វៀងច័ន្ទន៍៖ រដ្ឋាភិបាលឡាវ បានអនុម័តលើគោលនយោបាយអាទិភាពសំខាន់ៗ និងផែនការសកម្មភាពរបស់ខ្លួន ដើម្បីដោះស្រាយបញ្ហាប្រឈមធំៗ និងជំរុញកំណើនសេដ្ឋកិច្ចឡាវ បន្ទាប់ពីមានការរីកចម្រើនដ៏រឹងមាំ នៅក្នុងឆមាសទីមួយ នៃឆ្នាំ២០២៥នេះ។
សារព័ត៌មានវៀងច័ន្ទន៍ ថែមស៍ របស់ឡាវ បានចេញផ្សាយថា កិច្ចប្រជុំគណៈរដ្ឋមន្ត្រីឡាវ ដែលមានវត្តមានអភិបាលខេត្ត និងតំណាងមកពីស្ថាប័នរដ្ឋសំខាន់ៗ ក្រោមអធិបតីនាយករដ្ឋមន្ត្រីឡាវ លោក សុនិសៃ ស៊ីផាន់ដន (Sonexay Siphandone) បានកត់សម្គាល់ថា សេដ្ឋកិច្ចឡាវបានកើនឡើងចំនួន៤,៥ ភាគរយ នៅក្នុងឆមាសទីមួយ នៃឆ្នាំ២០២៥។
កិច្ចប្រជុំពេញអង្គរបស់គណៈរដ្ឋមន្ត្រីឡាវ ក៏បានលើកឡើងថា កំណើននេះបានមកពីវិស័យសំខាន់ៗ រួមមាន សេវាកម្ម កសិកម្ម រុក្ខាប្រមាញ់ ការអភិវឌ្ឍហេដ្ឋារចនាសម្ព័ន្ធ និងការនាំចេញផលិតផលទៅកាន់ទីផ្សារក្រៅប្រទេស។ ទិន្នផលស្រូវប្រាំងរបសើឡាវ បានកើនឡើងដល់៤២៣ ៨០០តោន ឬស្មើនឹង៩៤ភាគរយនៃផែនការគ្រោងទុក សម្រាប់ឆ្នាំ២០២៥ ខណៈការនាំចេញកសិផល និងរុក្ខាប្រមាញ់ ទទួលបានប្រាក់ចំណូលជាង១,១២ពាន់លានដុល្លារ ឬស្មើនឹង៧៥ភាគរយនៃផែនការគ្រោងទុក។
ចំណែកការប្រមូលចំណូលរដ្ឋ បានកើនឡើងដល់៣៧,៧៥៨ពាន់លានគីប ឬស្មើនឹង៣,៩៧ពាន់លានដុល្លារ ត្រូវជា៥៥ភាគរយនៃផែនការឆ្នាំ២០២៥ ខណៈការចំណាយមានចំនួន២៨,២២៣ពាន់លានគីប ឬស្មើនឹង២,៩៧ពាន់លានដុល្លារ ត្រូវជា៣៩ភាគរយនៃផែនការសម្រាប់ឆ្នាំ២០២៥នេះ។
រដ្ឋាភិបាលឡាវ បានផ្តល់អាទិភាពចំពោះការចំណាយលើប្រាក់បៀវត្សរ៍ និងប្រាក់បំណាច់សម្រាប់មន្ត្រីរដ្ឋការ យោធិន និងនគរបាល និវត្តជន ជនពិការ និងគ្រូបង្រៀនស្ម័គ្រចិត្តនៅទូទាំងប្រទេស។
ចំណែកអតិផរណា ជាមធ្យមក្នុងរង្វង់អត្រា១១ភាគរយ នៅក្នុងឆមាសទីមួយនៃឆ្នាំ២០២៥នេះ ហើយត្រូវបានគេរំពឹងថា នឹងធ្លាក់ចុះមកនៅត្រឹមលេខមួយខ្ទង់ នាចុងឆ្នាំនេះ។ រីឯទុនរូបិយប័ណ្ណបរទេសបម្រុង គឺគ្រប់គ្រាន់សម្រាប់ការនាំចូលរយៈពេល៤,៩ខែ ហើយត្រូវបានគេព្យាករណ៍ថា នឹងអាចទ្រទ្រង់សម្រាប់ការនាំចូលរយៈពេលប្រាំខែ នៅត្រឹមបំណាច់ខែធ្នូ ឆ្នាំ២០២៥នេះ។ វឌ្ឍនភាពនៃការងារសងបំណុល ស្ថិរភាពតម្លៃ និងសន្តិសុខស្បៀង ក៏ដំណើរការបានល្អផងដែរ។
រដ្ឋាភិបាលឡាវ បានផ្អាកការចុះកិច្ចព្រមព្រៀងថ្មីសម្រាប់ការរុករកធនធានរ៉ែ ខណៈដំណើរការត្រួតពិនិត្យលើសកម្មភាពរុករករ៉ែមាស និងធនធានរ៉ែកម្រ កំពុងបន្តអនុវត្ត។
