តូក្យូ៖ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទរបស់ជប៉ុន ដែលទើបតែងតាំងថ្មី លោក ណូរីកាស៊ូ ស៊ុយស៊ុគី (Norikazu Suzuki) បានបង្ហាញពីចេតនារបស់ខ្លួនក្នុងការកែប្រែគោលនយោបាយផលិតកម្មស្រូវដោយផ្អែកលើតម្រូវការជាក់ស្តែងនៅលើទីផ្សារ។
កាលបីខែមុននេះ អតីតនាយករដ្ឋមន្ត្រីជប៉ុន ដែលទើបតែចុះចេញពីតំណែងបានអនុវត្តគោលនយោបាយមួយ ស្តីពីការបង្កើនផលិតកម្មស្រូវ។
គេជឿថា ការប្រែប្រួលបែបនេះគឺផ្ទុយពីការចង់បានរបស់កសិករជប៉ុន ដែលមានការព្រួយបារម្ភអំពីការធ្លាក់តម្លៃអង្ករ។ ប៉ុន្តែទោះបីជាយ៉ាងណាក៏ដោយ ប្រសិនបើតម្លៃស្រូវនៅតែខ្ពស់បែបនេះ វាក្លាយបន្ទុករបស់អ្នកបរិភោគវិញទេ។
លោក ណូរីកាស៊ូ ស៊ុយស៊ុគី បានសង្កត់ធ្ងន់នៅក្នុងសន្និសីទសារព័ត៌មានសម្ពោធការចូលកាន់តំណែងរបស់លោកកាលពីខែតុលា ឆ្នាំ២០២៥ ដែលបង្ហាញពីចេតនារបស់លោកក្នុងការកែប្រែគោលនយោបាយរបស់អតីតនាយករដ្ឋមន្ត្រី ដែលបានធ្វើឡើងនៅក្នុងកិច្ចប្រជុំគណៈរដ្ឋមន្ត្រី កាលពីខែសីហា។
តម្លៃស្រូវឡើងខ្ពស់ក៏បានរួមចំណែកជួយលើកទឹកចិត្តកសិករជប៉ុនឱ្យប្រឹងដាំស្រូវបន្ថែមទៀត ហើយស្រូវប្រហែល៧,៤៨លានតោន ត្រូវបានគេរំពឹងថា នឹងត្រូវប្រមូលផលនៅឆ្នាំ២០២៥នេះ ដែលកើនឡើង១០ភាគរយ លើសឆ្នាំមុន។ ចំណែកទិន្នផលស្រូវនៅឆ្នាំ២០២៦ ត្រូវបានគេព្យាករណ៍ថា នឹងធ្លាក់ចុះចំនួនប្រាំភាគរយពីមួយឆ្នាំទៅមួយឆ្នាំ មកត្រឹម៧,១១លានតោនប៉ុណ្ណោះ។
ក្រសួងក្រសួងកសិកម្ម រុក្ខាប្រមាញ់ និងនេសាទ បាននិយាយទៀតថា បើសិនការព្យាករណ៍ពីតម្រូវការអង្ករសម្រាប់ឆ្នាំ២០២៦ មានចំនួនពី៦,៩៤លាន ទៅ៧,១១លានតោន។
រដ្ឋាភិបាលជប៉ុនបានគូសបញ្ជាក់ពីគោលនយោបាយមួយ ដើម្បីបង្កើនផលិតកម្មស្រូវនៅក្នុងផែនការមូលដ្ឋានសម្រាបស្បៀងអាហារ កសិកម្ម និងតំបន់ជនបទ ដែលនឹងបម្រើជាគោលការណ៍ណែនាំសម្រាប់គោលនយោបាយកសិកម្មក្នុងរយៈពេលប្រាំឆ្នាំខាងមុខ។
ដោយផ្តោតលើការអភិវឌ្ឍទីផ្សារនាំចេញអង្ករ និងសម្រាប់ផលិតផលអង្ករកែច្នៃ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បាននិយាយថា លោកពិតជាមានគោលបំណងបង្កើនផលិតកម្មស្រូវរយៈពេលមធ្យមទៅវែង ខណៈគោលនយោបាយផលិតកម្មស្រូវ ដែលផលិតតាមតម្រូវការជាក់ស្តែងនៅតែមិនផ្លាស់ប្តូរក្រោមផែនការជាមូលដ្ឋាន។
