វៀងចន្ទន៍៖ ក្រសួងឧស្សាហកម្ម និងពាណិជ្ជកម្មឡាវ និងវៀតណាម បានរួមគ្នារៀបចំពិព័រណ៍ពាណិជ្ជកម្ម ឡាវ -វៀតណាម ឆ្នាំ២០២៥ នៅទីក្រុងវៀងចន្ទន៍ នាថ្ងៃទី១៧ ខែកក្កដា ឆ្នាំ២០២៥នេះ ដើម្បីពង្រឹងកិច្ចសហប្រតិបត្តិការសេដ្ឋកិច្ច និងវិបុលភាពរួមគ្នារបស់ប្រទេសទាំងពីរ។
ថ្លែងក្នុងពិធីនេះ រដ្ឋមន្ត្រីក្រសួងឧស្សាហកម្ម និងពាណិជ្ជកម្មឡាវ លោក ម៉ាឡៃធុង កុំម៉ាសិត (Malaythong Kommasith) បានមានប្រសាសន៍ថា ព្រឹត្តិការណ៍ពិព័រណ៍នៅពេលនេះ គឺជាលើកទី១៥ ដែលបានក្លាយជាពិព័រណ៍ពាណិជ្ជកម្មថ្នាក់ជាតិរវាងប្រទេសឡាវ និងវៀតណាម ដែលរួមចំណែកដល់ការពង្រឹងកិច្ចសហប្រតិបត្តិការលើគ្រប់វិស័យរវាងរដ្ឋាភិបាល និងប្រជាជននៃប្រទេសទាំងពីរ។
លោកបានបន្ថែមថា ពិព័រណ៍នេះបានដើរតួនាទីយ៉ាងសំខាន់ក្នុងការលើកកម្ពស់ពាណិជ្ជកម្ម វិនិយោគ និងទេសចរណ៍ ព្រមទាំងជួយដល់ការអភិវឌ្ឍសេដ្ឋកិច្ចសង្គមនៃប្រទេសទាំងពីរ។
លោករដ្ឋមន្ត្រីបានកោតសរសើរចំពោះការចាប់អារម្មណ៍យ៉ាងខ្លាំង និងការចូលរួមយ៉ាងសកម្មរបស់សហគ្រាសឡវ និងវៀតណាម នៅក្នុងពិព័រណ៍ឆ្នាំ២០២៥នេះ ដែលឆ្លុះបញ្ចាំងពីទំហំនៃចំនួនស្តង់តាំងពិព័រណ៍ និងភាពសម្បូរបែបនៃផលិតផលដាក់តាំងបង្ហាញ។
លោកបានសម្តែងការជឿជាក់ថា ព្រឹត្តិការណ៍នេះនឹងជំរុញពាណិជ្ជកម្មទ្វេភាគីបន្ថែមទៀត និងជួយឱ្យសម្រេចបាននូវគោលដៅសហប្រតិបត្តិការ ដែលបានកំណត់ដោយមេដឹកនាំនៃប្រទេសទាំងពីរ។
យោងតាមលោក ម៉ាឡៃធុង កុំមា៉សិត ពាណិជ្ជកម្មទ្វេភាគីឈានដល់២,២៥ពាន់លានដុល្លារ ក្នុងឆ្នាំ ២០២៥ កើនឡើងចំនួន៣៨,២ភាគរយធៀបនឹងឆ្នាំមុន។ ជាពិសេស ចំណូលពាណិជ្ជកម្មសរុបក្នុងរយៈពេលប្រាំខែដំបូងនៃឆ្នាំ២០២៥បានកើនឡើងដល់១,៦ពាន់លានដុល្លារ ដែលកើនឡើងចំនួន១០០,៤ភាគរយពីមួយឆ្នាំទៅមួយឆ្នាំ។
ពិព័រណ៍ពាណិជ្ជកម្មឡាវ -វៀតណាម ឆ្នាំ២០២៥ ត្រូវបានប្រព្រឹត្តទៅចាប់ពីថ្ងៃទី១៧ ដល់ថ្ងៃទី២១ ខែកក្កដា ដោយមានស្តង់តាំងពិព័រណ៍ចំនួន២៥០ស្តង់ ដែលក្នុងនោះមាន១២០ស្តង់ ជារបស់សហគ្រាសវៀតណាមជិត៨០ក្រុមហ៊ុន។ ក្រុមហ៊ុនទាំងនេះតំណាងឱ្យវិស័យចម្រុះ មានដូចជា ឱសថ និងបរិក្ខាពេទ្យ កសិរុក្ខាប្រមាញ់ នេសាទ និងអាហារកែច្នៃ ម៉ូដ និងវាយនភណ្ឌ សិប្បកម្ម គ្រឿងសង្ហារឹម និងទំនិញប្រើប្រាស់។
