ម៉ានីល៖ យោងតាមអង្គការស្បៀងអាហារ និងកសិកម្មរបស់អង្គការសហប្រជាជាតិ បានឱ្យដឹងថា ប្រទេសហ្វីលីពីន អាចតោងជាប់ចំណាត់ថ្នាក់របស់ខ្លួនយ៉ាងប្រផិតប្រផោយបំផុត ជាអ្នកនាំចេញផ្លែចេកធំជាងគេលំដាប់ទី៣ របស់ពិភពលោក ចំពេលមានការប្រកួតប្រជែងកាន់តែខ្លាំង ដោយសារមានអ្នកដាំចេកកាន់តែច្រើននៅទ្វីបអាមេរិកខាងត្បូង។
អង្គការស្បៀងអាហារ និងកសិកម្ម បានចេញផ្សាយនាពេលថ្មីៗនេះនូវរបាយការណ៍ត្រួតពិនិត្យទីផ្សារសកលរបស់ខ្លួន សម្រាប់ឆ្នាំ២០២៤ ដែលក្នុងនោះមានប្រទេសក្វាតេម៉ាឡា មិនអាចវ៉ាដាច់ប្រទេសហ្វីលីពីន ដែលជាប្រទេសនាំចេញចេកធំជាងគេទី៣របស់ពិភពលោក។
កាលពីដើមឆ្នាំ២០២៥នេះ អង្គការស្បៀងអាហារ និងកសិកម្ម បានប៉ាន់ប្រមាណថា ប្រទេសក្វាតេម៉ាឡា អាចនឹងវ៉ាដាច់ប្រទេសហ្វីលីពីន ទាក់ទងនឹងបរិមាណផ្លែចេកដែលបាននាំចេញកាលពីឆ្នាំមុន។
ទោះបីជាយ៉ាងណាក៏ដោយ តាមរយៈតួលេខនាំចេញផ្លែចេកពេញមួយឆ្នាំ បានបង្ហាញថា ប្រទេសហ្វីលីពីន អាចបន្តឈរជើងបាននៅចំណាត់ថ្នាក់៣ ដោយសារបាននាំចេញផ្លែចេកលើសប្រទេសក្វាតេម៉ាឡា ចំនួន១០០ ០០០តោនប៉ុណ្ណោះ។
អង្គការស្បៀងអាហារ និងកសិកម្មរបស់អង្គការសហប្រជាជាតិ បាននិយាយទៀតថា ប្រទេសហ្វីលីពីនបាននាំចេញផ្លែចេកចំនួន២,៣លានតោនកាលពីឆ្នាំ២០២៤ ដោយនាំមុខប្រទេសក្វាតេម៉ាឡាចំនួន២,២លានតោន។
លើសពីនេះ តាមរបាយការណ៍ដដែល បានបង្ហាញថា ចំណែកប្រទេសកូឡុំប៊ី ក៏បាននាំចេញផ្លែចេកចំនួន២,២លានតោនដែរ កាលពីឆ្នាំ២០២៤ ដែលបង្ហាញពីការប្រកួតប្រជែងកាន់តែខ្លាំងក្នុងចំណោមអ្នកផលិត និងអ្នកនាំចេញផ្លែចេករបស់ពិភពលោក។
ក្នងរយៈពេលជាច្រើនឆ្នាំកន្លងមកនេះ ប្រទេសហ្វីលីពីន បាននឹងកំពុងប្រឹងប្រែង ដើម្បីរក្សាចំណាត់ថ្នាក់របស់ខ្លួននៅក្នុងទីផ្សារផ្លែចេករបស់ពិភពលោក ដែលកាលពីឆ្នាំ២០២៣ បានធ្លាក់មកនៅចំណាត់ថ្នាក់លេខ៣ បន្ទាប់ពីប្រទេសក្វាតេម៉ាឡា វ៉ាយកចំណាត់ថ្នាក់លេខ២។
ចំណែកនៅឆ្នាំ២០២៤ ប្រទេសកូស្តារីកា បានឡើងជាប្រទេសនាំចេញផ្លែចេកធំជាងគេទីពីរ របស់ពិភពលោក ក្នុងបរិមាណសរុបប្រហែល២,៤លានតោន។ អេក្វាឌ័រ ស្ថិតនៅជាអ្នកនាំចេញផ្លែចេកចំណាត់ថ្នាក់លេខ១ របស់ពិភពលោក ក្នុងបរិមាណនាំចេញសរុបជិតប្រាំមួយលានតោន។
អង្គការស្បៀងអាហារ និងកសិកម្ម បានបញ្ជាក់ថា ការផលិតចេកនៅក្នុងប្រទេសហ្វីលីពីន នៅតែបន្តរងផលប៉ះពាល់ដោយសត្វល្អិតបំផ្លាញ និងមានជំងឺក្រាស៊ី។ ចំណែកការឡើងនៃភាពតានតឹងផ្នែកភូមិសាស្ត្រនយោបាយនៅក្នុងសមុទ្រចិនខាងត្បូង ក៏បានជះឥទ្ធិពលអាក្រក់ដល់ការនាំចេញផ្លែចេករបស់ប្រទេសហ្វីលីពីនផងដែរ។
សេចក្តីរាយការណ៍របស់សារព័ត៌មានហ្វីលីពីន បានលើកឡើងថា រដ្ឋាភិបាលហ្វីលីពីន និងភាគីពាក់ព័ន្ធក្នុងឧស្សាហកម្មចេក កំពុងត្រៀមតាក់តែងផែនការមួយ ដែលនឹងមិនត្រឹមតែអាចស្តារវិស័យដំណាំចេកដែលកំពុងមានជម្ងឺឱ្យមានភាពរស់រវើកឡើងវិញប៉ុណ្ណោះទេ ប៉ុន្តែថែមទាំងជួយសង្គ្រោះចំណែកទីផ្សារក្រៅប្រទេស ដែលកំពុងដាំក្បាលចុះផងដែរ។
យោងតាមទិន្នន័យពាណិជ្ជកម្មអន្តរជាតិ បានបង្ហាញថា ប្រទេសហ្វីលីពីន បាននិងកំពុងបាត់បង់ចំណែកទីផ្សារផ្លែចេកយ៉ាងច្រើនលើទីផ្សារនៅភូមិភាគអាស៊ី ដោយមិនមែនដោយសារតែមានអ្នកប្រកួតប្រជែងនៅទ្វីបអាមេរិកខាងត្បូងប៉ុណ្ណោះទេ ប៉ុន្តែថែមទាំងមានការប្រកួតប្រជែងពីប្រទេសជិតខាងផងដែរ ដូចជាប្រទេសវៀតណាម ចំណាត់ថ្នាក់រយៈពេល២០ឆ្នាំរបស់ហ្វីលីពីន ជាអ្នកផ្គត់ផ្គង់ផ្លែចេកលេខ១ដល់ទីផ្សារក្នុងប្រទេសចិន៕
