងកែច្នៃនោះទេ គឺស្ថិតក្រោមលក្ខខណ្ឌតម្រូវឱ្យធ្វើចត្តាឡីស័កសម្រាប់ការនាំចូលដំឡូងបារាំងសម្រាប់បរិភោគ។ ក្រោយពីការពិគ្រោះយោបល់ជាមួយសហរដ្ឋអាម៉េរិក ដោយផ្អែកលើគោលការណ៍វិទ្យាសាស្ត្រ កោះតៃវ៉ាន់បានយល់ព្រមទទួលយកពិធីសារធ្វើចត្តាឡីស័កថ្មីសម្រាប់ការនាំចួលដំឡូងកែច្នៃ ដោយយកគំរូតាមស្តង់ដាររបស់ជប៉ុន។
ទីភ្នាក់ងារត្រួតពិនិត្យសុខភាពសត្វ និងរុក្ខជាតិ បាននិយាយថា ដំឡូងកែច្នៃរបស់សហរដ្ឋអាម៉េរិក ដែលនាំចូលត្រូវតែគ្មានសត្វល្អិត និងគ្មានដី ហើយត្រូវតែជ្រលក់ថ្នាំកុំឱ្យដុះពន្លក ដោយអនុលោមតាមស្តង់ដារសុវត្ថិភាពចំណីអាហារទាក់ទងនឹងកម្រិតសារធាតុសូឡានីន និងសំណល់ថ្នាំសម្លាប់សត្វល្អិត។ ទោះបីជាឆ្លងកាត់ការត្រួតពិនិត្យនៅតាមព្រំដែនក៏ដោយ ដំឡូងណាមួយដែលរកឃើញមានពន្លកត្រូវតែដកចេញ និងបំផ្លាញចោល។
របាយការណ៍បាននិយាយថា ដំឡូងបារាំងរាប់ម៉ឺនតោនត្រូវបាននាំចូលក្នុងមួយឆ្នាំៗ ហើយបានចោទជាសំណួរថា តើកោះតៃវ៉ាន់មានបុគ្គលិកគ្រប់គ្រាន់សម្រាប់ត្រួតពិនិត្យដំឡូងបារាំងមួយមើមៗ និងមានសមត្ថភាពធ្វើតេស្តនៅមន្ទីរពិសោធន៍ដែរឬទេ៕
