ហ្សាការតា៖ ប្រធានទីភ្នាក់ងារស្បៀងអាហារជាតិឥណ្ឌូណេស៊ី បានបញ្ជាក់ពីឥទ្ធិពលរបស់ប្រទេសឥណ្ឌូណេស៊ីលើតម្លៃអង្ករលើសកលលោក ដោយជំរុញការផលិត និងធានាបាននូវស្ថិរភាពតម្លៃអង្ករ ដែលស៊ីសង្វាក់គ្នា និងប្រកបដោយចីរភាព។
លោក អេនឌី អំរ៉ាន់ ស៊ូឡៃម៉ាន (Andi Amran Sulaiman) រដ្ឋមន្ត្រីក្រសួងកសិកម្ម និងជាប្រធានទីភ្នាក់ងារស្បៀងអាហារជាតិឥណ្ឌូណេស៊ី បានកត់សម្គាល់បែបនេះនៅក្នុងសេចក្តីថ្លែងការណ៍មួយ កាលពីថ្ងៃទី៤ ខែវិច្ឆិកា ឆ្នាំ២០២៥ ដោយលើកឡើងថា ប្រទេសឥណ្ឌូណេស៊ីបានរួមចំណែកក្នុងការបញ្ចុះតម្លៃអង្ករនៅលើទីផ្សារសកលលោកពីប្រហែល៦៥០ដុល្លារក្នុងមួយតោន ចុះមកនៅត្រឹម៣៧១ដុល្លារ នាពេលបច្ច្ចុប្បន្ននេះ។
លោកបានបញ្ជាក់បន្ថែមថា ការពង្រឹងផលិតកម្មស្រូវនៅក្នុងប្រទេសឥណ្ឌូណេស៊ី ដើម្បីបំពេញតម្រូវការក្នុងស្រុក ក៏បានជួយបង្កើនបរិមាណស្រូវស្តុក អបម្រុងរបស់រដ្ឋាភិបាលឥណ្ឌូណេស៊ីផងដែរ ដែលឥឡូវនេះមានបរិមាណចំនួនសរុប៣,៨ លានតោន។
លោករដ្ឋមន្ត្រីបានសន្មត់ថា សមិទ្ធផលដ៏ល្អនេះគឺស្របទៅនឹងគោលនយោបាយរបស់ប្រធានាធិបតី លោក ប្រាបូវ៉ូ ស៊ូប៊ីយ៉ានតូ (Prabowo Subianto) ដែលបានធ្វើឱ្យប្រទេសឥណ្ឌូណេស៊ីអាចដើរតួនាទីយ៉ាងសំខាន់នៅក្នុងទីផ្សារអង្ករនៅលើសកលលោក។ លទ្ធផលនេះក៏បង្ហាញពីការប្តេជ្ញាចិត្តរបស់រដ្ឋាភិបាលក្នុងការបញ្ឈប់ការនាំចូលអង្ករ នៅឆ្នាំ២០២៥ ផងដែរ។
រដ្ឋាភិបាលឥណ្ឌូណេស៊ី ក៏បានបង្កើតក្រុមការងារតាមដានតម្លៃស្រូវ ដើម្បីត្រួតពិនិត្យអ្នកផលិត អ្នកចែកចាយ អ្នកលក់ដុំ និងអ្នកលក់រាយអង្ករ នៅទូទាំងប្រទេសឥណ្ឌូណេស៊ីផងដែរ។
កាលពីដើមឆ្នាំ២០២៥នេះ ប្រទេសឥណ្ឌូណេាស៊ី បានបង្កើតក្រុមហ៊ុនកសិកម្មរបស់រដ្ឋុមួយ ក្នុងគ្រោងនឹងវិនិយោគទឹកប្រាក់ចំនួន៤៧៩លានដុល្លារ ដើម្បីកសាងសមត្ថភាពផលិតស្រូវឱ្យបានច្រើន ហើយបានទិញឧបករណ៍កសិកម្មទំនើបៗ និងបន្ថែមម៉ាស៊ីនកិនស្រូវថ្មីៗ។
ក្រុមហ៊ុនរដ្ឋគ្រប់គ្រងនេះត្រូវបានបើកដំណើរការក្នុងខែឧសភា ឆ្នាំ២០២៥ ដោយមានភារកិច្ចបង្កើនទិន្នផលស្រូវ ឱ្យសម្រេចបានតាមផែនការរបស់ប្រធានាធិបតីឥណ្ឌូណេស៊ី ដើម្បីធ្វើឱ្យប្រទេសឥណ្ឌូណេស៊ី មានស្បៀងផ្គត់ផ្គង់គ្រប់គ្រាន់ដោយខ្លួនឯង។
នៅត្រឹមចុងឆ្នាំ២០២៦ ក្រុមហ៊ុននឹងបង្កើតមជ្ឈមណ្ឌលផលិតកម្មស្បៀង ឱ្យបានចំនួន២០កន្លែង នៅទូទាំងប្រទេសឥណ្ឌូណេស៊ី ដែលមជ្ឈមណ្ឌលនីមួយៗបំពាក់ដោយម៉ាស៊ីនសម្ងួតស្រូវសើម រោងម៉ាស៊ីនកិនស្រូវ ម៉ាស៊ីនកិនកែច្នៃចំណីសត្វ និងឃ្លាំងស្តុកស្រូវផងដែរ។
ប្រធានក្រុមហ៊ុនបាននិយាយថា ដើម្បីធ្វើឱ្យបានសម្រេចតាមគោលដៅ ក្រុមហ៊ុននឹងចាប់ដៃគូជាមួយកសិករខ្នាតតូច ដើម្បីជួលដីដាំស្រូវ ឬបង្កើតកសិដ្ឋានផ្ទាល់ខ្លួនតែម្តង ព្រោះក្រុមហ៊ុននឹងទទួលបានដីទំហំជាង២២៥ ០០០ហិកតា ពីក្រសួងកសិកម្ម នៅចុងឆ្នាំ២០២៥នេះ។
លោកប្រធានក្រុមហ៊ុនបានបន្ថែមថា រដ្ឋាភិបាលឥណ្ឌូណេស៊ីនឹងផ្តល់ទុនប្រមាណ៤៧៩លានដុល្លារ ដូច្នេះការវិនិយោគដោយប្រើលុយរដ្ឋ ក្រុមហ៊ុនត្រូវធ្វើឱ្យប្រព័ន្ធគ្រប់គ្រងដំណើរការល្អ និងទទួលបានជោគជ័យ។ ចំណែកក្រុមហ៊ុនសង្ឃឹមថា នឹងអាចបង្កើនសមត្ថភាពផលិតស្រូវរបស់ខ្លួនឱ្យបានចំនួនបួនលានតោនក្នុងមួយឆ្នាំ ខណៈទិន្នផលស្រូវសរុប មានចំនួន៣០,៦លានតោន ក្នុងឆ្នាំ២០២៤។
លោកបន្តថា កសិករនៅអឺរ៉ុប និងនៅអាម៉េរិក មានជីវភាពធូរធារ ដោយសារគ្រួសារមួយអាចគ្រប់គ្រងដីរាប់ពាន់ហិកតា។ ចំណែកក្រុមហ៊ុនរដ្ឋរបស់ឥណ្ឌូណេស៊ី បានទទួលដី និងដើមទុនប្រហែល៤២លានដុល្លារពីរដ្ឋ ហើយគ្រោងស្វែងរកប្រាក់កម្ចីបន្ថែមទៀតពីធនាគារ ដើម្បីសម្រាប់ពង្រីកការដាំដុះ៕
