ណៃពិដោ ៖ ប្រទេសភូមាកំពុងរៀបចំផែនការនាំចេញផលិតផលទំពាំង ទៅកាន់ទីផ្សារអន្តរជាតិ ដោយផ្តោតជាពិសេសលើសហព័ន្ធរុស្ស៊ី និងសហភាពអឺរ៉ុប។
បច្ចុប្បន្នប្រទេសភូមាកំពុងត្រៀមនាំចេញទំពាំងស្រស់ចំនួនបីប្រភេទទៅកាន់ទីផ្សារសហព័ន្ធរុស្ស៊ី ខណៈដែលការធ្វើតេស្តគុណភាពក៏កំពុងដំណើរការដែរ ដើម្បីអាចនាំចេញទំពាំងស្រស់ ដែលគ្មានក្លិនទៅកាន់ទីផ្សារសហភាពអឺរ៉ុប។
សមាគមអ្នកដាំ និងអ្នកកែច្នៃទំពាំងរបស់ភូមា បានឲ្យដឹងថា សហព័ន្ធរុស្ស៊ីបានលើកសំណើទិញទំពាំងស្រស់ចំនួនបីប្រភេទ រួមទាំងទំពាំងស្ងោរ។ ជាមួយគ្នានេះដែរ ក៏មានសំណើសម្រាប់ចែកចាយទំពាំងស្រស់ ដែលគ្មានក្លិនទៅកាន់ទីផ្សារបណ្ដាប្រទេសក្នុងសហភាពអឺរ៉ុប ដោយបច្ចុប្បន្នកំពុងអនុវត្តការសាកល្បងគុណភាព និងស្តង់ដារនាំចេញ ។
ក្រៅពីនេះ ប្រទេសជប៉ុនក៏បានបញ្ជាទិញទំពាំងក្រៀមភូមារហូតដល់២០០តោន សម្រាប់ឆ្នាំ២០២៦នេះ ទោះបីជាមានតែប្រមាណ១០ភាគរយនៃបរិមាណ ដែលបានបញ្ជាទិញត្រូវបាននាំចេញរួចមកហើយក្តី។ សម្រាប់ការដឹកជញ្ជូនលើកដំបូង ទំពាំងក្រៀមចំនួនប្រាំតោន គ្រោងនឹងនាំចេញទៅកាន់ប្រទេសជប៉ុន នៅក្នុងខែកុម្ភៈ ខណៈបរិមាណនៅសល់នឹងត្រូវដឹកជញ្ជូនជាបន្តបន្ទាប់។
សម្រាប់ដំណើរការផលិតទំពាំងក្រៀម ទំពាំងស្រស់ត្រូវបានប្រមូលទិញជារៀងរាល់ឆ្នាំ ចាប់ពីខែកក្កដា ដល់ខែកញ្ញា ហើយត្រូវដំណើរការសម្ងួតចាប់ពីខែវិច្ឆិកា រហូតដល់ចុងខែមីនា មុននឹងនាំចេញទៅកាន់ទីផ្សារបរទេស។
សមាគមអ្នកដាំ និងអ្នកកែច្នៃទំពាំងរបស់ភូមា បានបញ្ជាក់ថា ក្នុងការនាំចេញទំពាំងស្រស់ និងទំពាំងក្រៀមទៅកាន់ទីផ្សារអន្តរជាតិ ទំពាំងក្រៀមផលិតពីប្រភេទទំពាំងមួយចំនួន ដែលអាចឆ្លើយតបទៅនឹងស្តង់ដារទីផ្សារអន្តរជាតិ។ ទោះបីជាយ៉ាងណា ក្នុងដំណើរការកែច្នៃទៅជាផលិតផលសម្រេច គេត្រូវយកចិត្តទុកដាក់យ៉ាងខ្លាំង ដើម្បីធានាថា ទំពាំងមិនមានការប្រើប្រាស់សារធាតុគីមី ព្រោះសំណល់គីមីអាចបណ្តាលឱ្យបាត់បង់ឱកាសនាំចូលទីផ្សារអន្តរជាតិ៕
អ្នកឯកទេសសិប្បកម្មទំពាំងភូមា បានរាយការណ៍ថា តម្រូវការក្នុងស្រុកដ៏រឹងមាំបានរារាំងអ្នកនាំចេញមិនអាចបំពេញការបញ្ជាទិញពីអន្តរជាតិ ទោះបីជាមានការចាប់អារម្មណ៍ពីបរទេសលើផលិតផលទំពាំងភូមាក៏ដោយ។
បច្ចុប្បន្ន បរិមាណទំពាំងតិចតួចរបស់ភូមា បាននាំចេញទៅទីផ្សារប្រទេសចិន និងជប៉ុន ខណៈពេលអ្នកទិញមកពីសហរដ្ឋអាម៉េរិកក៏បានបង្ហាញពីចំណាប់អារម្មណ៍ចង់ទិញរយៈពេលវែងចំពោះផលិតផលទំពាំងស្ថោររបស់ភូមា។ ប៉ុន្តែ ការផ្គត់ផ្គង់ទំពាំងដើមមិនគ្រប់គ្រាន់ បានធ្វើឱ្យប្រតិបត្តិការនាំចេញក្នុងទ្រង់ទ្រាយធំ ត្រូវបានជាប់គាំង ខណៈពេលអ្នកទិញនៅក្រៅប្រទេសកំពុងរង់ចាំការដឹកជញ្ជូន។
តំណាងឧស្សាហកម្មទំពាំងភូមា បានសង្កត់ធ្ងន់លើតម្រូវការក្នុង ដោយពង្រីកការដាំដុះឫស្សីខ្នាតតូច ដើម្បីបំពេញតម្រូវការកើនឡើងសម្រាប់ទំពាំងស្រស់ និងផលិតផលទំពាំងក្បែរច្នៃ ដើម្បីផ្គត់ផ្គង់ទីផ្សារ។
នៅឆ្នាំ២០២៥ ប្រទេសភូមា បានជំរុញយ៉ាងខ្លាំងដល់ឧស្សាហកម្មនាំចេញទំពាំងរបស់ខ្លួន ដោយផ្តោតគោលដៅលើទីផ្សារក្នុងប្រទេសជប៉ុន ចិន និងរុស្ស៊ី សម្រាប់ផលិតផលទំពាំងស្រស់ និងទំពាំងក្រៀម។ ប្រទេសជប៉ុនបានបញ្ជាទិញទំពាំងក្រៀមរហូតដល់២០០តោន ប៉ុន្តែតម្រូវការច្រើនក្នុងប្រទេសភូមាធ្វើតម្លៃទំពាំងឡើងខ្ពស់ និងមានបរិមាណមិនគ្រប់គ្រាន់សម្រាប់ការនាំចេញ៕
