កង់បេរ៉ា៖ ក្រុមហ៊ុនផ្លែប៉ោម និងផ្លែសារី អូស្ត្រាលី (Apple and Pear Australia Limited) បាននិយាយថា មុខរបរធ្វើចម្ការដាំដំណាំហូបផ្លែភាគច្រើន នៅក្នុងប្រទេសអូស្ត្រាលី មិនបានរកប្រាក់ចំណេញអស់រយៈពេលបួនឆ្នាំជាប់ៗរួចមកហើយ ដោយសារអ្នកនៅក្នុងប្រទេសមិនសូវជួយទិញផ្លែឈើយកទៅទទួលទានឡើយ។
ចំណែកអ្នកធ្វើចម្ការថ្មីថ្មោង នៅតែបន្តប្រឹងប្រកបមុខរបរកសិកម្មដាំដំណាំហូបផ្លែនេះ ទោះបីជាមានបញ្ហាប្រឈមក៏ដោយ ប៉ុន្តែជ្រើសរើសដាំដំណាំពូជផ្សេង ដើម្បីរកប្រាក់ចំណូលជំនួសដំណាំមានស្រាប់។
ក្រុមហ៊ុនផ្លែប៉ោម និងផ្លែសារី អូស្ត្រាលី នៅមានសេចក្តីសង្ឃឹមថា ផែនការយុទ្ធសាស្ត្ររយៈពេលប្រាំឆ្នាំនឹងជួយលើកទឹកចិត្តប្រជាជនអូស្ត្រាលីឱ្យប្រឹងបរិភោគផ្លែឈើបន្ថែមទៀត ដើម្បីជួយទ្រទ្រង់ជីវភាពអ្នកចម្ការ។
កសិករអូស្ត្រាលីម្នាក់ មានដើមកំណើតឥណ្ឌា បានចាកចេញពីប្រទេសរបស់ខ្លួន មករស់នៅលើទឹកដីប្រទេសអូស្ត្រាលី អស់រយៈពេល១៩ឆ្នាំ ដោយចាប់យកអាជីពជាអ្នកបើកបររថយន្តដឹកជញ្ជូនទំនិញនៅទីក្រុងមែលប៊ន ប៉ុន្តែ កាលពីឆ្នាំ២០២១ លោកបានសម្រេចចិត្តបោះបង់ចោលមុខរបរនោះ ដោយចាប់យកមុខរបរថ្មីជាអ្នកធ្វើកសិកម្មដាំដំណាំហូបផ្លែវិញម្តង។
លោកបាននិយាយថា «ខ្ញុំបានមកលេងមិត្តម្នាក់ ដែលទើបតែទិញកសិដ្ឋានមួយកន្លែង។ ខ្ញុំពិតជាចូលចិត្តអាកាសធាតុនៅទីនេះ និងទេសភាពមើលទៅពិតជាបៃតងស្អាតណាស់។ វាស្រដៀងទៅនឹងប្រទេសកំណើតរបស់ខ្ញុំដែរ»។
លោកបាននិយាយរំឭកថា លោករស់នៅរហូតដល់ធំធាត់ពេញវ័យ នៅក្នុងរដ្ឋប៉ុនចាប ស្ថិតនៅភាគខាងជើងប្រទេសឥណ្ឌា ហើយពេលមករស់នៅក្នុងប្រទេសអូស្ត្រាលី លោកបានចូលលុយគ្នាជាមួយបងប្រុសបង្កើត ទិញបានចម្ការមួយកន្លែង ដើម្បីដាំដំណាំហូបផ្លែ ប៉ុន្តែមិនយូរប៉ុន្មាន មុខរបរកសិកម្មដាំឈើហូបផ្លែចាប់ផ្តើមជួបការលំបាកជាបន្តបន្ទាប់ ព្រោះមិនសូវមានអ្នកទិញ។
លោកបានបាត់បង់ដំណាំស្ទើរទាំងអស់ដោយសារព្យុះភ្លៀង ចម្ការដំណាំរបស់លោកត្រូវបានលិចលង់ដោយទឹកជំនន់ក្នុងឆ្នាំ២០២២ ហើយបច្ចុប្បន្នតំបន់នេះកំពុងតែជួបប្រទះនឹងគ្រោះរាំងស្ងួតវិញម្តង។ ប៉ុន្តែទោះបីជាឆ្លងកាត់ឧបសគ្គទាំងអស់នេះក៏ដោយ លោកក៏មិនសោកស្តាយដែរ។
លោកបាននិយាយថា «ការសោកស្តាយរបស់ខ្ញុំមានតែមួយគ់ត គឺខ្ញុំសម្រេចចិត្តធ្វើកសិក្មនេះយឺតពេលពេក។ ខ្ញុំគួរតែចាប់យកមុខរបរនេះតាំងពី១០ឆ្នាំមុនម្លេះ។ ខ្ញុំមានអារម្មណ៍ថា អ្នកប្រកបមុខរបរធ្វើកសិកម្មមានទំនាក់ទំនងគ្នាណាស់ ព្រោះការធ្វើស្រែចម្ការ មានសាមគ្គីភាពចងក្រងជាសហគមន៍រួមសុខរួមទុក្ខជាមួយគ្នា ខុសពីអ្នកនៅក្នុងទីក្រុង ដែលមិនចេះសាមគ្គីគ្នា រស់នៅផ្ទះក្បែរគ្នា តែមិនស្គាល់គ្នា។ ការគាំទ្រដែលយើងទទួលបានពីសហគមន៍ គឺលើសពីការរំពឹងទុករបស់ខ្ញុំ»។
