ដោយ ឡុង សារេត
រាជធានីភ្នំពេញ៖ ដើម្បីពង្រឹងដល់ការនាំចេញផលិតផលស្វាយចន្ទីទៅអឺរ៉ុប, សហព័ន្ធស្វាយចន្ទីកម្ពុជាបានចុះអនុស្សរណៈនៃការយោគយល់គ្នាជាមួយក្រុមហ៊ុន Eurofinsកាលពីថ្ងៃទី២៣ ខែតុលា ឆ្នាំ២០២៥។
លោក អាន ដារ៉ា ប្រធានសហព័ន្ធស្វាយចន្ទីកម្ពុជា បានគូសបញ្ជាក់ថា ការចុះអនុស្សរណៈនៃការយោគយល់គ្នារវាងសហព័ន្ធស្វាយចន្ទីកម្ពុជា ជាមួយក្រុមហ៊ុន Eurofins ថ្ងៃនេះ ក្នុងគោលបំណងធំ គឺដើម្បីជួយពង្រឹងការនាំចេញស្វាយចន្ទីកម្ពុជាទៅសហភាពអឺរ៉ុប។ ព្រោះអឺរ៉ុបបច្ចុប្បន្នមានតម្រូវការនាំចូលគ្រាប់ស្វាយចន្ទីកែច្នៃសម្រេចច្រើនជាងគេនៅលើពិភពលោក។
បើតាមប្រធានសហព័ន្ធស្វាយចន្ទីកម្ពុជា, ការនាំចូលស្វាយចន្ទីទៅសហភាពអឺរ៉ុបនេះ គឺតឹងតែងខ្លាំងទាក់ទងគុណភាពស្វាយចន្ទី, ទាក់ទងសុវត្ថិភាពចំណីអាហារ, បរិមាណស្វាយចន្ទីត្រូវផ្តល់ឱ្យអឺរ៉ុបជាប្រចាំ និងការធ្វើតេស្តស្វែងរកជាតិពុលនៅក្នុងគ្រាប់ស្វាយចន្ទីជាដើម។
លោក អាន ដារ៉ា គូសបញ្ជាក់បន្ថែមទៀតថា “ការចុះ MOUជាមួយ Eurofinsថ្ងៃនេះ គឺមានសារសំខាន់ណាស់នៅពេលយើងនាំគ្រាប់ស្វាយចន្ទីទៅក្រៅប្រទេស ដាច់ខាតត្រូវធ្វើតេស្តរកជាតិពុលនៅក្នុងគ្រាប់ស្វាយចន្ទីមុនពេលធ្វើការនាំចេញ។ គាប់ជូនខ្លាចសហគមន៍អឺរ៉ុបរកឃើញជាតិពុល គេនិងបញ្ជូនទំនិញត្រឡប់មកវិញ។ បើមានបញ្ហាបែបនេះយើងនឹងខាតបង់ច្រើន ដូច្នេះហើយទើបសហព័ន្ធស្វាយចន្ទីកម្ពុជា ចុះអនុស្សរណៈជាមួយ EUrofin ដើម្បីសុំឱ្យគាត់ធ្វើយ៉ាងណាជួយធ្វើតេស្តទាក់ទងស្វាយចន្ទី ឱ្យទៅក្រុមហ៊ុន ដែលធ្វើការកែច្នៃចន្ទីទាំងនៅក្នុងស្រុក មុនធ្វើការនាំចេញ”។
ក្នុងវិស័យស្វាយចន្ទីបច្ចុប្បន្ន អ្វីដែលជាបញ្ហាសម្រាប់កសិករ សហគ្រាសកែច្នៃ គឺក្រុមអ្នកផលិតមិនមានទុនបង្វិលសម្រាប់ប្រមូលទិញគ្រាប់ស្វាយចន្ទីពីកសិករស្តុកទុក។
ទាក់ទងនិងទីផ្សារស្វាយចន្ទីកម្ពុជានៅក្រៅប្រទេស បើយោងតាមឯកឧត្តម សំហេង បូរ៉ា រដ្ឋលេខាធិការក្រសួងពាណិជ្ជកម្ម មានប្រសាសន៍ថា មកដល់សព្វថ្ងៃនេះគ្រាប់ស្វាយចន្ទីកម្ពុជាមិនថាមាននៅទីផ្សារនៅអឺរ៉ុបទេ ស្វាយចន្ទីកម្ពុជាបាននាំចេញទៅដល់ទីផ្សារអូស្ត្រាលី, ទីផ្សារចិន ទីផ្សារជប៉ុន ។
ឯកឧត្តមមានប្រសាសន៍ថា នៅតាមទីផ្សារក្នុងប្រទេសនីមួយៗ សុទ្ធតែតម្រូវការស្តង់ដារខ្ពស់ប្រហាក់ប្រហែលគ្នា។ អឺរ៉ុបជាទីផ្សារធំមួយ ដែលយើងចង់ចាប់យក ដោយសារការទាញយកផលចំណេញសម្រាប់អ្នកនាំចេញ អតិថិជនបានច្រើន៕
