ហាណូយ៖ សមាគមន៍អ្នកនាំចេញអង្កររបស់ថៃ បាននិយាយថា ប្រទេសវៀតណាមបានវ៉ាដាច់ប្រទេសថៃ ដែលធ្លាប់ជាអ្នកនាំចេញអង្ករធំជាងគេទីពីរ របស់ពិភពលោក នៅក្នុងឆមាសទីមួយនៃឆ្នាំ២០២៥នេះ។
សមាគមបានកត់សម្គាល់ថា ចាប់ពីខែមករាដល់ខែមិថុនា ឆ្នាំ២០២៥នេះ ប្រទេសឥណ្ឌាបាននាំចេញអង្ករចំនួន១១,៦៨68 លានតោន កើនឡើងចំនួន៣៦,៥ភាគរយពីមួយឆ្នាំទៅមួយឆ្នាំ តាមពីក្រោយដោយប្រទេសវៀតណាម ដែលបាននាំចេញអង្ករចំនួន៤,៧២លានតោន កើនឡើងចំនួន៣,៦ភាគរយ។
ទន្ទឹមនឹងនេះ ប្រទេសថៃបាននាំចេញះអង្ករចំនួន៣,៧៣លានតោន ធ្លាក់ចុះចំនួន២៧,៣ភាគរយ ខណៈប្រទេសប៉ាគីស្ថាន បាននាំចេញអង្ករចំនួន២,៧៦លានតោន ធ្លាក់ចុះចំនួន២០,២ភាគរយ។ ចំណែកសហរដ្ឋអាម៉េរិក បាននាំចេញអង្ករចំនួន១,៤លានតោន ធ្លាក់ចុះចំនួន២៣,៥ភាគរយ។
យោងតាមក្រសួងកសិកម្ម និងបរិស្ថានវៀតណាម បានឱ្យដឹងថា ប្រទេសវៀតណាមបាននាំចេញអង្ករប្រមាណ៧៥០ ០០០តោនក្នុងខែកក្កដា ឆ្នាំ២០២៥ ជាមួយនឹងប្រាក់ចំណូលចំនួន៣៦៦,១លានដុល្លារ។ តួលេខនេះបាននាំឱ្យការនាំចេញអង្ករសរុបសម្រាប់រយៈពេលប្រាំពីរខែដំបូងនៃឆ្នាំ២០២៥នេះ មានចំនួនរហូតដល់ប្រហែល៥,៥លានតោន ដែលបង្កើតប្រាក់ចំណូលបានចំនួន២,៨១ពាន់លានដុល្លារ គឺកើនឡើងចំនួន៣,១ភាគរយ ប៉ុន្តែតម្លៃបានធ្លាក់ចុះគួរឱ្យកត់សម្គាល់មកត្រឹម១៥,៩ភាគរយ បើប្រៀបធៀបទៅនឹងរយៈពេលដូចគ្នា ក្នុងឆ្នាំ២០២៤។
ការធ្លាក់ចុះនៃប្រាក់ចំណូលត្រូវបានគេសន្មត់ថា ដោយសារការធ្លាក់ចុះតម្លៃនាំចេញជាមធ្យម។ ក្នុងរយៈពេលប្រាំពីរខែដំបូង តម្លៃនាំចេញជាមធ្យមរបស់វៀតណាម បានធ្លាក់ចុះមកនៅត្រឹម៥១៤ដុល្លារក្នុងមួយតោន គឺធ្លាក់ចុះចំនួណ១៨,៤ភាគរយ បើប្រៀបធៀបនឹងឆ្នាំ២០២៤។
ចំណែកប្រទេសហ្វីលីពីននៅតែជាអ្នកទិញអង្ករធំជាងគេបំផុតរបស់វៀតណាម ដែលស្មើនឹង៤២,៦ភាគរយនៃទំហំនាំចេញសរុប ទោះបីជាតម្លៃនាំចេញទៅកាន់ទីផ្សារនេះបានធ្លាក់ចុះចំនួន១៣,៥ភាគរយនៅក្នុងឆមាសទីមួយនៃឆ្នាំ២០២៥នេះ។
ផ្ទុយទៅវិញ ទីផ្សារអាហ្រ្វិកជាច្រើនបានកត់ត្រាកំណើនគួរឲ្យចាប់អារម្មណ៍។ ការនាំចេញអង្ករទៅកាន់ប្រទេសហ្គាណា បានកើនឡើង៥៣,៥ភាគរយ ខណៈការនាំចេញទៅកាន់ប្រទេសកូតឌីវ័រ បានកើនឡើងជិតពីរដង គឺកើនឡើងចំនួន៩៦,៦ភាគរយ។ ក្នុងចំណោមទីផ្សារនាំចេញអង្ករធំៗទាំង១៥ របស់វៀតណាម មានប្រទេសបង់ក្លាដែស បានបង្ហាញពីការកើនឡើងយ៉ាងខ្លាំងនូវតម្លៃអង្ករ ខណៈពេលប្រទេសម៉ាឡេស៊ី បានធ្លាក់ចុះយ៉ាងខ្លាំងបំផុត គឺចំនួន៥៨,៥ភាគរយ។
ទោះបីជាការពង្រឹងជំហររបស់ខ្លួនក្នុងនាមជាអ្នកនាំចេញអង្ករធំជាងគេទីពីររបស់ពិភពលោកក៏ដោយ ក៏ប្រទេសវៀតណាមប្រឈមនឹងសម្ពាធកាន់តែខ្លាំងឡើងពីការធ្លាក់ចុះតម្លៃជាសកល រួមទាំងប្រាក់បញ្ចូលចំណូលពីការនាំចេញ និងប្រាក់ចំណេញសុទ្ធនៅទូទាំងវិស័យអង្ករ។
ប្រធានសមាគមស្បៀងអាហារវៀតណាម បានទទួលស្គាល់ថា គម្លាតរវាងប្រទេសវៀតណាម និងប្រទេសថៃ នៅតូចចង្អៀត ប៉ុន្តែលទ្ធផលបានឆ្លុះបញ្ចាំងពីការប្រកួតប្រជែងរបស់អង្ករវៀតណាម ដែលរក្សាបាននូវកំណើនចាប់តាំងពីដើមឆ្នាំ២០២៥េហូតមក។
លោកបានសង្កេតឃើញថា ទោះបីជាទីផ្សារអង្ករពិភពលោកកំពុងជួបប្រទះនឹងការធ្លាក់ចុះតម្លៃ និងអ្នកនាំចេញជាច្រើនកំពុងបាត់បង់ដីក៏ដោយ ក៏គ្រាប់ធញ្ញជាតិវៀតណាមនៅតែមានតម្រូវការនៅក្នុងទីផ្សារសំខាន់ៗដូចជាហ្វីលីពីន អាហ្រ្វិក និងចិន។
លោកបានលើកឡើងពីស្ថិតិដែលបង្ហាញថា តម្លៃនាំចេញអង្កររបស់វៀតណាមក្នុងរយៈពេលប្រាំមួយខែកន្លងមកនេះ ជាមធ្យមមានតម្លៃ៥១៧ដុល្លារក្នុងមួយតោន ដែលខ្ពស់ជាងតម្លៃមធ្យមប្រហែល៤០០ដុល្លារ ក្នុងមួយតោន នាពេលកន្លងមក៕
