ការ៉ាជី៖ នៅចន្លោះខែឧសភា និងខែកក្កដា ឆ្នាំ២០២៥នេះ បរិមាណនាំចេញបន្លែរបស់ប្រទេសប៉ាគីស្ថានបានកើនឡើងដល់១,៣៩៥លានតោន ដែលមានតម្លៃជាទឹកប្រាក់ចំនួន៣៥៣លានដុល្លារ កើនឡើងលើសពីតួលេខ ឆ្នាំ២០២៣ ដែលមានបរិមាណ១,៣៣៦លានតោន មានតម្លៃទឹកប្រាក់ចំនួន៣០០លានដុល្លារ។
ទោះបីជាយ៉ាងណាក៏ដោយ តម្លៃក្នុងបន្លែមួយតោន បានធ្លាក់ចុះពី៣៤៣ដុល្លារ មកនៅត្រឹម២៥៣ដុល្លារ បើប្រៀបធៀបទៅនឹងរយៈពេលដូចគ្នា ដោយធ្វើឱ្យធ្លាក់ចុះនូវប្រាក់ចំណូលសរុបជារូបិយប័ណ្ណបរទេស។
យោងតាមគេហទំព័របន្លៃ និងផ្លែឈើ បានឱ្យដឹងថា រវាងឆ្នាំ២០១៨ និងឆ្នាំ២០២៥ ការនាំចេញបន្លែរបស់ប្រទេសប៉ាគីស្ថាន បានចំណូលចាប់ពី២៣៤លានដុល្លារ ទៅ៤៣០លានដុល្លារ ក្នុងបរិមាណពី៨២៥ ២៥៧តោន ទៅ១,៣៣៦លានតោន។
កសិផលនាំចេញសំខាន់ៗ រួមមានដំឡូងបារាំង និងខ្ទឹមបារាំង ដោយដឹកជញ្ជូនតាមសមុទ្រ និងផ្លូវគោក ចំណែកបន្លែស្រស់ មានដូចជាការ៉ុត ម្ទេសបៃតង និងទំនិញកសិផលផ្សេងទៀត ត្រូវបានដឹកជញ្ជូនតាមផ្លូវអាកាស។ ការប្រែប្រួលតម្លៃអ្នកប្រើប្រាស់នៅក្នុងចំណោមម្ហូបអាហារចម្បងៗបានកើតឡើងដោយសារតែការប្រែប្រួលនៃកម្រិតផលិតកម្ម និងការនាំចេញ រួមជាមួយនឹងផលប៉ះពាល់តម្លៃរបស់ខ្ទឹមបារាំងនៅលើទីផ្សារអន្តរជាតិ។ ចំណែកការនាំចូលខ្ទឹមបារាំងវិញ ជាធម្មតាតែងតែកើតឡើង នៅពេលផលិតកម្មក្នុងប្រទេសប៉ាគីស្ថាន ធ្លាក់ចុះដោយសារពេលខ្លះទីផ្សារក្នុងស្រុករងផលប៉ះពាល់ពីឈ្មួញកណ្តាលទិញស្តុកទុកច្រើនពេក។
យោងតាមសមាគមអ្នកនាំចេញបន្លែ និងផ្លែឈើ និងសមាគមអ្នកនាំចូល និងពាណិជ្ជករ ប៉ាគីស្ថាន បានឱ្យដឹងថា ក្នុងចំណោមបរិមាណនាំចេញជិត១,៤លានតោន នៅចន្លោះខែឧសភា និងខែកក្កដា ឆ្នាំ២០២៥នេះ បរិមាណដំឡូងបារាំង មានជាងមួយលានតោន បន្ទាប់មកខ្ទឹមបារាំងមានចំនួនពីមួយសែនទៅពីរសែនតោន និងបន្លែបៃតងពីចំនួនបួនម៉ឺន ទៅប្រាំម៉ឺនតោន។
