ណៃពិដោ៖ ការប្រឹងប្រែងរួមគ្នាជំរុញទីផ្សារនាំចេញដោយសហព័ន្ធស្រូវអង្ករ និងក្រុមហ៊ុននាំចេញអង្កររបស់ប្រទេសភូមា កំពុងដំណើរការដើម្បីសម្រេចបានគោលដៅនាំចេញអង្ករចំនួនបីលានតោន ដែលត្រូវបានកំណត់សម្រាប់ផែនការឆ្នាំ២០២៥-២០២៦។
យោងតាមសហព័ន្ធអង្ករភូមា បានឱ្យដឹងថា ការនាំចេញអង្កររបស់ភូមា ក្នុងរយៈពេលប្រាំពីរខែចុងឆ្នាំ២០២៥នេះ ដោយគិតចាប់តាំងនៅថ្ងៃទី១ ខែមេសា បានឈានដល់ជាង១,៥លានតោន ដែលមានតម្លៃជាទឹកប្រាក់សរុបចំនួន៤៩៩លានដុល្លារ។
ប្រទេសភូមា បាននាំចេញអង្ករទៅកាន់ទីផ្សារអន្តរជាតិ តាមផ្លូវទឹក និងតាមផ្លូវគោក ដែលការធ្វើពាណិជ្ជកម្មតាមផ្លូវទឹក គឺជាច្រកដ៏សំខាន់បំផុតសម្រាប់ការនាំចេញអង្ករ។
តំណាងសហព័ន្ធស្រុវអង្ករភូមា បាននិយាយថា ប្រទេសភូមា បាននាំចេញអង្ករជាង១៤២ ០០០ តោន ក្នុងខែមេសា ឆ្នាំ២០២៥ កើនឡើងដល់២៥០ ០០០តោន ក្នុងខែឧសភា ជាង២១០ ០០០ តោន ក្នុងខែមិថុនា ជាង២៣០ ០០០តោន ក្នុងខែកក្កដា ជាង១៩០ ០០០ តោន ក្នុងខែសីហា ចំនួនជាង១៦០ ០០០តោន ក្នុងខែកញ្ញា និងជាង៣១០ ០០០ តោន ក្នុងខែតុលា ដែលមានបរិមាណសរុបចំនួន ១,៥លានតោន និងមានតម្លៃជាទឹកប្រាក់ប្រហែល៤៩៩លានដុល្លារ។
ប្រទេសភូមានាំចេញអង្ករទៅកាន់ប្រទេសហ្វីលីពីន ចិន អេស្ប៉ាញ ប៉ូឡូញ បែលហ្ស៊ិក ចិន ឥណ្ឌូណេស៊ី សេណេហ្គាល់ និងប្រទេសអង់គ្លេស។
សហព័ន្ធស្រូវអង្ករភូមា និងក្រុមហ៊ុននាំចេញអង្ករកំពុងតែសហការគ្នាខិតខំប្រឹងប្រែងធ្វើយ៉ាងណា ដើម្បីសម្រេចគោលដៅនាំចេញអង្ករឱ្យបានចំនួនបីលានតោន ដែលត្រូវបានកំណត់សម្រាប់ឆ្នាំ២០២៥-២០២៦។
ប្រធានសហព័ន្ធស្រូវអង្ករភូមា បានមានប្រសាសន៍ថា ប្រទេសភូមាសង្ឃឹមនាំចេញអង្ករ និងចុងអង្ករ ឱ្យបានប្រហែលបីលានតោន នៅក្នុងឆ្នាំ២០២៥-២០២៦ ខណៈពេលការនាំចេញនៅឆ្នាំ២០២៤-២០២៥ បានត្រឹម២,៤៨លានតោន។
កាលពីឆ្នាំ២០២៣ ប្រទេសភូមាបាននាំចេញអង្ករក្នុងតម្លៃទឹកប្រាក់ចំនួន៧៨៨លានដុល្លារ ដែលធ្វើឲ្យប្រទេសភូមា ក្លាយជាប្រទេសនាំចេញអង្ករធំជាងគេទី៩ ក្នុងចំណោម១៨៤ប្រទេស ដែលនាំចេញអង្ករនៅលើពិភពលោក។ ក្នុងឆ្នាំដដែលនោះដែរ អង្ករគឺជាផលិតផលនាំចេញច្រើនជាងគេទី៧ ក្នុងចំណោមផលិតផលចំនួន៨០៩មុខ នៅក្នុងប្រទេសភូមា។
នៅឆ្នាំ២០២៣ គោលដៅសំខាន់ៗនៃការនាំចេញអង្កររបស់ប្រទេសភូមា គឺប្រទេសចិន ក្នុងតម្លៃ២៤៥លានដុល្លារ ឥណ្ឌូណេស៊ី ក្នុងតម្លៃ៨១,៦លានដុល្លារ បែលហ្ស៊ិក ក្នុងតម្លៃ៦២,៣លានដុល្លារ ហ្វីលីពីន ក្នុងតម្លៃ៥៨,៥លានដុល្លារ និងប្រទេសអេស្ប៉ាញ ក្នុងតម្លៃ៤៤,៥លានដុល្លារ៕
