សេអ៊ូល៖ ទោះបីជាមានសង្គ្រាមរវាងសហរដ្ឋអាមេរិក និងអ៊ីស្រាអែលជាមួយអ៊ីរ៉ង់ក៏ដោយ ក៏ការនាំចេញស្បៀងអាហាររបស់ប្រទេសកូរ៉េខាងត្បូងទៅកាន់តំបន់មជ្ឈិមបូព៌ា បានកើនឡើងជាង៣០ភាគរយ នៅក្នុងត្រីមាសទី១ បើធៀបនឹងរយៈពេលដូចគ្នា កាលពីឆ្នាំ២០២៥ ខណៈការនាំចេញទៅកាន់ពិភពលោក ក៏បានកើនឡើង៤ភាគរយផងដែរ ដែលនាំមុខដោយនំស្រួយ និងអាហារសម្រន់។
យោងតាមក្រសួងកសិកម្ម ស្បៀងអាហារ និងកិច្ចការជនបទ របស់កូរ៉េខាងត្បូង បានឱ្យដឹងកាលពីថ្ងៃទី៣ ខែមេសា ឆ្នាំ២០២៦នេះថា ការនាំចេញសរុបសម្រាប់ស្បៀងអាហារកូរ៉េខាងត្បូង នៅក្នុងត្រីមាសទី១ ដោយគិតពីចន្លោះខែមករា ដល់ខែមីនា បានកត់ត្រាជាទឹកប្រាក់ចំនួន២,៥៦ពាន់លានដុល្លារ កើនឡើងបួនភាគរយ ធៀបនឹងឆ្នាំមុន។ តាមតំបន់ ការកើនឡើងនៃការនាំចេញធំជាងគេ ត្រូវបានកត់ត្រានៅមជ្ឈិមបូព៌ា កើនឡើង៣២,៣ភាគរយ បន្ទាប់មកប្រទេសចិន១៤,៥ភាគរយ និងអាម៉េរិកខាងជើង៦,៣ភាគរយ។
ទោះបីជាមានភាពមិនច្បាស់លាស់ផ្នែកដឹកជញ្ជូននៅមជ្ឈិមបូព៌ា ចាប់តាំងពីខែមីនា បន្ទាប់ពីការវាយប្រហាររួមគ្នារវាងសហរដ្ឋអាមេរិក និងអ៊ីស្រាអែលលើប្រទេសអ៊ីរ៉ង់ក្នុងខែកុម្ភៈក៏ដោយ ក៏ការនាំចេញទៅកាន់តំបន់នេះនៅតែរឹងមាំដដែល។ ខណៈពេលការប្រើប្រាស់នៅក្នុងតំបន់រងផលប៉ះពាល់ដោយសង្គ្រាមត្រូវបានគេរាយការណ៍ថា បានចុះខ្សោយ ដំណើរការជារួមបានប្រសើរឡើងដោយសារការដឹកជញ្ជូនផលិតផលថ្នាំជក់ និងយិនស៊ិនដ៏ធំរហូតដល់ខែកុម្ភៈ។ ការនាំចេញទៅកាន់មជ្ឈិមបូព៌ា ក្នុងត្រីមាសទីមួយ មានទឹកប្រាក់ចំនួន១០៦,៩លានដុល្លារ។
មី រ៉ាមែន (Ramen) របស់កូរ៉េខាងត្បូងបាននាំចេញច្រើនមុនគេ។ ការនាំចេញមីរ៉េមែន នៅត្រីមាសទីមួយ បានកើនឡើង២៦,៤ភាគរយ ធៀបនឹងរយៈពេលដូចគ្នា កាលពីឆ្នាំ២០២៥ កើនទឹកប្រាក់ដល់៤៣៤,៥លានដុល្លារ។ ក្នុងចំណោមអាហារកែច្នៃ ការនាំចេញអាហារសម្រន់ បានកើនឡើង១១,៤ភាគរយ គិតជាទឹកប្រាក់ដល់១៩៣,៩លានដុល្លារ ខណៈភេសជ្ជៈបានកើនឡើង៤,៥ភាគរយ គិតជាទឹកប្រាក់ដល់១៦៣,៧លានដុល្លារ។
ចំណែកការនាំចេញផលិតផលអង្ករកែច្នៃ បានកើនឡើង៩,៤ភាគរយ ដល់ទឹកប្រាក់៦៩,៣លានដុល្លារ ខណៈពេលការនាំចេញការ៉េម បានកើនឡើង១៨ភាគរយ ដល់ទឹកប្រាក់៣១,២លានដុល្លារ។ អាហារសម្រន់ និងភេសជ្ជៈ ជាពិសេសត្រូវបានគេជឿថា ទទួលបានការពេញនិយមយ៉ាងខ្លាំងនៅក្នុងប្រទេសចិន។
ផលិតផលផ្លែឈើស្រស់ៗ ក៏មានតម្រូវការកើនឡើងផងដែរ។ ការនាំចេញផ្លែស្ត្រប៊ឺរី បានកើនឡើង១៤,៧ភាគរយ ដល់ទឹកប្រាក់ចំនួន៤៦លានដុល្លារ ដែលគាំទ្រដោយតម្រូវការខ្លាំងពីប្រទេសសិង្ហបុរី។ ការនាំចេញផ្លែទំពាំងបាយជូរស្រស់ មានតម្លៃសរុប១៧,៣លានដុល្លារ បានកើនឡើង២៤,៦ភាគរយ បន្ទាប់ពីរក្សាការប្រកួតប្រជែងតម្លៃនៅតៃវ៉ាន់ ដែលជាទីផ្សារធំបំផុតរបស់កូរ៉េ។ ការនាំចេញផ្លែស្ត្រប៊ឺរី បានកើនឡើង៦៩,២ភាគរយ ដល់ទឹកប្រាក់៧,៣លានដុល្លារ ដែលគាំទ្រដោយតម្រូវការដ៏រឹងមាំនៅក្នុងទីផ្សារសហរដ្ឋអាម៉េរិក។
រដ្ឋាភិបាលកូរ៉េខាងត្បូងគ្រោងនឹងបង្កើនការគាំទ្រដល់អ្នកនាំចេញ ក្នុងករណីសង្គ្រាមនៅមជ្ឈិមបូព៌ាបន្តអូសបន្លាយ។ លោក គីម ជុងវុក (Kim Jung-wook) អគ្គនាយកគោលនយោបាយនវានុវត្តន៍កសិពាណិជ្ជកម្ម នៃក្រសួងកសិកម្ម ចំណីអាហារ និងកិច្ចការជនបទ បានមានប្រសាសន៍ថា ក្រសួងនឹងជួយពង្រឹងសមត្ថភាពឆ្លើយតបហានិភ័យរបស់ក្រុមហ៊ុន ដោយផ្តល់ព័ត៌មានអំពីការដឹកជញ្ជូនទាន់ពេលវេលា និងគាំទ្រការផ្សព្វផ្សាយតាមអនឡាញ និងក្រៅបណ្តាញ៕
