ហាណូយ៖ ស្របពេលប្រទេសវៀតណាមកំពុងពន្លឿនកិច្ចខិតខំប្រឹងប្រែង ដើម្បីរៀបចំរចនាសម្ព័ន្ធទីផ្សារនាំចេញរបស់ខ្លួន ទីផ្សារហាឡាល់សម្រាប់ជនមូស្លីមកំពុងលេចចេញជាមធ្យោបាយដ៏ជោគជ័យមួយ សម្រាប់ការធ្វើសមាហរណកម្មពាណិជ្ជកម្មកាន់តែស៊ីជម្រៅ ដែលស្របតាមចក្ខុវិស័យរយៈពេលវែងសម្រាប់កំណើនប្រកបដោយចីរភាព។
សារព័ត៌មានវៀតណាម បានចេញផ្សាយថា ការរៀបចំរចនាសម្ព័ន្ធទីផ្សារនាំចេញរបស់ប្រទេសវៀតណាម រួមមានការធ្វើពិពិធកម្មទីផ្សារ និងកាត់បន្ថយការពឹងផ្អែកលើដៃគូពាណិជ្ជកម្មបែបប្រពៃណី។
យោងតាមអង្គការអន្តរជាតិ ជនម៉ូស្លីមនៅលើពិភពលោក នាពេលបច្ចុប្បន្នជាង២ ០០០លាននាក់ ដែលស្មើនឹងប្រហែល២៥ភាគរយនៃចំនួនប្រជាជនទាំងអស់នៅលើពិភពលោក។
ចំណែកសេដ្ឋកិច្ចហាឡាល់ត្រូវបានព្យាករថា នឹងកើនដល់ប្រមាណ៥ទ្រីលានដុល្លារ នៅឆ្នាំ២០៣០ ដោយពង្រីកហួសពីអាហារ និងភេសជ្ជៈ ក្លាយទៅជាគ្រឿងសម្អាង ឱសថ ភស្តុភារកម្ម ទេសចរណ៍ និងហិរញ្ញវត្ថុអ៊ីស្លាម។
ជាការកត់សម្គាល់ ទីផ្សារហាឡាល់មិនមែនជាទីផ្សារពិសេសទៀតទេ ប៉ុន្តែជាទីផ្សាររបស់អ្នកប្រើប្រាស់កាន់តែទូលំទូលាយ ដែលផ្ដល់អាទិភាពចំពោះស្តង់ដារសីលធម៌ ការតាមដាន តម្លាភាព និងសុចរិតភាពផលិតកម្ម។ រីឯអ្នកប្រើប្រាស់ ដែលមិនមែនជាជនមូស្លីម ក៏កំពុងមានទំនោរទៅរកផលិតផលហាឡាល់ផងដែរ ដោយចាត់ទុកវិញ្ញាបនបត្រ ហាឡាល់ជាការធានានូវគុណភាព សុវត្ថិភាព និងនិរន្តរភាព។
ជាមួយនឹងភាពខ្លាំងរបស់ខ្លួននៅក្នុងវិស័យកសិកម្មត្រូពិច ការកែច្នៃម្ហូបអាហារ និងការធ្វើសមាហរណកម្មយ៉ាងស៊ីជម្រៅតាមរយៈកិច្ចព្រមព្រៀងពាណិជ្ជកម្មសេរីថ្មី ប្រទេសវៀតណាមត្រូវបានគេចាត់ទុកថា មានសក្តានុពលគួរឱ្យកត់សម្គាល់ក្នុងការអភិវឌ្ឍឧស្សាហកម្មហាឡាល់ ដែលមានរចនាសម្ព័ន្ធរឹងមាំ។
ទោះបីជាយ៉ាងណាក៏ដោយ ដើម្បីបង្វែរសក្តានុពលនោះទៅជាឧត្តមភាពប្រកួតប្រជែង វិញ្ញាបនបត្រហាឡាល់មិនត្រឹមតែជាស្តង់ដារប៉ុណ្ណោះទេ ថែមទាំងត្រូវតែជាយុទ្ធសាស្ត្រអភិវឌ្ឍន៍ទូទាំងឧស្សាហកម្មផងដែរ។
ស្របពេលជាមួយគ្នានេះដែរ ក្រុមហ៊ុននានាកំពុងចូលរួមជាមួយទីផ្សារហាឡាល់ ជាលក្ខណៈបុរេសកម្ម និងជាយុទ្ធសាស្ត្រ។ ថ្មីៗនេះ ក្រុមហ៊ុនមួយរបស់វៀតណាមបានប្រកាសថា ផលិតផលមួយចំនួនរបស់ខ្លួន បានទទួលវិញ្ញាបនបត្រ ហាឡាល់ ពីមជ្ឈមណ្ឌលជាតិវិញ្ញាបនបត្រ ហាឡាល់ រួមមានសម្រាប់ផលិតកាហ្វេ គ្រប់ធញ្ញជាតិ និង សំបុកត្រចៀកកាំលេខ១។ សារៈសំខាន់នៃវិញ្ញាបនបត្រ ហាឡាល់ គឺមិនមែនមាននៅក្នុងផលិតផល ដែលមានការបញ្ជាក់នោះទេ ប៉ុន្តែនៅក្នុងវិធីសាស្រ្តរបស់ក្រុមហ៊ុន។
