ដោយ ឡុង សារេត
ភ្នំពេញ៖ លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជាបានអំពាវនាវដល់ក្រសួង ស្ថាប័នពាក់ព័ន្ធ ជាពិសេសមន្ត្រីជំនាញប្រចាំការនៅច្រកព្រំដែន ត្រូវជួយពង្រឹងការត្រួតពិនិត្យឱ្យបានតឹងរឹងលើការនាំចូលជ្រូករស់មកពីប្រទេសខាងក្រៅ ដើម្បីចូលរួមការពារផលប្រយោជន៍របស់អ្នកចិញ្ចឹមសត្វនៅក្នុងស្រុក។
ការអំពាវនាវរបស់ប្រធានសមាគមអ្នកចិញ្ចឹមសត្វកម្ពុជា ធ្វើឡើងក្រោយពីមានក្រុមអន្តរាគមន៍បង្ក្រាបបទល្មើសចលនាសត្វ និងផលិតផលកម្មនៃអគ្គនាយកដ្ឋានសុខភាពសត្វ និងផលិតកម្មសត្វ សហការជាមួយមន្ទីរកសិកម្ម រុក្ខាប្រមាញ់ និងនេសាទ ខេត្តព្រះវិហារ និងអធិការដ្ឋានស្រុករវៀង កាលពីថ្ងៃទី៤ ខែកុម្ភៈកន្លងមកនេះ បានធ្វើប្រតិត្តិការត្រួតពិនិត្យជាក់ស្តែងលើការដឹកជញ្ជូនសត្វ និងផលិតផលសត្វ នៅលើផ្លូវលេខ៩៥ ត្រង់ចំណុចភូមិថ្នល់កែង ឃុំរុងរឿង ស្រុករវៀង ខេត្តព្រះវិហារ ដោយស្ទាក់ឃាត់រថយន្តមួយគ្រឿង ម៉ាកហ៊ីយុនដាយ ដឹកជ្រូករស់ចំនួន១៦០ក្បាល នាំចេញពីប្រទេសឡាវ មកកាន់ព្រះរាជាណាចក្រកម្ពុជា តាមច្រកកំពង់ស្រឡៅ ខេត្តព្រះវិហារ ឆ្ពោះទៅលក់ចែកចាយបន្តនៅតាមបណ្ដារាជធានីខេត្ត។
យោងតាមអគ្គនាយកដ្ឋានសុខភាពសត្វ និងផលិតកម្មសត្វ បានបញ្ជាក់ថា ក្រោយពីមន្ត្រីជំនាញបានពិនិត្យជាក់ស្តែងឃើញថា ការដឹកជញ្ជូនជ្រូករស់ខាងលើពុំមានលិខិតអនុញ្ញាតឱ្យនាំចូលពីក្រសួងកសិកម្ម រុក្ខាប្រមាញ់ និងនេសាទ ដែលផ្ទុយទៅនឹងច្បាប់ស្ដីពីសុខភាពសត្វ និងផលិតកម្មសត្វ។ ជាមួយគ្នានេះដែរ មន្ត្រីជំនាញបាននាំយកវត្ថុតាងមករក្សាទុកនៅទីតាំងធ្វើចត្តាឡីស័ករបស់អគ្គនាយកដ្ឋានសុខភាពសត្វ និងផលិតកម្មសត្វ ដើម្បីចាត់វិធានការតាមនីតិវិធីច្បាប់។
ពាក់ព័ន្ធករណីនេះ, លោក ស្រ៊ុន ពៅ បានចាត់ទុកថា ការនាំចូលជ្រូករស់ ដែលមន្ត្រីជំនាញពិនិត្យឃើញអត់មានលិខិតស្នាម ស្មើនិងការលូចនាំចូលដោយខុសច្បាប់។
លោកបានលើកឡើងទៀតថា កាលពីពេលកន្លងទៅក៏មានករណីលួចនាំចូលជ្រូករស់មកពីខាងក្រៅខ្លះដែរ ប៉ុន្តែចាប់មិនដែលបាន ទើបតែនៅថ្ងៃទី៤ ខែកុម្ភៈ ឆ្នាំ២០២៦ ក្រុមបង្ក្រាបរបស់អគ្គនាយកដ្ឋានសុខភាពសត្វ និងផលិតកម្មសត្ វចុះទៅទប់ស្កាត់បានមួយករណី។ ដូច្នេះ លោកសុំឱ្យបងប្អូននៅតាមច្រកព្រំដែន ជាពិសេសសមត្ថកិច្ចគយ ឬទាហានប្រចាំច្រកព្រំដែនស្ថាប័នពាក់ព័ន្ធនៅច្រកព្រំដែន មេត្តាជួយធ្វើការត្រួតពិនិត្យកុំឱ្យមានការលួចនាំចូលដោយខុសច្បាប់កើតឡើងដូចករណីនេះទៀត។
បើតាមប្រធានសមាគមអ្នកចិញ្ចឹមសត្វខាងលើ បានឱ្យដឹងថា តម្លៃជ្រូករស់ក្នុងស្រុកនៅក្នុងរដូវបុណ្យចូលឆ្នាំចិន វៀតណាម អាចនឹងឡើងថ្លៃបន្តិច ដែលអាចជួយឱ្យកសិករ ក្រុមហ៊ុន និងម្ចាស់កសិដ្ឋានចិញ្ចឹមជ្រូកអាចរកប្រាក់ចំណេញបានខ្លះ ក្រោយរងការខាតបង់អស់មួយរយៈកាលកន្លងទៅ។ ពោលគិតត្រឹមខែកុម្ភៈ ឆ្នាំ២០២៦នេះ តម្លៃជ្រូករស់នៅតាមតំបន់ខ្លះកសិករអាចលក់បានថ្លៃរង្វង់១០ ០០០រៀលក្នុងមួយគីឡូក្រាម។ ប៉ុន្តែការឡើងថ្លៃជ្រូករស់ខ្លះៗនេះ វាមិនបានធ្វើឱ្យប៉ះពាល់ដល់អ្នកបរិភោគក្នុងស្រុកនោះឡើយ៕