កិច្ចប្រជុំពេញអង្គរបស់គណៈរដ្ឋមន្ត្រីឡាវ ក៏បានលើកឡើងពីវឌ្ឍនភាពការងារសាងសង់ស្ពានឆ្លងកាត់ទន្លេនៅទូទាំងប្រទេសឡាវ និងបានអនុម័តជាគោលការណ៍នូវគម្រោងសាងសង់ និងគម្រោងកែលម្អផ្លូវសម្រាប់ឆ្នាំ២០២៦ និងសម្រាប់គម្រោងអនុវត្តបន្តនៅបណ្តាឆ្នាំខាងមុខទៀត។
ទន្ទឹមនឹងនេះដែរ រដ្ឋាភិបាលឡាវកំពុងតែជំរុញការសាងសង់ផ្លូវល្បឿនលឿន និងផ្លូវដែក រួមទាំងផ្លូវល្បឿនលឿនតភ្ជាប់ឡាវ-ចិន និងផ្លូវល្បឿនលឿនតភ្ជាប់ទីក្រុងវៀងច័ន្ទន៍ និងទីក្រុងហាណូយ ប្រទេសវៀតណាមផងដែរ។
រីឯវិស័យគ្រប់គ្រងដីធ្លីវិញ ប័ណ្ណកម្មសិទ្ធិដីធ្លីជាង៧៦,៩០០ត្រូវបានចេញជូនប្រជាជន ឬស្មើនឹង២៦ភាគរយនៃផែនការសម្រាប់ឆ្នាំ២០២៥។ ដើម្បីដោះស្រាយបញ្ហាកង្វះខាតគ្រូបង្រៀន រដ្ឋាភិបាលឡាវ បានសម្រេចដំឡើងប្រាក់បំណាច់ដល់គ្រូបង្គោល គ្រូកម្មសិក្សា គ្រូជាប់កិច្ចសន្សា គ្រូបង្រៀនស្ម័គ្រចិត្ត និងចាត់តាំងមន្ត្រីយោធាឱ្យបំពេញភារកិច្ចជួយបង្រៀន។ ចំណែកនៅក្នុងវិស័យសុខាភិបាលសាធារណៈវិញ រដ្ឋាភិបាលឡាវ ក៏មានការកែលម្អហេដ្ឋារចនាសម្ព័ន្ធផ្នែកវេជ្ជសាស្រ្ត និងការបណ្តុះបណ្តាលបុគ្គលិកទាំងថ្នាក់មជ្ឈឹម និងថ្នាក់មូលដ្ឋាន។
រដ្ឋាភិបាលឡាវ មានគោលបំណងបញ្ចប់ការវាយតម្លៃលើផែនការអភិវឌ្ឍន៍សេដ្ឋកិច្ចសង្គមជាតិរយៈពេលប្រាំឆ្នាំ លើកទីទី៩ ឆ្នាំ២០២១-២០២៥ និងផែនការឆ្នាំ២០២៥។ ទន្ទឹមនឹងនេះដែរ សេចក្តីព្រាងផែនការប្រាំឆ្នាំរំកិល លើកទី១០ ឆ្នាំ២០២៦-២០៣០ និងផែនការឆ្នាំ២០២៦ នឹងត្រូវធ្វើបន្តទៀត ដើម្បីត្រៀមដាក់ជូនអង្គប្រជុំរដ្ឋសភាអនុម័តបន្តទៀត។
លើសពីនេះ រដ្ឋាភិបាលឡាវ នឹងដោះស្រាយបញ្ហាប្រឈមនានា មានដូចជាបញ្ហាកង្វះគ្រូបង្រៀន និងកង្វះកម្លាំងពលកម្ម អត្រាបោះបង់ការសិក្សា និងបញ្ហាប្រាក់ខែទាបជាដើម។ រដ្ឋាភិបាលឡាវ ក៏នឹងបន្តដោះស្រាយបញ្ហាទាក់ទងនឹងតម្លៃថាមពលអគ្គិសនី ពាណិជ្ជកម្មក្រៅប្រព័ន្ធ ការនាំចូលយានយន្តខុសច្បាប់ និងហានិភ័យតម្លៃប្រេងឥន្ធនៈ។
កិច្ចប្រជុំពេញរបស់អង្កគណៈរដ្ឋមន្ត្រីឡាវ ក៏បានអនុម័តគោលការណ៍ស្នើសុំដំណោះស្រាយលើការកែសម្រួលតម្លៃថាមអគ្គិសនី ផលប៉ះពាល់នៃការដំឡើងពន្ធ៤០ភាគរយរបស់សហរដ្ឋអាមេរិក មកលើផលិតផលនាំចេញរបស់ឡាវ ការគ្រប់គ្រងទំនិញប្រើប្រាស់ និងតម្លៃប្រេងឥន្ធនៈ ផែនការនាំចេញក្នុងរដូវវស្សា និងមូលនិធិសម្រាប់គាំទ្រដល់ការផលិតទំនិញក្នុងស្រុក៕
