ម៉ានីល៖ សមាជិកព្រឹទ្ធសភាហ្វីលីពីន លោក ហ្វ្រង់ស៊ីស ប៉ាងហ្គីលីណាន់ (Francis Pangilinan) កាលពីថ្ងៃទី១៨ ខែសីហា ឆ្នាំ២០២៥ បានមានប្រសាសន៍ថា បម្រាមការនាំចូលអង្កររយៈពេល៦០ថ្ងៃ គឺមិនគ្រប់គ្រាន់ដើម្បីបញ្ឈប់ការពឹងផ្អែករបស់ប្រទេសហ្វីលីពីន លើអង្ករនាំចូលពីបរទេសនោះទេ។
សមាជិកព្រឹទ្ធសភារូបនេះ បាននិយាយថា ការហាមឃាត់នាំអង្កររយៈពេល៦០ថ្ងៃ ដែលត្រូវបានប្រកាសដោយរដ្ឋាភិបាលហ្វីលីពីន នឹងជួយការពារផលប្រយោជន៍របស់កសិករហ្វីលីពីនពីការធ្លាក់ចុះតម្លៃស្រូវ នៅក្នុងរដូវប្រមូលផលខាងមុខនេះ។
លោកបានមានប្រសាសន៍ដូច្នេះនៅក្នុងសេចក្តីថ្លែងការណ៍មួយថា «នេះជាវិធានការល្អដើម្បីបញ្ឈប់គម្លាតតម្លៃអង្ករក្នុងស្រុក ប៉ុន្តែវាមិនគ្រប់គ្រាន់ទេ។ ហេតុអ្វីបានជាយើងផ្អាកការនាំចូល? ព្រោះកសិករហ្វីលីពីននឹងប្រមូលផលរួច នៅក្នុងខែតុលា វិច្ឆិកា និងខែធ្នូ»។
លោក ហ្វ្រង់ស៊ីស ប៉ាងហ្គីលីណាន់ បានមានប្រសាសន៍ទៀងថា លោកនឹងជំរុញឱ្យមានការបង្កើនថវិកាឱ្យបានចំនួន១០០ពាន់លានដុល្លារ សម្រាប់ក្រសួងកសិកម្មហ្វីលីពីន ដើម្បីពង្រឹងវិស័យកសកម្មក្នុងរយៈពេលប្រាំមួយឆ្នាំខាងមុខទៀត ដោយលោកចង្អុលបង្ហាញពីគម្លាតដ៏ធំរវាងការចំណាយផ្នែកកសិកម្មរបស់ហ្វីលីពីន និងការចំណាយប្រទេសជិតខាង។
លោកបានលើកជាឧទាហរណ៍ថា កោះតៃវ៉ាន់ចំណាយបថវិកាចំនួន៦០០ពាន់លានដុល្លារក្នុងមួយឆ្នាំលើវិស័យកសិកម្ម សម្រាប់ជួយប្រជាជនចំនួន២៣លាននាក់ របស់កោះតៃវ៉ាន់ ចំណែកប្រទេសហ្វីលីពីនចំណាយត្រឹមតែ៤០០០លានដុល្លារប៉ុណ្ណោះ ក្នុងមួយឆ្នាំសម្រាប់ជួយប្រជាជនហ្វីលីពីនចំនួន១២០លាននាក់។
លោក ហ្វ្រង់ស៊ីស ប៉ាងហ្គីលីណាន់ បានបន្តទៀតថា ប្រទេសថៃក៏បានចំណាយច្រើនជាងហ្វីលីពីណដង លើវិស័យកសិកម្មសម្រាប់ជួយប្រជាជនថៃចំនួន៧០ លាននាក់ ខណៈប្រទេសវៀតណាមចំណាយលើសហ្វីលីពីបីដងសម្រាប់ជួយប្រជាជនចំនួន៩០លាននាក់។
ក្រសួងសេដ្ឋកិច្ច ផែនការ និងអភិវឌ្ឍន៍ហ្វីលីពីន បានប្រកាសផ្អាកការនាំចូលអង្ករពីបរទេសរយៈពេល៦០ថ្ងៃ តាមបទបញ្ជារបស់លោកប្រធានាធិបតី ដោយលើកឡើងពីការផ្គត់ផ្គង់ក្នុងប្រទេសមានបរិមាណគ្រប់គ្រាន់សមល្មម និងដល់រដូវមូលផលស្រូវក្នុងប្រទេសហ្វីលីពីនផងដែរ។
រដ្ឋមន្ត្រីក្រសួងសេដ្ឋកិច្ច ផែនការ និងអភិវឌ្ឍន៍ បាននិយាយថា ការផ្អាកនេះកើតឡើងចំពេលស្តុកស្រូវនៅមានគ្រប់គ្រាន់ ហើយតម្លៃស្រូវនៅលើពិភពលោកក៏កំពុងធ្លាក់ចុះផងដែរ។
