ម៉ានីល៖ ប្រទេសហ្វីលីពីនកំពុងងាកទៅរកកោះតៃវ៉ាន់ ដែលជាទីផ្សារកំពុងតែរីកធំសម្រាប់ការនាំចេញកសិផលហ្វីលីពីនក្នុងគោលបំណងដើម្បីធ្វើពិពិធកម្មដៃគូពាណិជ្ជកម្ម និងបន្ធូរបន្ថយសម្ពាធពីភាពតានតឹងពិភពលោក។
នៅក្នុងសេចក្តីថ្លែងការណ៍មួយកាលពីថ្ងៃទី៩ ខែកញ្ញា ឆ្នាំ២០២៥ ក្រសួងកសិកម្ម បាននិយាយថា ប្រទេសហ្វីលីពីន បានចូលរួមក្នុងកម្មវិធី «សប្តាហ៍កសិកម្មឆ្លាតរបស់តៃវ៉ាន់ (Taiwan Smart Agri-Week 2025) ដើម្បីបង្ហាញបន្ថែមនូងផលិតផលកសិកម្មរបស់ហ្វីលីពីន និងចាប់យកឱកាសនាំចេញកាន់តែទូលំទូលាយ។
ជំនួយការរដ្ឋមន្ត្រីក្រសួងកសិកម្មហ្វីលីពីន បាននិយាយថា ការចូលរួមក្នុងព្រឹត្តិការណ៍នេះ គឺឆ្លុះបញ្ចាំងពីចក្ខុវិស័យរបស់ប្រធានាធិបតីហ្វីលីពីន លោក ហ្វឺឌីណេនដ៍ ម៉ាកូស (Ferdinand Marcos Jr.) ដែលបានគូសបញ្ជាក់នៅក្នុងសេចក្តីថ្លែងការណ៍ ឆ្នាំ២០២៥ ដើម្បីពង្រីកឧស្សាហកម្មសំខាន់ៗរបស់ខ្លួន មានដូចជាវិស័យកសិកម្ម និងកសិពាណិជ្ជកម្មជាដើម។
ពិព័រណ៍ពាណិជ្ជកម្ម ដែលធ្វើឡើងចាប់ពីថ្ងៃទី៣ ដល់ថ្ងៃទី៥ ខែកញ្ញា ឆ្នាំ២០២៥ នៅទីក្រុងតៃប៉ិ បានដាក់តាំងបង្ហាញផលិតផលបង្កើតឡើយដោយកសិករវ័យក្មេង សហគ្រាសខ្នាតតូច និងអ្នកនាំចេញ។
ការដាក់តាំងបង្ហាញនៅក្នុងពន្លារបស់ប្រទេសហ្វីលីពីន រួមមានទំនិញដែលមានប្រភពចេញពីផ្លែវ៉ានីឡា កាហ្វេផ្សំ ផ្លែចេក និងផលិតផលធ្វើពីដូង ចំណិតស្វាយ សូកូឡា ត្រីសាឌីនដប និងតែរមៀត។
ក្រុមហ៊ុនដឹកជញ្ជូនក៏បានបង្ហាញពីតួនាទីរបស់ខ្លួនក្នុងការធានារាល់ការដឹកជញ្ជូនទំនិញទៅកាន់កោះតៃវ៉ាន់ប្រកបដោយប្រសិទ្ធភាពផងដែរ។
លោកស្រីប្រធានការិយាល័យសេដ្ឋកិច្ច និងវប្បធម៌ប្រចាំទីក្រុងម៉ានីល បានពណ៌នាកោះតៃវ៉ាន់ គឺជាដៃគូយុទ្ធសាស្ត្ររបស់ហ្វីលីពីន។
លោកស្រីបានមានប្រសាសន៍ទៀតថា «នៅពេលប្រទេសហ្វីលីពីនបន្តធ្វើទំនើបកម្ម និងផ្លាស់ប្តូរវិស័យកសិកម្មរបស់ខ្លួន យើងសម្លឹងមើលទៅកោះតៃវ៉ាន់ជាដៃគូដ៏មានតម្លៃ។ ប្រទេសរបស់យើងចែករំលែកការយល់ដឹងរួមគ្នាថា កសិកម្មមិនមែនគ្រាន់តែជាការផលិតស្បៀងអាហារប៉ុណ្ណោះទេ ប៉ុន្តែជាសសរស្តម្ភដ៏សំខាន់នៃភាពធន់របស់សេដ្ឋកិច្ច សមធម៌សង្គម និងសន្តិសុខជាតិ»។
លើសពីការតាំងពិព័រណ៍ផលិតផលកសិកម្មនេះ ក្រសួងកសិកម្ម ក្រសួងពាណិជ្ជកម្ម និងឧស្សាហកម្ម និងមជ្ឈមណ្ឌលពាណិជ្ជកម្ម និងវិនិយោគហ្វីលីពីន-កោះតៃប៉ិ បានសហការគ្នារៀបចំវេទិកាវិនិយោគហ្វីលីពីន ដែលបានពិភាក្សាអំពីឱកាសអាជីវកម្មកសិផល និងបានលើកឡើងពីផែនទីបង្ហាញផ្លូវដឹកជញ្ជូនរបស់ហ្វីលីពីនផងដែរ។
តំណាងពាណិជ្ជកម្មហ្វីលីពីនប្រចាំកោះតៃវ៉ាន់ បាននិយាយថា «កោះតៃវ៉ាន់ គឺជាដៃគូដ៏ជិតស្និទ្ធបំផុតមួយរបស់ហ្វីលីពីនក្នុងវិស័យកសិកម្ម។ តាមរយៈពិព័រណ៍កសិផលឈ្មោះថា សប្តាហ៍កសិកម្មឆ្លាតវៃ យើងកំពុងភ្ជាប់ភ្ជាប់កសិករ និងកសិសហគ្រឹឹនរបស់យើងជាមួយអ្នកទិញ អ្នកវិនិយោគ និងអ្នកដឹកនាំបច្ចេកវិទ្យារបស់តៃវ៉ាន់»។
លោកបានបន្ថែមថា «នេះគឺនិយាយអំពីការផ្គូផ្គងផលិតផលហ្វីលីពីនលំដាប់ពិភពលោកជាមួយនឹងទីផ្សារដ៏ទំនើប និងបើកទ្វារសម្រាប់ការវិនិយោគកាន់តែស៊ីជម្រៅ និងការសហការគ្នាដើម្បីពង្រីកឧស្សាហកម្មដែលជំរុញការនាំចេញ»។
អ្នកតាំងពិព័រណ៍មកពីប្រទេសហ្វីលីពីនចំនួន១០នាក់ក៏ត្រូវបានផ្តល់ឱកាសឱ្យដាក់បង្ហាញផលិតផលរបស់ខ្លួន និងចូលរួមជាមួយវិនិយោគិន ដែលមានសក្តានុពលផងដែរ៕