យោងតាមបុគ្គលិកជាន់ខ្ពស់របស់ក្រុមហ៊ុន បានឱ្យដឹងថា ការចូលទីផ្សារហាឡាល់ទាមទារឱ្យមានការរៀបចំរចនាសម្ព័ន្ធខ្សែសង្វាក់តម្លៃឡើងវិញ ឱ្យបានគ្រប់ជ្រុងជ្រោយ ចាប់ពីការស្វែងរកវត្ថុធាតុដើម និងដំណើរការផលិតកម្ម រហូតដល់ប្រព័ន្ធគ្រប់គ្រងគុណភាព ម៉ាកយីហោ និងយុទ្ធសាស្ត្រចូលទីផ្សារ។
ក្នុងន័យនេះ វិញ្ញាបនបត្រហាឡាល់ មិនមែនគ្រាន់តែជាលិខិតឆ្លងដែនសម្រាប់នាំចេញទៅកាន់ទីផ្សារមូស្លីមនោះទេ ប៉ុន្តែជាយន្តការត្រង ដែលបង្ខំឱ្យអាជីវកម្មត្រូវបង្កើនស្តង់ដារអភិបាលកិច្ច ធ្វើស្តង់ដារនីតិវិធី និងវិនិយោគឱ្យបានហ្មត់ចត់លើតម្លៃផលិតផលក្នុងស្រុក ព្រមទាំងបង្ហាញពីភាពខុសគ្នាជាមូលដ្ឋានរវាងការស្វែងរកវិញ្ញាបនបត្រហាឡាល់ជាតម្រូវការនាំចេញ និងការអភិវឌ្ឍផលិតផលហាឡាល់ជាយុទ្ធសាស្ត្រឧស្សាហកម្មរយៈពេលវែង។
មជ្ឈមណ្ឌលជាតិវិញ្ញាបនប័ត្រហាឡាល់ បាននិយាយថា ផលិតផលហាឡាល់របស់វៀតណាមកំពុងផ្លាស់ប្តូរបន្តិចម្តងៗ ពីការផលិតតាមកិច្ចសន្យាឆ្ពោះទៅរកគោលដៅ ដែលមានតម្លៃបន្ថែមខ្ពស់ទាក់ទងនឹងការដាក់ស្លាកសញ្ញា និងការតាមដាន។ មិនយូរប៉ុន្មានបន្ទាប់ពីទទួលបានវិញ្ញាបនបត្រ ហាឡាល់ ក្រុមហ៊ុនវៀតណាមមួយចំនួន បាននាំចេញជាលើកដំបូងនូវផលិតផលហាឡាល់ទៅកាន់ប្រទេសម៉ាឡេស៊ី ដែលជាទីផ្សារហាឡាល់ដ៏ធំបំផុតមួយរបស់តំបន់។
ប្រទេសម៉ាឡេស៊ីកាន់កាប់ទីតាំងសំខាន់មួយនៅក្នុងទីផ្សារហាឡាល់លើសកលលោក។ ដោយមានប្រជាជនម៉ូស្លីមជាង៦០ភាគរយនៃចំនួនប្រជាជនរបស់ខ្លួន ហើយប្រទេសម៉ាឡេស៊ីមានគោលបំណងក្លាយខ្លួនជាមជ្ឈមណ្ឌលហាឡាល់សកល នៅឆ្នាំ២០៣០ ដោយកំណត់ផលិតផលក្នុងស្រុកសរុបហាឡាល់ចំនួន៥៨,៥ពាន់លានដុល្លារ ស្មើនឹង១១ភាគរយនៃផលិតផលជាតិសរុប។
តាមស្ថាប័ន ប្រទេសម៉ាឡេស៊ីត្រូវបានទទួលស្គាល់ថា បានរក្សានូវប្រព័ន្ធស្តង់ដារហាឡាល់ដ៏តឹងរ៉ឹង និងប្រកបដោយវិជ្ជាជីវៈបំផុតមួយរបស់ពិភពលោក។ ដូច្នេះ ការទទួលបានការអនុញ្ញាតនាំចូលទៅកាន់ទីផ្សារនេះ អាចឱ្យទំនិញវៀតណាមពង្រីកបន្ថែមទៀតទៅកាន់មជ្ឈិមបូព៌ា និងទៅកាន់ទីផ្សារភាគច្រើន ដែលកាន់សាសនាឥស្លាមផ្សេងទៀត។
តំណាងស្ថានទូតម៉ាឡេស៊ីប្រចាំប្រទេសវៀតណាម បានលើកឡើងថា ការកើនឡើងនៃផលិតផលវៀតណាម ដែលទទួលបានវិញ្ញាបនបត្របញ្ជាក់ហាឡាល់ កំពុងបើកវិសាលភាពដ៏ធំសម្រាប់កិច្ចសហប្រតិបត្តិការ ដែលមិនត្រឹមតែជាទីផ្សារអ្នកប្រើប្រាស់ចុងក្រោយប៉ុណ្ណោះទេ ប៉ុន្តែក៏ជាការតភ្ជាប់ខ្សែសង្វាក់ផ្គត់ផ្គង់ហាឡាល់ក្នុងតំបន់ផងដែរ។
យោងតាមការិយាល័យពាណិជ្ជកម្មវៀតណាម នៅប្រទេសម៉ាឡេស៊ី បានឱ្យដឹងថា បញ្ហាប្រឈមធំជាងគេសម្រាប់ក្រុមហ៊ុនវៀតណាម គឺមិនមែនគុណភាពផលិតផលទេ ប៉ុន្តែសមត្ថភាពរបស់ពួកគេក្នុងការធ្វើសមាហរណកម្មទៅក្នុងប្រព័ន្ធអេកូឡូស៊ីហាឡាល់៕
