ក្រចេះ៖ ក្រូចថ្លុងកោះទ្រង់ បន្ទាប់បានក្លាយជាម៉ាកសម្គាល់ភូមិសាស្ត្រទំនិញនៅខែមិថុនា ឆ្នាំ២០១៨រួចមក ប្រជាកសិកររស់នៅលើកោះមួយនេះ បានងាកមកផ្តោតការយកចិត្តទុកដាក់លើការថែទាំ និងដាំដុះបន្ថែម មានកាន់តែច្រើននៅក្នុងគ្រួសារ រហូតមកដល់ឆ្នាំ២០២៥ បានក្លាយជាមុខរបរស្នូលកាន់តែសំខាន់សម្រាប់កសិករ តាមរយៈការទទួលបានប្រាក់ចំណូលសមរម្យ បើប្រៀបធៀបទៅនិងមុខរបរផ្សេងទៀត នាពេលសព្វថ្ងៃនេះ។
លោក នង ស៊ីណេ ប្រជាកសិកររស់នៅលើកោះទ្រង់បានដាំក្រូចថ្លុងចំនួន៧០ដើម បានឱ្យដឹងថា បន្ទាប់ពីចាប់ផ្តើមដាំក្រូចថ្លុងចំនួន៧០ដើមនៅឆ្នាំ២០១៦ រហូតមកទល់សព្វថ្ងៃនេះ បានជួយឱ្យក្រុមគ្រួសារមានប្រាក់ចំណូលសមរម្យ។ ជាក់ស្តែងកាលឆ្នាំ២០២៤ ក្រៅពីកាត់ចំណាយផ្សេងៗហើយ លោក នង ស៊ីណេ ទទួលបានចំណូលពីការដាំក្រូចថ្លុងប្រមាណ១០លានរៀល។
លោកបានបញ្ជាក់ថា «កាលឆ្នាំ២០២៤ ខ្ញុំប្រមូលផលផ្លែក្រូចថ្លុងបានចំនួន៣ ០០០ផ្លែ បើគិតជាចំណូលបានប្រហែល២០លានរៀល ក្រោយពីកាត់ចំណាយផ្សេងៗហើយ នៅសល់ចំណូល១០លានរៀលសម្រាប់ផ្គត់ផ្គង់គ្រួសារ ហើយរំពឹងថា នៅឆ្នាំ២០២៥នេះ នឹងទទួលបានប្រាក់ចំណូលខ្ពស់ជាងឆ្នាំ២០២៤»។
បើតាមលោក នង ស៊ីណេ ចូលមកដល់ខែកក្កដា ឆ្នាំ២០២៥នេះ ក្រូចថ្លុងរបស់លោកចាប់ផ្តើមប្រមូលផលបានបណ្តើរៗ និងលក់បានថ្លៃ៦០០០រៀលក្នុងមួយផ្លែសម្រាប់ប្រភេទផ្លែលេខ១ ។
ចំណែក គ្រួសារអ្នកស្រី គិត សុខហ៊ាង បានឱ្យដឹងថា ការប្រមូលផលផ្លែក្រូចថ្លុង ក៏ដូចជាប្រាក់ចំណូលទទួលបានពីមុខរបរដាំក្រូចថ្លុងក្នុងរយៈពេលបីឆ្នាំកន្លងមកនេះ មានការកើនឡើងសន្សឹមៗពីមួយឆ្នាំទៅមួយឆ្នាំ។ ជាក់ស្តែងកាលឆ្នាំ២០២៣ បានចំណូលពីការលក់ផ្លែក្រូចថ្លុងមួយលានរៀល, ឆ្នាំ២០២៤បានចំណូលប្រមាណពីរលានរៀល ហើយនៅឆ្នាំ២០២៥នេះ រំពឹងថាប្រាក់ចំណូលនឹងកើនឡើងបន្ថែមទៀត ដោយសារឆ្នាំនេះដើមក្រូចថ្លុងឱ្យផលច្រើនជាងពេលមុនៗ ។
អ្នកស្រីបានឱ្យដឹងថា បច្ចុប្បន្នអ្នកស្រីមានដើមក្រូចថ្លុងនៅក្បែរផ្ទះចំនួន៤៧ដើម ហើយនៅឆ្នាំ២០២៥នេះ ទើបចាប់ផ្តើមប្រមូលនៅក្នុងខែមិថុនាបានប្រមាណ១៣៥ផ្លែ ហើយនៅខែកក្កដា នឹងប្រមូលផលមួយចំនួនបន្ថែមទៀតយកទៅចែកចាយនៅលើទីផ្សារ។
អ្នកស្រីអះអាងថា «សព្វថ្ងៃដើមក្រូចថ្លុងចំនួន៤៧ដើមនេះ ក្លាយជាមុខរបរសំខាន់សម្រាប់គ្រួសារខ្ញុំ ហើយប្រជាជនរស់នៅលើកោះមានជីវភាពធូរធាទាំងអស់គ្នា ដោយសារមុខរបរដាំក្រូចថ្លុង ខុសប្លែកពីពេលមុនៗ ពលរដ្ឋដាំបន្លែផ្សេងៗជួបការលំបាក។ ប៉ុន្តែក្រោយពីងាកមកដាំក្រូចថ្លុងមានការលូតលាស់ល្អ មានរសជាតិឆ្ងាញ់ និងមានតម្រូវការនៅលើទីផ្សារបន្តបន្ទាប់មក ធ្វើឱ្យកសិករនាំគ្នាដាំក្រូចថ្លុងទាំងអស់គ្នា”។
ទាក់ទងនិងដំណាំក្រូចថ្លុងកោះទ្រង់នេះ បើតាមអ្នកស្រី ហុង ចាន់ណា ប្រធានសមាគមអ្នកដាំក្រូចថ្លុងកោះទ្រង់បានឱ្យដឹងថា បច្ចុប្បន្នប្រជាពលរដ្ឋរស់នៅលើកោះទ្រង់មានចំនួន៣៣៨គ្រួសារ ក្រៅពីប្រកបមុខរបរធ្វើស្រែចម្ការ ដាំបន្លែបង្ការ នៅតាមផ្ទះរបស់ប្រជាពលរដ្ឋនីមួយៗ មានការដាំក្រូចថ្លុងនៅគ្រប់ផ្ទះ ដើម្បីបានចំណូលបន្ថែមជួយផ្គត់ផ្គង់ជីវភាពគ្រួសារ។
ទន្ទឹមនឹងថ្លែក្រូចថ្លុងកោះទ្រង់កំពុងទទួលបានការគាំទ្រនៅលើទីផ្សារក្នុងតំបន់និងផ្សារទំនើបធំៗ នៅក្រុងភ្នំពេញ អ្នកស្រី ហុង ចាន់ណា បានថ្លែងអំណរគុណដល់រាជរដ្ឋាភិបាលកម្ពុជា តាមរយៈក្រសួងពាក់ព័ន្ធ ដូចជាក្រួសួងកសិកម្ម រុក្ខាប្រមាញ់និងនេសាទ រួមនិងមន្ទីរកសិកម្មខេត្ត ដែលតែងតែជួយយកចិត្តទុកដាក់និងផ្តល់បច្ចេកទេសអំពីការដាំ និងការថែទាំក្រូចថ្លុងដល់ពលរដ្ឋនៅពេលកន្លងមកផងដែរ៕