តម្លៃអង្ករជប៉ុនជាមធ្យមលក់នៅតាមផ្សារទំនើបទូទាំងប្រទេស បានធ្លាក់ចុះមកត្រឹមចន្លោះ៣ ៥០០ យ៉េន ឬស្មើនឹង២២,៦២ដុល្លារ ក្នុងអង្ករប្រាំគីឡូក្រាម បន្ទាប់ពីការបញ្ចេញស្តុកអង្ករជាទ្រង់ទ្រាយធំរបស់រដ្ឋាភិបាល។
ទោះជាយ៉ាងណាក៏ដោយ តម្លៃជាមធ្យមបានងើបឡើងវិញ ហើយឥឡូវនេះស្ថិតនៅក្នុងចន្លោះ៤ ០០០យ៉េន ឬស្មើនឹង២៥,៨៥ដុល្លារ ក្នុងរយៈពេលប្រាំបួនសប្តាហ៍ជាប់ៗគ្នា ហើយអាចឡើងថ្លៃខ្ពស់បំផុតនៅក្នុងវង្វង់ពាក់កណ្តាលខែឧសភា ឆ្នាំ២០២៦ គឺត្រឹម៤ ២៨៥យ៉េន ឬស្មើនឹង២៧,៦៩ដុល្លារ។
អតីតនាយករដ្ឋមន្ត្រីជប៉ុន ដែលទើបចុះចេញពីតំណែង បានបង្ហាញពីការសម្រេចចិត្តយ៉ាងមុតមាំរបស់លោកក្នុងការទប់ស្កាត់អង្ករឡើងថ្លៃ ដោយលោកនិយាយថា តម្លៃត្រូវតែស្ថិតនៅក្នុងចន្លោះ៣ ០០០យ៉េន ឬស្មើនឹង១៩,៣៩ដុល្លារ ក្នុងអង្ករប្រាំគីឡូក្រាម។ ចំណែកអតីតរដ្ឋមន្ត្រីក្រសួងកសិកម្មវិញបានព្យាយាមបញ្ចុះតម្លៃអង្ករតាមរយៈការបញ្ចេញស្តុកអង្កររបស់រដ្ឋាភិបាលចូលទៅក្នុងទីផ្សារ ដើម្បីទប់ទល់ការបន្តឡើងថ្លៃ។
អតីតនាយករដ្ឋមន្ត្រីរូបនេះ ធ្លាប់បានមានប្រសាសន៍ទៀតថា តម្លៃអង្ករគួរតែត្រូវបានកំណត់ដោយទីផ្សារ។ មិនត្រូវកំណត់តម្លៃអង្ករជាក់លាក់ណាមួយឡើយ។ តម្លៃអង្ករគួរតែមានស្ថិរភាព រាប់ទាំងស្ថិរភាពនៃការផ្គត់ផ្គង់អង្ករ និងស្ថិរភាពតម្រូវការអង្ករជាក់ស្តែងនៅលើទីផ្សារ។
ទោះជាយ៉ាងណាក៏ដោយ ខណៈពេលតម្លៃអង្ករកំពុងតែឡើងខ្ពស់ ការនាំចូលអង្ករពីបរទេសដោយវិស័យឯកជនក៏មានផងដែរ ដែលយោងតាមស្ថិតិរបស់ក្រសួងហិរញ្ញវត្ថុ បានឱ្យដឹងថា អង្ករចំនួន៨៦ ៥២៣ តោនត្រូវបាននាំចូលដោយវិស័យឯកជន នៅក្នុងឆមាសទីមួយនៃឆ្នាំ២០២៥ ដែលច្រើនជាង២០០ដងនៃបរិមាណអង្ករនាំចូលក្នុងរយៈពេលដូចគ្នា កាលពីឆ្នាំ២០២៤។
នៅពេលវិស័យឯកជននាំចូលអង្ករពីបរទេស ពេលនោះរដ្ឋាភិបាលជប៉ុនតម្រូវឱ្យពន្ធចំនួន២៤១យ៉េន ឬស្មើនឹង១,៥៦ដុល្លារ ក្នុងមួយគីឡូក្រាម។ ទោះបីជាយ៉ាងនេះក្តី ក្រុមហ៊ុនឯកជនរបស់ជប៉ុនបានបង្កើនការនាំចូលអង្ករពីបរទេស ពីព្រោះតម្លៃនៅតែទាបជាងអង្ករក្នុងស្រុក ទោះបីជាបង់ព័ន្ធរួចហើយក៏ដោយ៕