សមាគមដដែលនេះបានកត់សម្គាល់ថា «យើងមិនអាចស្វែងរកទីផ្សារថ្មីសម្រាប់បន្លែបានទេ ប៉ុន្តែតាមរដ្ឋឯករាជ្យ អតីតសមាជិកសហភាពសូវៀត បានលេចចេញជាទីផ្សារដ៏មានសក្តានុពលបំផុតមួយសម្រាប់ដំឡូងបារាំងរបស់ប្រទេសប៉ាគីស្ថាន ដែលការដឹកជញ្ជូនត្រូវបានធ្វើឡើងតាមផ្លូវគោក។
រីឯបញ្ហារឹតត្បិតផ្នែកភូតគាមអនាម័យមកលើកសិផល ក៏បង្កផលវិបាកដល់ការពង្រីកទៅកាន់ទីផ្សារផ្សេងទៀត ដូចជាប្រទេសឥណ្ឌូណេស៊ី ប្រទេសថៃ និងប្រទេសដទៃទៀត ដែលទាមទារឱ្យមានការចូលរួមពីរដ្ឋាភិបាលទាក់ទងនឹងឧបសគ្គទាំងនេះ។
ទិន្នន័យផលិតកម្ម ស្តីពីអង្កេតសេដ្ឋកិច្ច ប៉ាគីស្ថាន នៅឆ្នាំ២០២៥ បានបង្ហាញថា ផលិតកម្មខ្ទឹមបារាំងបានកើនឡើងពី២,៣លានតោន ក្នុងឆ្នាំ២០២៤ កើនដល់២,៦៧លានតោន ក្នុងឆ្នាំ២០២៥ ចំណែកផលិតកម្មដំឡូងបារាំង កើនឡើងពី៨,៤លានតោន ដល់៩,៤លានតោន ក្នុងរយៈពេលដូចគ្នា។ ផលិតកម្ម ដែលបានកែលម្អឡើងវិញ ជាទូទៅបានរក្សានូវស្ថិរភាពតម្លៃក្នុងស្រុក ដោយតម្លៃជាមធ្យមសម្រាប់ដំឡូងបារាំងធ្លាក់ពី០,១៣ មកនៅត្រឹម០,០៩ដុល្លារ និងខ្ទឹមបារាំង ធ្លាក់ពី០,២៧ មកត្រឹម០,២០ដុល្លារ ក្នុងមួយគីឡូក្រាម។
សមាគមបានផ្តល់យោបល់ឱ្យបង្កើនផលិតកម្មដំឡូងបារាំង ដើម្បីជំរុញការនាំចេញទៅកាន់ប្រទេសអតីតសហភាពសូវៀត ឱ្យមានបរិមាណប្រហាក់ប្រហែលនឹងតម្រូវការនាំចូលស្រូវសាលីមកក្នុងប្រទេសប៉ាគីស្ថាន។ លើសពីនេះ តម្រូវការដំឡូងបារាំង មានការកើនឡើងដោយសារតែមានរោងចក្រផលិតកែច្នៃដំឡូងបារាំងក្រៀម និងកំណើនអ្នកលក់អាហារតាមចិញ្ចើមផ្លូវ ជាពិសេសអ្នកលក់ដំឡូងបំពង។ ការថយចុះនៃការនាំចេញខ្ទឹមបារាំងរបស់ប៉ាគីស្ថាន ក្នុងប៉ុន្មានខែថ្មីៗកន្លងនេះ ក៏ត្រូវបានកត់សម្គាល់ផងដែរ នូវផលប៉ះពាល់ដោយការប្រកួតប្រជែងពីខ្ទឹមបារាំងរបស់ប្រទេសឥណ្ឌា ដែលមានតម្លៃទាបជាង។
អ្នកប្រើប្រាស់នៅក្នុងប្រទេសប៉ាគីស្ថាន បានស៊ាំនឹងការនាំចូលខ្ទឹមបារាំងពីប្រទេសអ៊ីរ៉ង់ និងពីប្រទេសអាហ្វហ្គានីស្ថាន ប៉ុន្តែមានគុណភាពអន់ជាងផលិតផលក្នុងស្រុក។ ការកែលម្អប្រកបដោយប្រសិទ្ធភាពនៃហេដ្ឋារចនាសម្ព័ន្ធផ្លូវថ្នល់ និងការប្រើប្រាស់ទូកុងតឺន័រត្រជាក់ អាចបង្កើនសមត្ថភាពនាំចេញបន្ថែមទៀតផងដែរ៕