ការផ្អាករយៈពេល៦០ថ្ងៃលើការនាំចូលអង្ករនឹងចូលជាធរមាននៅថ្ងៃទី១ ខែកញ្ញាខាងមុខនេះ ដូច្នេះប្រធានាធិបតីហ្វីលីពីន នឹងរឹតបន្តឹងការបញ្ជាទិញអង្ករពីបរទេសជាបណ្តោះអាសន្នសិន ដើម្បីធ្វើឱ្យតម្លៃអង្ករក្នុងស្រុកមានស្ថេរភាព។
ក្រសួងកសិកម្មហ្វីលីពីនបានរំពឹងទុលថា ការប្រមូលផលស្រូវនឹងទទួលបានទិន្នផលខ្ពស់ ពីខែកញ្ញា ដល់ខែតុលា ឆ្នាំ២០២៥នេះ ដោយសារមិនសូវរងការខូចខាតពីខ្យល់ព្យុះទីហ្វុងនៅឆ្នាំនេះ។
ទោះជាយ៉ាងណាក៏ដោយ លោកបានជំរុញឱ្យមានការប្រុងប្រយ័ត្ន ដោយព្រមានថា តម្លៃអង្ករលើពិភពលោកអាចប្រែប្រួលភ្លាមៗ ហើយគោលនយោបាយត្រូវតែមានភាពបត់បែន ដើម្បីសម្របខ្លួនទៅនឹងការផ្លាស់ប្តូរនៅក្នុងទីផ្សារអង្ករលើពិភពលោក និងនៅក្នុងស្រុក។
នៅក្នុងសេចក្តីថ្លែងការណ៍មួយ កាលពីដើមសប្តាហ៍នេះ ក្រសួងកសិកម្មហ្វីលីពីន បានពិពណ៌នាការសម្រេចចិត្តរបស់លោកប្រធានាធិបតី ក្នុងការបញ្ឈប់ការនាំចូលអង្ករ និងពន្យារពេលដំឡើងពន្ធ គឺជាការឆ្លើយតបយ៉ាងត្រឹមត្រូវចំពោះបញ្ហាប្រឈមនាពេលបច្ចុប្បន្ន ដែលកសិករហ្វីលីពីនកំពុងជួបប្រទះ។
ប្រទេសហ្វីលីពីន បានរក្សាអត្រាពន្ធ១៥ភាគរយលើអង្ករនាំចូលអាចនឹងត្រូវរក្សាទុកឱ្យនៅដដែលរហូតដល់ខែកញ្ញា ដើម្បីការពារការឡើងថ្លៃអង្ករនៅតាមបណ្តាហាងលក់រាយក្នុងប្រទេស ដោយសារតម្លៃអង្ករនៅលើពិភពលោកកើនឡើងបន្តិចម្តងៗ បន្ទាប់ពីរដូវប្រមូលផល។
បើយោងតាមអង្គការស្បៀងអាហារ និងកសិកម្មរបស់អង្គការសហប្រជាជាតិ បានឱ្យដឹងថា តម្លៃអង្ករវៀតណាមបានឡើងថ្លៃបន្តិច កាលពីក្នុងខែមេសា ឆ្នាំ២០២៥ ខណៈការប្រមូលផលស្រូវឆ្នាំនេះជិតរួចរាល់។
នៅក្នុងឆ្នាំ២០២៥នេះ អង្ករបាក់ប្រាំភាគរយរបស់វៀតណាម លក់នៅក្នុងខែមេសា ឡើងថ្លៃដល់៣៩៦,៨ដុល្លារក្នុងមួយតោន បើធៀបនឹងតម្លៃ៣៨៦,៥ដុល្លារក្នុងមួយតោន លក់នៅក្នុងខែមីនា។
ចំណែកជំនួយការរដ្ឋមន្ត្រី និងជាអ្នកនាំពាក្យក្រសួងកសិកម្ម បាននិយាយថា ប្រសិនបើដំឡើងអត្រាពន្ធអង្ករនាំចូលនៅពេលនេះ ខណៈពេលការផ្គត់ផ្គង់មិនទាន់គ្រប់គ្រាន់ អាចធ្វើឲ្យតម្លៃលក់រាយក្នុងស្រុកកើនឡើងជាក់ជាមិនខាន។
ការព្យាយាមទម្លាក់អត្រាពន្ធនាំចូលអង្ករ គឺក្នុងគោលបំណងគ្រប់គ្រងអតិផរណាស្បៀងអាហារ ជាពិសេសការកើនឡើងនៃតម្លៃអង្ករលក់រាយ ដូចនៅក្នុងឆ្នាំ២០២៣ និង២០២៤៕
