គូឡាឡាំពួរ៖ រដ្ឋមន្ត្រីក្រសួងកសិកម្ម និងសន្តិសុខស្បៀង ម៉ាឡេស៊ី នៅថ្ងៃទី២៥ ខែកុម្ភៈ ឆ្នាំ២០២៦នេះ បានឱ្យដឹងថា ប្រទេសម៉ាឡេស៊ីមានស្តុកអង្ករគ្រប់គ្រាន់សម្រាប់ផ្គត់ផ្គង់តម្រូវការក្នុងស្រុកបានប្រមាណជាងប្រាំខែប៉ុណ្ណោះ នៅពេលមានគ្រោះអាសន្នកើតឡើង។
រដ្ឋមន្ត្រីក្រសួងកសិកម្ម និងសន្តិសុខស្បៀង លោក ម៉ូហាម៉ាដ សាប៊ូ (Mohamad Sabu) បានមានប្រសាសន៍ថា បច្ចុប្បន្នប្រទេសម៉ាឡេស៊ី គិតត្រឹមថ្ងៃទី៣ ខែកុម្ភៈ ឆ្នាំ២០២៦ មានស្តុកអង្ករសរុបជាងមួយលានតោន ដែលក្នុងនេះមានអង្ករស្តុកបម្រុងសម្រាប់ផ្គត់ផ្គង់តម្រូវការបន្ទាន់ចំនួន២០០ ០០០តោន និងអង្ករស្តុកសម្រាប់ធ្វើពាណិជ្ជកម្មចំនួន ៨៨៩ ២៨៥តោន។
លោកបានមានប្រសាសន៍ថា នេះបង្ហាញឱ្យឃើញថា ត្រូវវិធានការណ៍ចាំបាច់ ដើម្បីធានាឱ្យបាននូវការផ្គត់ផ្គង់ស្បៀងអាហារឱ្យបានគ្រប់គ្រាន់ក្នុងករណីមានគ្រោះមហន្តរាយ។ ចំណែកវិធានការផ្សេងទៀត រួមមានការធ្វើគម្រោងសាកល្បងដាំស្រូវលើផ្ទៃដីទំហំ៣ ០០០ហិកតា ក្នុងដំណាក់កាលចាប់ផ្តើម នៅឆ្នាំ២០២៤ តាមតំបន់គ្រប់គ្រងដោយអាជ្ញាធរអភិវឌ្ឍន៍កសិកម្ម ម៉ាឡេស៊ី។
លោករដ្ឋមន្ត្រីបានលើកឡើងថា ព្រមជាមួយគ្នានេះដែរ ក៏មានកិច្ចខិតខំប្រឹងប្រែងជាដំណាក់កាល ដើម្បីធ្វើឱ្យប្រសើរឡើងវិញនូវប្រព័ន្ធគ្រប់គ្រងទឹកក្នុងវិស័យកសិកម្ម តាមរយៈកិច្ចសហប្រតិបត្តិការជាមួយវិស័យឯកជន ដែលជាមធ្យោបាយមួយ ដើម្បីបង្កើនប្រសិទ្ធភាពក្នុងការគ្រប់គ្រងទឹក ពេលមានគ្រោះទឹកជំនន់ និងគ្រោះរាំងស្ងួត។
លោកក៏បានលើកឡើងពីគម្រោងបង្កបង្កើនផលដំណាំស្រូវ ដែលផ្តល់ការការពារសម្រាប់ក្រុមកសិករខ្នាតតូច ដែលងាយរងផលប៉ះពាល់ដោយគ្រោះមហន្តរាយ ដោយអាចទទួលបានសំណងរហូតដល់៣ ០០០រីងហ្គីត ឬប្រហែលនឹង៧៦៥ដុល្លារ ក្នុងមួយហិកតា សម្រាប់ការខូចខាតផលដំណាំ។
លោកបានមានប្រសាសន៍ថា មូលនិធិគ្រោះមហន្តរាយក៏បានផ្តល់ជំនួយភ្លាមៗដល់ក្រុមកសិករគោលដៅ ដែលរងផលប៉ះពាល់ដោយគ្រោះមហន្តរាយ ជំងឺដំណាំ ឬដោយសត្វល្អិតបំផ្លាញ ដោយលោកបន្ថែមថា ទឹកប្រាក់ប្រហែលជាប្រាំលានរីងហ្គីត ឬប្រហែល១,២៩លានដុល្លារ ត្រូវបានប្រគល់ឱ្យកសិករប្រហែល២ ២៥៥គ្រួសារ ដែលរងគ្រោះដោយការខូចខាតដំណាំស្រូវលើផ្ទៃដីជាង៣ ២៥៣ហិកតា។
រដ្ឋមន្ត្រីក្រសួងកសិកម្ម និងសន្តិសុខស្បៀងម៉ាឡេស៊ី លោក ម៉ូហាម៉ាដ សាប៊ូ បានបន្ថែមថា វិទ្យាស្ថានស្រាវជ្រាវ និងអភិវឌ្ឍន៍កសិកម្មម៉ាឡេស៊ី ក៏កំពុងអនុវត្តសកម្មភាពស្រាវជ្រាវ អភិវឌ្ឍន៍ និងនវានុវត្តន៍ ដើម្បីបង្កើតពូជដំណាំស្រូវ និងដំណាំផ្សេងទៀត ដែលមានភាពអត់ធ្មត់ចំពោះគ្រោះរាំងស្ងួត ទឹកជំនន់ និងជាតិប្រៃ។
យោងតាមលោក ម៉ូហាម៉ាដ សាប៊ូ បានឱ្យដឹងទៀតថា វិទ្យាស្ថានស្រាវជ្រាវ និងអភិវឌ្ឍន៍កសិកម្មម៉ាឡេស៊ី ក៏កំពុងខិតខំប្រឹងប្រែងផងដែរ ដើម្បីពង្រឹងឧស្សាហកម្មគោសាច់ ដោយបង្កាត់ពូជគោ តាមរយៈកម្មវិធីពង្រឹង និងកម្មវិធីបង្កាត់ពូជសត្វពាហនៈរបស់ប្រទេសម៉ាឡេស៊ី។
លោកបានមានប្រសាសន៍ថា លើសពីនេះ ការចិញ្ចឹមសត្វពាហនៈត្រូវបានពង្រឹងផងដែរ តាមរយៈកម្មវិធីលើកទឹកចិត្តដល់អ្នចិញ្ចឹម ក្នុងគោលបំណងសម្រេចបាននូវអត្រាកំណើនសត្វចិញ្ចឹមយកសាច់ជាមធ្យម៦០ភាគរយ ហើយក្រសួងកំពុងអភិវឌ្ឍ និងពង្រីកប្រព័ន្ធព្រមានជាមុនសម្រាប់ករណីកើតមានសត្វល្អិតចង្រៃ តាមរយៈកិច្ចសហប្រតិបត្តិការយ៉ាងជិតស្និទ្ធជាមួយនាយកដ្ឋានឧតុនិយមម៉ាឡេស៊ី។
លោករដ្ឋមន្ត្រីក្រសួងកសិកម្មបានបន្ថែមថា ក្រសួងនៅតែប្តេជ្ញាចិត្តក្នុងការកែលម្អភាពធន់នៃប្រព័ន្ធអេកូឡូស៊ីកសិចំណីអាហារជាតិ នៅពេលប្រឈមមុខនឹងគ្រោះមហន្តរាយ ហើយអាចធានាបាននូវសន្តិសុខស្បៀងអាហារជានិច្ច៕