ផលិតផលដាក់តាំងបង្ហាញមានភាពខុសគ្នា ក្នុងការរចនា ប្រភេទ និងគុណភាព ដើម្បីបំពេញតាមតម្រូវការរបស់អតិថិជនទាំងនៅក្នុងទីផ្សារឡាវ និងទីផ្សារវៀតណាម។
នាយករងក្រុមហ៊ុនសំបុកត្រចៀកកាំ នៅក្នុងទីក្រុងដាណាង ប្រទេសវៀតណាម បាននិយាយថា នេះជាលើកទីបីរបស់ក្រុមហ៊ុនលោកស្រី ដែលបានចូលរួមក្នុងពិព័រណ៍ពាណិជ្ជកម្មនេះ ក្នុងគោលបំណងនាំយកផលិតផលរបស់ខ្លួនឱ្យដល់ដៃអ្នកប្រើប្រាស់ឡាវ និងសហគមន៍អន្តរជាតិ។
ស្រដៀងគ្នានេះដែរ តំណាងអាជីវករឡាវម្នាក់ បាននិយាយដោយសង្ឃឹមថា ពិព័រណ៍ពាណិជ្ជកម្ម នៅឆ្នាំ២០២៥នេះ អាចជួយផ្សព្វផ្សាយពីជំនាញក្នុងស្រុក និងផលិតផលរបស់ឡាវ ដល់អតិថិជនក្នុងស្រុក និងក្រៅប្រទេស។
ចំណែកអគ្គនាយករងនៃក្រុមហ៊ុនទូរគមនាគមន៍វៀតណាម ដែលជាក្រុមហ៊ុនបណ្តាក់ទុនរួមគ្នារវាងក្រុមហ៊ុនវៀតណាម និងទូរគមនាគមន៍ឡវ បានលើកឡើងពីតួនាទីរបស់ខ្លួន ដែលជាអ្នកផ្តល់សេវាទូរគមនាគមន៍ដ៏ធំបំផុតរបស់ប្រទេសឡាវ មានសមត្ថភាពគ្របដណ្តប់ទូទាំងប្រទេស។
លោកបាននិយាយថា ពិព័រណ៍ពាណិជ្ជកម្មនេះ គឺជាឱកាសល្អមួយដើម្បីបង្ហាញពីភាពជាអ្នកដឹកនាំរបស់ខ្លួនក្នុងវិស័យហេដ្ឋារចនាសម្ព័ន្ធ និងបញ្ជាក់ឡើងវិញនូវការប្តេជ្ញាចិត្តរបស់ខ្លួនក្នុងការបម្រើប្រជាជន ធុរកិច្ច និងរដ្ឋាភិបាលឡាវ។
បន្ថែមពីលើការលើកកម្ពស់មុខមាត់ជាតិ និងម៉ាកយីហោរបស់ខ្លួន គណៈប្រតិភូធុរកិច្ចវៀតណាម ក៏បានស្វះស្វែងពង្រីកទីផ្សាររបស់ខ្លួននៅក្នុងតំបន់ភាគឦសាននៃប្រទេសឡាវ និងប្រទេសថៃ ដើម្បីលើកកម្ពស់សក្តានុពលវិនិយោគ ការផ្ទេរបច្ចេកវិទ្យា និងការបណ្តាក់ទុនរួមគ្នាជាមួយធុរកិច្ចឡាវ។
ពិព័រណ៍ពាណិជ្ជកម្មឡាវ -វៀតណាម ឆ្នាំ២០២៥ គឺជាព្រឹត្តិការណ៍ប្រចាំឆ្នាំដ៏សំខាន់មួយ ក្រោមក្របខណ្ឌកិច្ចសហប្រតិបត្តិការសេដ្ឋកិច្ចទ្វេភាគី ក្នុងគោលបំណងជំរុញទំនាក់ទំនងពាណិជ្ជកម្ម បង្កើនការយោគយល់គ្នា និងសាមគ្គីភាព និងធ្វើឱ្យស៊ីជម្រៅនូវទំនាក់ទំនងមិត្តភាព សាមគ្គីភាព និងកិច្ចសហប្រតិបត្តិការលើគ្រប់វិស័យរវាងប្រទេសទាំងពីរ៕
