ព្រះវិហារ៖ ប្រជាកសិករនៅភូមិធម្មជាតិសម្តេចតេជោហ៊ុនសែនស្ថិតក្នុងឃុំស្រអែម ស្រុកជាំក្សាន្ត ខេត្តព្រះវិហារ ប្រមាណ ៣៤នាក់ក្នុងនោះ ស្ត្រីចំនួន ១៨នាក់ ទទួលបានបច្ចេកទេសក្នុងការភ្ញាស់កូនមាន់ និងថែរក្សាកូនមាន់បន្ស៉ាំនឹងការប្រែប្រួលអាកាសធាតុ ដើម្បីកាត់បន្ថយហានិភ័យជម្ងឺលើសត្វមាន់ និងបង្កើនប្រាក់ចំណូលផ្គត់ផ្គង់គ្រួសារ។
ការទទួលបានបែបនេះ របស់កសិករធ្វើឡើង នៅក្នុងវគ្គបណ្តុះបណ្តាលស្តីពីបច្ចេកទេសភ្ញាស់កូនមាន់ និងការថែរក្សាកូនមាន់បន្ស៊ាំនឹងការប្រែប្រួលអាកាសធាតុនៅអគារមជ្ឈមណ្ឌលទេសចរណ៍ធម្មជាតិទំនប់អូរស្វាយនៅថ្ងៃទី២៥-២៦ ខែមីនា ឆ្នាំ២០២៦។
នាឱកាសនោះ លោក ស្រ៊ុន បូរិន្ទ អនុប្រធានមន្ទីរកសិកម្មខេត្តព្រះវិហារ នឹងជាគ្រូបង្គោលមកពីមន្ទីរកសិកម្មរុក្ខាប្រមាញ់ និងនេសាទ និងមន្រ្តីបច្ចេកទេស បានបង្រៀនដល់កសិករជាទ្រឹស្តីអំពីរបៀបភ្ញាស់កូនមាន់ បង្ហាញពីបច្ចេកទេសធ្វើវ៉ាក់សាំង និងការចុះអនុវត្តផ្ទាល់នៅតាមផ្ទះកសិករ ដោយបង្ហាញអំពីបៀបធ្វើវ៉ាក់សាំង ចាក់វ៉ាក់សាំងលើសត្វមាន់ និងពិភាក្សាកែលម្អលើចំណុចខ្វះខាតមួយចំនួនបន្ថែមទៀត។
ក្នុងឱកាសនោះផងដែរ ឯកឧត្តម ហែម ស៊ីណាត អគ្គនាយករងនៃអាជ្ញាធរជាតិព្រះវិហារ និងជាមន្ត្រីសម្របសម្រួលគម្រោង បានមានប្រសាសន៍ថា ការអនុវត្តបច្ចេកទេសចិញ្ចឹមសត្វបានត្រឹមត្រូវ មិនត្រឹមតែបានជួយកាត់បន្ថយហានិភ័យនៃជម្ងឺឆ្លងលើសត្វចិញ្ចឹមនោះទេ ថែមទាំងបានធានាដល់ការកសាងប្រាក់ចំណូលរបស់កសិករកាន់តែប្រសើរឡើងថែមទៀត សម្រាប់ផ្គត់ផ្គង់ជីវភាពប្រចាំថ្ងៃ។
ក្រោយបញ្ចប់វគ្គបណ្តុះបណ្តាល កសិករដែលបានចូលរួម ទទួលសម្ភារៈកសិកម្មមួយចំនួនរួមមាន ម៉ាស៊ីនកិនផលិតចំណីសត្វចំនួន៣៣ ទូភ្ញាស់ស៊ុតមាន់ចំនួន២ និងបន្ទះសូឡាចំនួន២០គ្រឿង ដើម្បីបម្រើដល់វិស័យកសិកម្មប្រចាំថ្ងៃ ពីគម្រោងស្តារវិស័យទេសចរណ៍សហគមន៍បន្ទាប់ពីវិបត្តិកូវីដ-១៩ តាមរយៈជំនួយដោយរដ្ឋាភិបាលជប៉ុន និងគ្រប់គ្រងដោយធនាគាអភិវឌ្ឍន៍អាស៊ី។
ភូមិធម្មជាតិសម្ដេចតេជោហ៊ុនសែន គឺជាភូមិ១ ក្នុងចំណោមភូមិទាំង ៧ ស្ថិតក្នុងឃុំស្រអែម ស្រុកជាំក្សាន្តខេត្តព្រះវិហារ។ ភូមិនេះមានប្រជាពលរដ្ឋរស់នៅ ជាអចិន្ត្រៃយ៍សរុបចំនួន ៥,៣៧៥.នាក់ ក្នុងនោះមានស្រីចំនួន ២,៤៤៩.នាក់, ស្មើនិង ១,១៨៣.គ្រួសារ, និងមានចំនួន ៨១១ ខ្នងផ្ទះ,។
ប្រជាពលរដ្ឋរស់នៅក្នុងភូមិធម្មជាតិប្រកបមុខរបរទទួលទានចិញ្ចឹមជីវិតគឺពឹងផ្អែកទៅលើវិស័យកសិកម្ម និងវិស័យទេសចរណ៍ ជាចម្បង និងមានរបរបន្ទាប់បន្សំផ្សេងទៀតទៅតាមទំនៀមទំលាប់តាំងតែពីបុព្វបុរសដូនតាជំនាន់មុនៗ នៅរក្សាអភិរក្សមកដល់បច្ចុប្បន្ននៅតែមានជាប្រចាំ៕
