ញូវដេលី៖ ក្រុមអ្នកផលិតជីនៅក្នុងប្រទេសឥណ្ឌា នៅក្នុងសប្តាហ៍នេះ បានចាប់ផ្តើមកាត់បន្ថយផលិតកម្មរបស់ខ្លួន បន្ទាប់ពីផ្អាកការផ្គត់ផ្គង់ហ្គាសពីប្រទេសកាតា ដែលជាធាតុចូលដ៏សំខាន់សម្រាប់ដំណើរសង្វាក់ផលិតជី។
យោងតាមសារព័ត៌មាន ប៊ូមប៊ើក (Bloomberg) បានឱ្យដឹងថា អាជីវកម្មធំៗមួយចំនួននៅក្នុងប្រទេស ដូចជាក្រុមហ៊ុនផលិតជីសម្រាប់សហគមន៍កសិករ (Indian Farmers Fertilizer Cooperative) បានចាប់ផ្តើមកាត់បន្ថយដំណើរការផលិតជីអ៊ុយរ៉េមួយចំនួន ហើយប្រសិនបើការរំខានដោយសារសង្គ្រាមនៅតែបន្តអូសបន្លាយ ក្រុមហ៊ុនអាចនឹងត្រូវបង្ខំចិត្តបិទរោងចក្រតែម្តង។
ហ្គាសនាំចូលពីប្រទេសកាតា គឺជាថាមពលដ៏សំខាន់សម្រាប់ចាក់ម៉ាស៊ីនផលិតអ៊ុជីយអ៊ុយរ៉េ។
ការកាត់បន្ថយផលិតកម្មជីរបស់ឥណ្ឌា បានកើតឡើងចំពេលមានការរំខានដល់ខ្សែចង្វាក់ផ្គត់ផ្គង់ ដែលធ្វើឱ្យតម្លៃហ្គាសហក់ឡើង និងបង្កឱ្យមានការព្រួយបារម្ភដល់ផ្នែកសេដ្ឋកិច្ចកាន់តែច្រើន។
ការឡើងថ្លៃសម្រាប់វត្ថុធាតុដើមផ្សេងទៀត ដែលប្រើសម្រាប់ផលិតជាជី ដូចជាសារធាតុអាម៉ូញាក់ និងស្ពាន់ធ័រ បានធ្វើឱ្យមានការព្រួយបារម្ភកាន់តែខ្លាំងឡើងអំពីថ្លៃដើមផលិតកម្មកាន់តែខ្ពស់។
ចំណែកប្រទេសប៉ាគីស្ថានវិញ ក្រុមហ៊ុនផ្គត់ផ្គង់ហ្គាសដ៏ធំមួយ ក៏បានជូនដំណឹងដល់អតិថិជនថា ខ្លួននឹងមិនអាចផ្គត់ផ្គង់ហ្គាសដល់រោងចក្រផលិតជីបានទេ ដោយសារតែជម្លោះនៅមជ្ឈិមបូព៌ា។ ប៉ាគីស្ថាននាំចូលហ្គាសភាគច្រើនពីប្រទេសកាតា។
មន្ត្រីជាន់ខ្ពស់នៃក្រសួងជីរបស់ប្រទេសឥណ្ឌា បាននិយាយថា ក្រុមហ៊ុនកំពុងតែតាមដានមើលការវិវត្តន៍នៃស្ថានភាពភូមិសាស្ត្រនយោបាយបង្កឡើងដោយសារសង្គ្រាមអ៊ីរ៉ង់។
យោងតាមអគ្គនាយកសមាគមជីឥណ្ឌា បានឱ្យដឹងថា ហ្គាសបម្រុងទុកនាពេលបច្ចុប្បន្នអាចបំពេញតម្រូវបានក្នុងក្នុងរយៈពេលខ្លីប៉ុណ្ណោះ។
ប្រសិនបើរោងចក្របន្តកាត់បន្ថយដំណើរការផលិតជីនៅ ប្រទេសឥណ្ឌាអាចនឹងត្រូវបង្ខំឱ្យបង្កើនការនាំចូលជីក្នុងតម្លៃខ្ពស់ ស្របពេលតម្រូវការកាន់តែខ្ពស់បំផុតនៅក្នុងរដូវវស្សាខាងមុខនេះ។ ឥណ្ឌា គឺជាប្រទេសកសិកម្ម និងនាំចេញអង្ករធំជាងគេបំផុតរបស់ពិភពលោក ហើយក៏ជាអ្នកផលិតស្ករ ស្រូវសាលី និងកប្បាស ធំជាងគេទីពីររបស់ពិភពលោកផងដែរ។
ដោយសារសង្គ្រាមរបស់សហរដ្ឋអាម៉េរិក ព្រួតគ្នាជាមួយអ៊ីស្រាអែល វាយកម្ទេចប្រទេសអ៊ីរ៉ង់ ក្រុមហ៊ុនផលិតជីដ៏មួយរបស់រដ្ឋប៉ូឡូញ បានបញ្ឈប់ជាបណ្តោះអាសន្ននូវការបញ្ជាទិញថ្មី ដោយសារតម្លៃហ្គាសនៅអឺរ៉ុប បានកើនឡើងកប់ពពក បន្ទាប់ពីរោងចក្រផលិតហ្គាសដ៏ធំបំផុតរបស់ពិភពលោក នៅក្នុងប្រទេសកាតា បានផ្អាកការនាំចេញដោយសារសង្គ្រាម។
សង្គ្រាមនៅប្រទេសអ៊ីរ៉ង់ បានរំខានដល់រំហូរការដឹកជញ្ជូនឆ្លងកាត់ឈូងសមុទ្រពែក្ស ដែលជាមជ្ឈមណ្ឌលដឹកជញ្ជូនជីដ៏សំខាន់ ដែលជំរុញឱ្យតម្លៃកើនឡើង នៅពេលកសិករនៅតំបន់អឌ្ឍគោលខាងជើង កំពុងរៀបចំដាក់ជីក្នុងស្រែរបស់ពួកគេ។ ទន្ទឹមនឹងនេះ ការកើនឡើងនៃតម្លៃហ្គាស ក៏នឹងប៉ះពាល់ដល់អ្នកផលិតជីនៅក្នុងតំបន់ផ្សេងទៀត។
យោងតាមក្រុមហ៊ុនផលិតរបសើប៉ូឡូញ បានឱ្យដឹងទៀតថា អ្នកផលិតជី ដែលមិនមែនជាសមាជិកសហភាពអឺរ៉ុប ដូចជានៅប្រទេសអេហ្ស៊ីប អាល់ហ្សេរី ចិន និងសហរដ្ឋអាម៉េរិក បានសម្រេចចិត្តដំឡើងថ្លៃភ្លាមៗពី៤៥ ទៅ៧០ដុល្លារ ក្នុងមួយតោន។ ដូច្នេះក្រុមហ៊ុនប្រឈមនឹងការប្រកួតប្រជែងយ៉ាងខ្លាំងពីជីប្រទេសរុស្ស៊ី និងរបស់បេឡារុស៕