ក្រុមហ៊ុនផ្លែប៉ោម និងផ្លែសារី អូស្ត្រាលី ដែលតំណាងឱ្យអ្នកដាំដំណាំហូបផ្លែ និងដំណាំបន្លែ បាននិយាយថា ឧស្សាហកម្មនេះ គឺកំពុងស្ថិតនៅលើផ្លូវបំបែក ហើយអ្នកផលិតភាគច្រើនមិនអាចរកប្រាក់ចំណេញសោះក្នុងរយៈពេលបួនឆ្នាំចុងក្រោយនេះ។
ប្រធានផ្នែកឧស្សាហកម្ម ទំនាក់ទំនងរដ្ឋាភិបាល និងអ្នកតស៊ូមតិរបស់ក្រុមហ៊ុនផ្លែប៉ោម និងផ្លែសារី អូស្ត្រាលី បានរំពឹងទុកថា ម្ចាស់ចម្ការជាច្រើនទៀតនឹងត្រូវរួបរួមសាមគ្គីគ្នា នៅក្នុងរយៈពេលប្រាំឆ្នាំខាងមុខ ដើម្បីរកវិធីដោះស្រាយបញ្ហាខ្វះទីផ្សារលក់ផ្លែឈើ។
លោកបាននិយាយដូច្នេះថា «ការចំណាយលើទុនបន្ថែមបានកើនឡើងយ៉ាងខ្លាំង ចំណែកបណ្តាផ្សារទំនើបមិនទទួលខុសត្រូវលើការចំណាយទាំងនេះឡើយ។ អ្នកដាំដំណាំអាចទ្រាំរស់បានត្រឹមមួយ ឬពីរឆ្នាំទៀតប៉ុណ្ណោះ ប៉ុន្តែពួកគេមិនអាចរស់បានយូរជាងនេះទៀតទេ»។
លោកប្រធានបាននិយាយថា យុទ្ធសាស្រ្តរបស់ក្រុមហ៊ុនផ្លែប៉ោម និងផ្លែសារី អូស្ត្រាលី សម្រាប់ប្រាំឆ្នាំខាងមុខនឹងផ្តោតលើការបង្កើនតម្រូវការអ្នកប្រើប្រាស់សម្រាប់ផលិតផលផ្លែឈើស្រស់ៗនៅក្នុងប្រទេសអូស្ត្រាលី។
ទីផ្សារនាំចេញថ្មីសម្រាប់ផ្លែឈើអូស្ត្រាលីកំពុងបើកនៅក្នុងប្រទេសចិន ប៉ុន្តែលោកបាននិយាយថា ឧស្សាហកម្មនេះពិតជាត្រូវការប្រជាជនអូស្ត្រាលី ជួយទិញបរិភោគផ្លែឈើអូស្ត្រាលីឱ្យបានកាន់តែច្រើន ទើបអាចជួយកសិករបាន។
លោកបាននិយាយបន្តថា «អត្រាអ្នកបរិភោគផ្លែប៉ោមបានធ្លាក់ចុះ ហើយយើងពិតជាបានឃើញនូវការធ្លាក់ចុះនៃការបរិភោគផ្លែប៉ោម។ យើងពិតជាបានឃើញច្បាស់ក្នុងរយៈពេលប៉ុន្មានឆ្នាំចុងក្រោយនេះ។ ចំណែគចម្ការផ្លែសារី ជាង១៥ភាគរយ ត្រូវកាប់ចោលអស់ដែរ»។
បញ្ហាប្រឈមនៅតែបន្តកើតមានជាបន្តបន្ទាប់ ប៉ុន្តែលោកប្រធានក្រុមហ៊ុន បាននិយាយថា ការបន្តវេនគ្រប់គ្រងកសិដ្ឋាន គឺជារឿងត្រូវព្រួយបារម្ភបំផុតមួយសម្រាប់អ្នកចម្ការ ដោយលោកបានបន្តនិយាយបញ្ជាក់ថា «កូនចៅរបស់អ្នកចម្ការមិនចង់កាន់តំណែងបន្តទេ ព្រោះពួកគេពិតជាមើលមិនឃើញអនាគតល្អត្រង់ណាឡើយ។ ខិតខំធ្វើការយ៉ាងលំបាកដច្នេះហើយ មិនអាចរកប្រាក់ចំណេញបានទៀត វាពិតជារឿងគួរឲ្យបាកក់ទឹកចិត្តខ្លាំងណាស់សម្រាប់កសិឧស្សាហកម្មនេះ។ វាជាមុខជំនួញដ៏លំបាក និងកាន់តែលំបាក… ហើយខ្ញុំមិនដែលឃើញអ្នកដាំដំណាំណាម្នាក់ ដែលមិនធ្វើការប្រាំពីរថ្ងៃក្នុងមួយសប្តាហ៍នោះទេ»៕
