អឺរ៉ុប៖ ក្រុមទំនាក់ទំនងផ្នែកខ្ទឹមសអឺរ៉ុប បានដាក់ចេញនូវក្នុងឯកសារមួយផ្ញើទៅកាន់សមាជិកសភាអឺរ៉ុប ដោយទាមទារឱ្យមានវិធានការការពារកាន់តែខ្លាំងប្រឆាំងនឹងការនាំចូលដ៏ច្រើនខ្ទឹមសពីប្រទេសអេហ្ស៊ីប និងចិន ដែលជាគ្រឿងផ្សំ និងការការពារប្រឆាំងនឹងការកើនឡើងនៃថ្លៃដើម ដូចជាថាមពល និងកម្លាំងពលកម្ម។
ក្រុមទំនាក់ទំនងផ្នែកខ្ទឹមសអឺរ៉ុប (European Garlic Contact Group) គឺជាសម្ព័ន្ធភាពក្រុមជំនាញវិជ្ជាជីវៈ ដែលមានសមាសភាពមកពីអ្នកដាំ និងអ្នកធ្វើទីផ្សារខ្ទឹមសមកពីប្រទេសអេស្ប៉ាញ បារាំង និងអ៊ីតាលី។ ក្រុមនេះត្រូវបានបង្កើតឡើងក្នុងគោលបំណងចម្បង ដើម្បីការពារផលប្រយោជន៍របស់វិស័យខ្ទឹមសអឺរ៉ុបទប់ទល់នឹងសម្ពាធទីផ្សារខាងក្រៅ និងធានាបាននូវការរស់រានមានជីវិតនៃផលិតកម្មខ្ទឹមសក្នុងស្រុក។
ឯកសារនេះបានសរសេរថា ខណៈពេលវិបត្តិផ្ទៃក្នុង គឺជាការគំរាមកំហែងដល់ការរស់រានមានជីវិតនៃខ្ទឹមស ស្ថានភាពកាន់តែធ្ងន់ធ្ងរឡើងដោយការនាំចូលពីខ្ទឹមសពីប្រទេសអេហ្ស៊ីប និងចិន ដែលលក្ខខណ្ឌនៃការផលិត និងការចូលទៅកាន់ទីផ្សារអឺរ៉ុប គឺអយុត្តិធម៌ណាស់។
ឯកសារដដែលបានលើកឡើងទៀតថា ការនាំចូលខ្ទឹមសរបស់ចិន គឺចាំបាច់ត្រូវតែជាប់កាតព្វកិច្ចពន្ធកម្រិត១ ២០០អឺរ៉ូ ក្នុងមួយតោន ប៉ុន្តែការបង់ពន្ធនេះមិនដែលអនុវត្តឱ្យបានត្រឹមត្រូវទេ ហើយបច្ចុប្បន្នបានបាត់បង់អំណាចការពារខ្លួន។
លើសពីនេះ កាតព្វកិច្ចនេះត្រូវបានគេចវេះជាប្រព័ន្ធតាមរយៈការអនុវត្តត្រីកោណ ការប្រកាសប្រភពដើមកំណើតមិនពិត ការបំបែកច្រកដឹកជញ្ជូន និងបង់ពន្ធទាបជាងតម្លៃលើវិក្កយបត្រ។
យោងតាមក្រុមទំនាក់ទំនងផ្នែកខ្ទឹមសនេះ បានរៀបរាប់ថា ការគំរាមកំហែងមួយទៀតចំពោះផលិតផលអឺរ៉ុប គឺខ្ទឹមសអេហ្ស៊ីប ដែលក្នុងរយៈពេលពីរឆ្នាំកន្លងមកនេះ ការនាំចូលខ្ទឹមសពីអេហ្ស៊ីបបានកើនឡើងយ៉ាងខ្លាំង។
ក្រុមនេះបានទទូចថា ប្រទេសអេហ្ស៊ីបទទួលបានអត្ថប្រយោជន៍ពីការចំណាយលើថាមពលទាប ចំណែកច្បាប់ការងារធូររលុងជាង បើប្រៀបធៀបទៅនឹងស្តង់ដារអឺរ៉ុប ស្តីពីសុខុមាលភាពកម្មករ ការប្រើប្រាស់ថ្នាំសម្លាប់សត្វល្អិត ដែលត្រូវបានហាមឃាត់ក្នុងសហភាពអឺរ៉ុប និងកិច្ចព្រមព្រៀងអនុគ្រោះ ដែលនៅក្នុងការអនុវត្តជាក់ស្តែងបែរជាជួយសម្រួលដល់ការនាំចូលទៅកាន់ទីផ្សារអឺរ៉ុប ដោយគ្មានការប្រកួតប្រជែងជាមួយអ្នកផលិតអឺរ៉ុប។
ក្នុងន័យទាំងអស់នេះ ក្រុមទំនាក់ទំនងបានអំពាវនាវឱ្យមានការទប់ស្កាត់ខ្ទឹមសអេហ្ស៊ីប និងការធ្វើបច្ចុប្បន្នភាពបន្ទាន់នៃពន្ធលើខ្ទឹមសចិន ដោយមានការធានាពីភាពត្រឹមត្រូវនៃស្តង់ដារផលិតកម្ម ការត្រួតពិនិត្យតាមព្រំដែនជាប្រព័ន្ធ និងការស្នើសុំវិញ្ញាបនបត្រនៃការអនុលោមតាមស្តង់ដារអឺរ៉ុប។ លើសពីនេះទៀត ចាំបាច់ត្រូវពិនិត្យឡើងវិញនៃគោលនយោបាយអឺរ៉ុបនិយាយពីសារធាតុថ្នាំពុលទាំងអស់៕
