ភ្នំពេញ៖ ប្រធានសហព័ន្ធស្រូវអង្ករកម្ពុជា ឧកញ៉ា ឡាយ ឈុនហួរ បានសម្តែងនូវសុទិដ្ឋិនិយមថា និន្នាការនាំចេញរបស់អង្កររបស់កម្ពុជា ត្រឹម៨ខែឆ្នាំនេះសម្រេចបានជិត៥០ម៉ឺនតោនជាកំណើនមួយដ៏ល្អសម្រាប់លើកកម្ពស់តម្លៃបន្ថែមដល់កសិករនៅទូទាំងប្រទេស ដែលជាអ្នកផលិតស្រូវតែម្តង ។
ឧកញ៉ា ឡាយ ឈុនហួរ បានមានប្រសាសន៍ថា ក្នុងនាមសហព័ន្ធស្រូវអង្ករកម្ពុជា ដែលទើបតែចូលកាន់ដំណែងថ្មីនេះ នឹងជួយប្រជាកសិករ កាត់បន្ថយថ្លៃផលិតកម្ម តាមរយៈការពង្រឹង និងពង្រីកខ្សែច្រវាក់ផ្គត់ផ្គង់ ទីផ្សារនាំចេញ ការកាត់បន្ថយថ្លៃដើមផលិតនៅក្នុងវិស័យកសិកម្ម។
បន្ថែមពីនេះ លោកឧកញ៉ាលើកឡើងថា សហព័ន្ធស្រូវអង្ករកម្ពុជាដាក់ចេញនូវគោលដៅ ដោយជំរុញការនាំចេញអង្ករកម្ពុជាទៅកាន់ទៅផ្សារអន្តរជាតិ ដើម្បីធ្វើយ៉ាងណាឱ្យបានកាន់តែច្រើន សម្រាប់អាណត្តិថ្មីរបស់លោក គឺស្របតាមគោលនយោបាយរបស់ប្រមុខរាជរដ្ឋាភិបាលបានកំណត់១លានតោន។
ក្នុងរយៈពេល៨ខែ នៃឆ្នាំ២០២៥ កម្ពុជាបាននាំចេញអង្ករចំនួន៤៧២ ៨០៣តោន គិតជាទឹកប្រាក់ ចំនួន៣៤៨លានដុល្លារ ខណៈការនាំចេញស្រូវសើមសម្រេចបានចំនួន៤ ៨៤៨ ៨៣៥តោន និងគិតជាទឹកប្រាក់បានប្រមាណ១ ១១៤.២៥លានដុល្លារ។
ចំពោះអង្ករជិត៥០ម៉ឺនតោននេះ ត្រូវបាននាំចេញតាមរយៈក្រុមហ៊ុននាំចេញអង្ករចំនួន៥១ក្រុមហ៊ុន ទៅកាន់គោលដៅចំនួន៦៦ ដែលក្នុងនោះទៅកាន់បណ្តាប្រទេសនៅក្នុងតំបន់អឺរ៉ុបចំនួន២៦ បានបរិមាណអង្ករចំនួន២២ ៦៩១តោន គិតជាទឹកប្រាក់ចំនួន ១៧៦.៣៣ លានដុល្លារ។
ដោយឡែក ការនាំចេញទៅកាន់ប្រទេសចិន និងហុងកុង បានចំនួន១១៦ ៣២០តោន គិតជាទឹកប្រាក់ចំនួន៦៨,៨៦លានដុល្លារ និងនាំចេញទៅកាន់ប្រទេសក្នុងអាស៊ាន ចំនួន៧ប្រទេសបានបរិមាណចំនួន៦២ ១៥៨តោន និងគិតជាទឹកប្រាក់ចំនួន៤៣.៥០លានដុល្លារ។
ជាមួយគ្នានេះដែរ កម្ពុជាក៏បាននាំចេញអង្ករទៅកាន់គោលដៅចំនួន៣២ប្រទេសផ្សេងទៀត រួមមានអាហ្វ្រិក មជ្ឈឹមបូព៌ា អាម៉េរិក កាណាដា អូស្ត្រាលី នូវ៉ែលហ្សេឡង់។ល។ បានចំនួន៦៧ ៤១១តោន គិតជាទឹកប្រាក់ចំនួន ៥៩,៤៨លានដុល្លារ។
ចំពោះប្រភេទអង្ករ ដែលបាននាំចេញមាន អង្ករក្រអូបចំនួន៨៧ភាគរយ ប្រភេទអង្ករសគ្រាប់វែង ៩,៧២ភាគរយ អង្ករចំហ៊ុយមួយភាគេត អង្ករសរីរាង្គចំនួន១,៨៣ភាគរយ និងអង្ករផ្សេងៗចំនួន០,៤៥ភាគរយ។
កន្លងទៅក្រសួងកសិកម្មបានសម្ពោធយុទ្ធសាស្រ្តពង្រីក និងការធ្វើពិពិធកម្មទីផ្សារនាំចេញអង្ករកម្ពុជា ២០២៥-២០៣០ ហើយការដាក់ចេញនូវយុទ្ធសាស្ត្រពង្រីក និងការធ្វើពិពិធកម្មទីផ្សារនាំចេញនេះ នឹងជួយសម្រួលដល់កិច្ចខិតខំប្រឹងប្រែងជំរុញថ្លៃស្រូវរបស់ប្រជាកសិករ តាមរយៈការសម្របសម្រួល ការប្រមូលទិញនៅទីវាល និងដឹកជញ្ជូន។
កម្ពុជាផ្ដោតអាទិភាពលើលក្ខណៈពិសេសនៃពូជស្រូវក្រអូប និងប្រណីត ដើម្បីប្រកួតប្រជែងគុណភាពលើទីផ្សារគោលដៅជាជាងការប្រកួតប្រជែងលើបរិមាណ ដែលនឹងជួយបង្កើនតម្លៃហើយផ្ដល់ផលចំណេញជូនទាំងរោងម៉ាស៊ីននាំចេញ ចំណេញទាំងប្រជាកសិករផ្ទាល់ និងលើកទឹកចិត្តឱ្យរោងម៉ាស៊ីនជឿជាក់ និងផ្ដល់តម្លៃខ្ពស់ដល់ពូជយុទ្ធសាស្ត្ររបស់កម្ពុជា ដើម្បីជួយជំរុញម៉ាកយីហោអង្ករកម្ពុជាទៅប្រកួតប្រជែងនៅលើទីផ្សារអន្តរជាតិ៕
