អាឌីស អាបាបា៖ អាជ្ញាធរកាហ្វេ និងតែរបស់ប្រទេសអេត្យូពី បានប្រកាសពីប្រវត្តិសាស្ត្រពាណិជ្ជកម្មកាហ្វេរបស់ប្រទេស ដោយបង្ហាញថា ប្រទេសអេត្យូពីរកចំណូលបានចំនួន២,៦៥៣ពាន់លានដុល្លារ ពីការនាំចេញកាហ្វេក្នុងអំឡុងឆ្នាំសារពើពន្ធ ឆ្នាំ២០១៧ ដែលជាចំណូលខ្ពស់បំផុតមិនធ្លាប់មានពីវិស័យនេះ។
យោងតាមអាជ្ញាធរ ប្រាក់ចំណូលដ៏គួរឱ្យកត់សម្គាល់នេះត្រូវបានបង្កើតឡើងដោយការនាំចេញកាហ្វេចំនួន៤៦៨ ៩៦៧តោនទៅកាន់ទីផ្សារអន្តរជាតិ។ បរិមាណនៃការនាំចេញនេះ តំណាងឱ្យ១៤៤ភាគរយនៃគោលដៅដើមរបស់អាជ្ញាធរ ខណៈប្រាក់ចំណូលសម្រេចបាន១៤៧ភាគរយនៃគោលដៅដែលបានគ្រោងទុក គឺលើសពីការរំពឹងទុកយ៉ាងខ្លាំង។
កាហ្វេអេត្យូពីត្រូវបាននាំចេញក្នុងបរិមាណដ៏ច្រើនទៅកាន់ទីផ្សារពិភពលោក ក្នុងគោលដៅសំខាន់ៗមួយចំនួន រួមមានអារ៉ាប៊ីសាអូឌីត អាល្លឺម៉ង់ ចិន ជប៉ុន ទួរគី និងប្រទេសឥណ្ឌា។
សមាគមកាហ្វេអេត្យូពី បានចាត់ទុកកំណើតប្រាក់ចំណូលនេះ ដោយសារកត្តាសំខាន់ៗមួយចំនួន ដូចជាតម្រូវការជាអន្តរជាតិចំពោះកាហ្វេអេត្យូពី ដែលល្បីល្បាញដោយសាររសជាតិប្លែកដាច់គេ។ ការកើនឡើងនៃការប្រើប្រាស់កាហ្វេជាសកល និងកិច្ចខិតខំប្រឹងប្រែងផ្តោតសំខាន់របស់រដ្ឋាភិបាលអេត្យូពី ដើម្បីបង្កើនប្រាក់ចំណូលពីវិស័យកាហ្វេ។
ទោះជាយ៉ាងណាក៏ដោយការកើនឡើងនៃការនាំចេញកាហ្វេ ក៏បង្កផលវិបាកដល់ទីផ្សារក្នុងស្រុក ដោយសារបរិមាណកាហ្វេកាន់តែច្រើនត្រូវបានដឹកជញ្ជូនទៅក្រៅប្រទេស ដែលបាននាំឱ្យមានការថយចុះនៃបរិមាណកាហ្វេនៅលើទីផ្សារ រហូតធ្វើតម្លៃកាហ្វេនៅក្នុងប្រទេសអេត្យូពីឡើងថ្លៃ។
ការធ្លាក់ចុះយ៉ាងខ្លាំងនៃផលិតកម្មកាហ្វេរបស់ប្រទេសប្រេស៊ីល និងប្រទេសវៀតណាម ដែលជាប្រទេសនាំចេញកាហ្វេឈានមុខគេទីពីររបស់ពិភពលោក បានបង្កើតគម្លាតផ្គត់ផ្គង់នៅក្នុងទីផ្សារពិភពលោក ដូច្នេះកាហ្វេប្រទេសអេត្យូពី អាចជួយបំពេញតម្រូវការបានមួយផ្នែក។ ការផ្លាស់ប្តូរចំណង់ចំណូចចិត្តចំពោះរសជាតិកាហ្វេនៅលើសកលលោក ក៏ផ្តល់ជាកម្លាំងដល់ដំណើរផ្គត់ផ្គង់កាហ្វេ ដើម្បីបង្កើនប្រាក់ចំណូលរបស់ប្រទេសអេត្យូពី។
ដើម្បីពង្រឹងខ្សែសង្វាក់ផ្គត់ផ្គង។ និងធ្វើឱ្យវិស័យនាំចេញកាហ្វេ មានជំនាញវិជ្ជាជីវៈ រដ្ឋាភិបាលអេត្យូពីក៏បានកែសម្រួលតម្រូវការដើមទុនសម្រាប់អ្នកនាំចេញផងដែរ ដែលតម្រូវការដើមទុនអប្បបរមា គឺ១៥ លានប៊ីរអេត្យូពី ឬស្មើនឹងជាងមួយសែនដុល្លារ ដើម្បីចូលរួមក្នុងអាជីវកម្មនាំចេញកាហ្វេ។ លើសពីនេះ សម្រាប់ការចំណាយដើម្បីទទួលបានអាជ្ញាប័ណ្ណនាំចេញកាហ្វេ បានឡើងចំនួនដប់ដង ពីជាងមួយម៉ឹនដុល្លារ ឡើងដល់ជាងមួយសែនដុល្លារ។
យោងតាមអាជ្ញាធរកាហ្វេ និងតែអេត្យូពី ការផ្លាស់ប្តូរនេះមានគោលបំណងចង់ទាក់ទាញបុគ្គល ដែលមានសមត្ថភាពកាន់តែច្រើន អាចចូលទៅក្នុងវិស័យនាំចេញកាហ្វេនេះ ដើម្បីធានាបាននូវកំណើនប្រកបដោយចីរភាព និងមានស្តង់ដារល្អប្រសើរឡើង៕
