ហាណូយ៖ ការនាំចេញផ្លែផាសិន និងផ្លែស្រកានាគរបស់ប្រទេសវៀតណាម ទៅកាន់ទីផ្សារក្នុងសហភាពអឺរ៉ុប កំពុងស្ថិតក្រោមការពិនិត្យឡើងវិញ បន្ទាប់ពីរកឃើញសំណល់ថ្នាំពុលច្រើនលើសកម្រិតខ្លាំងពេក «Maximum Residue Limit) នៅក្នុងផ្លែឈើទាំងពីរប្រភេទនេះ។
យោងតាមរបាយការណ៍ចេញផ្សាយនៅក្នុងខែកុម្ភៈ ឆ្នាំ២០២៦ របស់អគ្គនាយកដ្ឋានម្ហូបអាហារបារាំង ដោយផ្អែកលើការត្រួតពិនិត្យក្នុងឆ្នាំ២០២៤ បានបង្ហាញថា ផ្លែផាសិនវៀតណាមមានអត្រាបំពាន ៣២ភាគរយលើស្តង់ដារ របស់សហភាពអឺរ៉ុប (European Union Maximum Residue Limits)។ ក្នុងចំណោមសំណាកគំរូចំនួន៤៧ ដែលបានធ្វើតេស្ត មាន១៥គំរូ មានផ្ទុកសារជាតិពុលលើសពីដែនកំណត់។
ចំណែកគំរូខ្លះក៏មានថ្នាំសម្លាប់សត្វល្អិត ឈ្មោះ អូមេតូអេត (Omethoate) ដែលត្រូវបានចាត់ទុកថា អាចបង្កគ្រោះថ្នាក់ដល់អ្នកប្រើប្រាស់។
ចំពោះផ្លែស្រកានាគវៀតណាមវិញ មានអត្រាបំពានទាបជាង១១ភាគរយ និងមានមួយសំណាកគំរូក្នុងចំណោមប្រាំបួនគំរូ រកឃើញសារធាតុថ្នាំពុលលើសពីដែនកំណត់របស់សហភាពអឺរ៉ុប។ ផលិតផលនេះ បានចុះបញ្ជីក្នុងឧបសម្ព័ន្ធទី១ នៃបទប្បញ្ញត្តិរបស់សភាពអឺរ៉ុបលេខ ២០១៩/១៧៩៣ ដែលកំណត់អត្រាត្រួតពិនិត្យ៥០ភាគរយ នៅតាមច្រកព្រំដែនសហភាពអឺរ៉ុប។
របាយការណ៍របស់កម្មវិធីត្រួតពិនិត្យ ដែលមានការសម្របសម្រួលដោយសហភាពអឺរ៉ុប, លទ្ធផលត្រូវបានប្រើដើម្បីវាយតម្លៃហានិភ័យ និងកំណត់វិធានការគ្រប់គ្រង ដោយគណៈកម្មាការសហភាពអឺរ៉ុប(European Commission)។ តាមនីតិវិធីរបស់សហភាពអឺរ៉ុប, បញ្ជីផលិតផល ដែលមានហានិភ័យខ្ពស់ ត្រូវបានពិនិត្យឡើងវិញនៅរៀងរាល់ប្រាំមួយខែម្តង។
ដោយមានអត្រាបំពាន៣២ភាគរយ, ផ្លែផាសិនរបស់វៀតណាមប្រឈមនឹងហានិភ័យខ្ពស់ ត្រូវដាក់បញ្ចូលទៅក្នុងបញ្ជីផលិតផល ដែលត្រូវការការត្រួតពិនិត្យកាន់តែតឹងរ៉ឹង ឬមានលក្ខខណ្ឌនាំចូលតឹងរ៉ឹង។ ការបញ្ចូលក្នុងឧបសម្ព័ន្ធទី១ នឹងបង្កើនការត្រួតពិនិត្យតាមព្រំដែន ខណៈឧបសម្ព័ន្ធទី២ តម្រូវឱ្យអ្នកនាំចូលផ្តល់លទ្ធផលធ្វើតេស្ត និងបង្ហាញវិញ្ញាបនបត្របញ្ជាក់ពីសុវត្ថិភាពម្ហូបអាហារមុនដឹកជញ្ជូន។
វិធានការទាំងនេះអាចបង្កើនថ្លៃដើម, ការធ្វើតេស្ត និងការស្តុកទុក ហើយអាចនាំឱ្យមានការពន្យារពេលក្នុងនីតិវិធីត្រួតពិនិត្យរបស់គយ (Customs Clearance)។ អ្នកនាំចេញក៏អាចប្រឈមនឹងការខូចឈ្មោះ ប្រសិនបើបញ្ហាខ្វះអនុលោមភាពនៅតែបន្តកើតមាន។
ការិយាល័យពាណិជ្ជកម្មវៀតណាម ប្រចាំប្រទេសបារាំង (The Vietnamese Trade Office in France) បានបញ្ជាក់ថា បញ្ហានេះបង្ហាញពីតម្រូវការបច្ចេកទេសទូទាំងសហភាពអឺរ៉ុប។ ដើម្បីរក្សាទីផ្សារនាំចូលឱ្យនៅតែមានដំណើរការ, អ្នកនាំចេញ សហគមន៍ និងអ្នកផលិត ត្រូវពិនិត្យ និងកែលម្អដំណើរការផលិតកម្ម រួមទាំងការដាំដុះ, ប្រមូលផល, កែច្នៃ និងការវេចខ្ចប់។ ការអនុលោមតាមស្តង់ដារ សំណល់ថ្នាំពុលច្រើនលើសកម្រិតខ្លាំងពេក របស់សហភាពអឺរ៉ុប និងការត្រួតពិនិត្យការប្រើប្រាស់ថ្នាំសម្លាប់សត្វល្អិតយ៉ាងតឹងរ៉ឹង គឺមានតម្រូវការជាចាំបាច់បំផុត។
អាជ្ញាធរ និងសមាគមឧស្សាហកម្មរបស់វៀតណាម ត្រូវបានរំពឹងថានឹងពង្រឹងប្រព័ន្ធត្រួតពិនិត្យ, ផ្តល់ការគាំទ្រផ្នែកបច្ចេកទេស និងចេញការព្រមានទុកជាមុន ជាពិសេសមុនការពិនិត្យឡើងវិញបន្ថែមរបស់សហភាពអឺរ៉ុប ដែលគ្រោងនឹងអនុវត្តនៅពាក់កណ្តាលឆ្នាំ២០២៦ខាងមុខ។
ក្នុងឆ្នាំ២០២៥ ការនាំចេញផ្លែឈើ និងបន្លែរបស់វៀតណាម មានតម្លៃជាទឹកប្រាក់ជាង១ ០០០លានដុល្លារ។ ប្រទេសចិននៅតែជាទីផ្សារចម្បង ខណៈសហភាពអឺរ៉ុបមានចំណែកតិច ប៉ុន្តែអនុវត្តលក្ខខណ្ឌគុណភាពតឹងរ៉ឹង។ ចំណែកការនាំចេញផ្លែផាសិន មានតម្លៃរាប់រយលានដុល្លារក្នុងមួយឆ្នាំៗ ហើយបានកើនឡើងក្នុងប៉ុន្មានឆ្នាំចុងក្រោយ ព្រមទាំងបានចាត់សហភាពអឺរ៉ុបជាទីផ្សារដ៏មានសក្តានុពល៕
