ខេត្តក្រចេះ៖ បច្ចុប្បន្នផលិតផល និងតំបន់កម្សាន្តល្បីៗមួយចំនួន ដែលចាត់ទុកជាអត្តសញ្ញាណប្រចាំខេត្តក្រចេះ ត្រូវបានគេវាយតម្លៃថា បាននិងកំពុងចូលរួមយ៉ាងសកម្មក្នុងការលើកស្ទួយជីវភាពរបស់ប្រជាពលរដ្ឋនៅក្នុងតំបន់ តាមរយៈការលក់ផលិតផល និងសេវាកម្មរបស់ខ្លួនជូនដល់ភ្ញៀវទេសចរជាតិ និងអន្តរជាតិ។
លោក សំ សំអាង ប្រធានការិយាល័យក្សេត្រសាស្រ្ត និងផលិតភាពកសិកម្ម នៃមន្ទីរកសិកម្ម រុក្ខាប្រមាញ់ និងនេសាទ ខេត្តក្រចេះ បានឱ្យដឹងថា នៅសង្កាត់កោះទ្រង់ សម្រាប់ផលិតផល និងទីតាំងកម្សាន្តល្បីៗ ដែលទាក់ទាញភ្ញៀវទេសចរជាតិ និងអន្តរជាតិខ្លាំងជាងគេ៖ទី១)-ផ្លែក្រូចថ្លុងកោះទ្រង់, ទី២)-ក្រឡានថ្មគ្រែ, ទី៣)-អន្លង់ផ្សោតកាំពី និងទី៤)-វត្តវិហារសសរ១០០។
លោកគូសបញ្ជាក់ថា «តាមរយៈអត្តសញ្ញាណសម្គាល់ប្រចាំខេត្តក្រចេះទាំងបួនប្រភេទនេះ យើងឃើញថា ជីវភាពរបស់កសិករមានភាពប្រសើរជាងមុន។ យើងឃើញគាត់មានសម្ភារៈប្រើប្រាស់ទំនើបៗ មានម៉ូតូល្អៗ និងមានផ្ទះធំៗជាដើម។ ជាក់ស្តែនៅកោះទ្រង់កាលពីដើមឡើយអត់មានបង្កើតកន្លែងផ្តល់សេវាស្នាក់នៅដល់ភ្ញៀវទៅកម្សាន្តនៅលើកោះទេ តែឥឡូវមានការបង្កើតកន្លែងផ្តល់សេវាស្នាក់នៅដល់ភ្ញៀវទេសចរទៅកម្សាន្ត។ ដូច្នេះប្រជាពលរដ្ឋក្រៅពីទទួលបានចំណូលពីការដាំក្រូចថ្លុង គាត់នូវទទួលបានប្រាក់ចំណូលពីការផ្តល់សេវាដល់ភ្ញៀវទេសចរស្នាក់នៅបន្ថែមទៀត តាមរយៈការបង្កើតមុខរបរជាក់ស្តែងនៅលើកោះទ្រង់»។
បើតាមប្រធានការិយាល័យក្សេត្រសាស្រ្ត និងផលិតភាពកសិកម្មខាងលើ បានឱ្យដឹងទៀតថា ពីដើមឡើយនៅលើកោះទ្រង់ពិបាកក្នុងការធ្វើដំណើរ តែសព្វថ្ងៃផ្លូវនៅលើកោះទ្រង់ ត្រូវបានសាងសង់ពីបេតុងផ្តល់ភាពងាយស្រួលដល់ពលរដ្ឋ និងភ្ញៀវទេសចរធ្វើដំណើរកម្សាន្តចេញចូលមានរាល់ថ្ងៃ។ ចំណែកអន្លង់ផ្សោតព្រែកកាំពីវិញ ចាប់ពីខែទឹកស្រក ឬចាប់ពិធីបុណ្យអ៊ុំទូតទៅ មានភ្ញៀវទេសចរមកកម្សាន្តមិនចេះដាច់ ហើយពេលខ្លះភ្ញៀវរកកន្លែងអង្គុយអត់បាន។ ដូច្នេះផ្អែកទៅលើផលិតផលសម្គាល់ប្រចាំខេត្ត និងតំបន់ទាក់ទាញ់ខាងលើ បានចូលរួមផ្តល់អត្ថប្រយោជន៍ដល់ពលរដ្ឋ ម្ចាស់ផ្ទះសំណាក់ កន្លែងលក់ដូរ និងរមណីយដ្ឋានផ្ទាល់នៅក្នុងខេត្តក្រចេះសព្វថ្ងៃ។
ចំណែកលោក ពៅ ខេមរា អ្នកប្រកបមុខរបរផ្តល់សេវាដឹកភ្ញៀវទេសចរតាមរទះសេះនៅលើកោះទ្រង់បានឱ្យដឹងថា នៅក្នុងរយៈពេលពីរបីឆ្នាំកន្លងមកនេះ លោកអាចរកបានចំណូលពីការដឹកភ្ញៀវកម្សាន្តនៅលើកោះទ្រង់ក្នុងមួយខែបានជិត៤០ម៉ឺនរៀល ឬលើសពីនេះអាស្រ័យលើភ្ញៀវមកកម្សាន្តនៅលើកោះទ្រង់ជាក់ស្តែង។
លោកបានបន្តថា បច្ចុប្បន្ននៅលើកោះទ្រង់ មានអ្នកប្រកបមុខរបរដឹកភ្ញៀវតាមរយៈរទះសេះមានចំនួនប្រាំពីរនាក់ ប្រចាំថ្ងៃម្នាក់ម្តង ដោយជិះមួយជុំកោះថ្លៃ៤០ ០០០រៀល។ នៅពេលកន្លងមកភ្ញៀវទេសចរ ដែលលេងកម្សាន្តលើកោះ ភាគច្រើនជាជនជាតិខ្មែរមកពីបណ្តាខេត្តផ្សេងៗ។ ពួកគាត់ចូលចិត្តជិះរទះសេះជាងភ្ញៀវបរទេស ហើយកក្តាទាក់ទាញភ្ញៀវបានដោយសារនៅលើកោះទ្រង់មានក្រូចថ្លុងផ្អែម មានផ្ទះបែបបុរាណ មានដើមឈើធំៗ និងមានខ្យល់អាកាសបរិសុទ្ធ៕
