តូក្យូ៖ រដ្ឋាភិបាឡទីក្រុងតូក្យូ បានទទូចថា ផលប្រយោជន៍វិស័យកសិកម្មរបស់ប្រទេសជប៉ុនគឺ «មិនអាចចរចាបានទេ» នៅក្នុងកិច្ចចរចាផ្នែកពាណិជ្ជកម្មជាមួយសហរដ្ឋអាម៉េរិក បន្ទាប់ពីលោកប្រធានាធិបតី ដូណាល់ណា ត្រាំ (Donald Trump) បានជំរុញឱ្យរដ្ឋាភិបាលជប៉ុនបង្កើនការនាំចូលអង្ករពីអាម៉េរិក។
ទីភ្នាក់ងារសារព័ត៌មានបរទេស បានរាយការណ៍ពីទីក្រុងតូក្យូប្រទេសជប៉ុន កាលពីថ្ងៃទី០១ ខែកក្កដា ឆ្នាំ២០២៥ថា លោក រីអូសី អាកាសាវ៉ា (Ryosei Akazawa) រដ្ឋមន្ត្រីក្រសួងសេដ្ឋកិច្ចជប៉ុន និងជាប្រធានគណៈប្រតិភូចរចាពាណិជ្ជកម្មជាមួយសហរដ្ឋអាម៉េរិក បាននិយាយអំពីការគំរាមកំហែងរបស់ប្រធានាធិបតីអាម៉េរិក លោក ដូណាល់ ត្រាំ ចំពោះការដាក់សម្ពាធពន្ធខ្ពស់ពេក លើប្រទេសជប៉ុន ដោយសារតែប្រទេសជប៉ុននាំចូលអង្ករតិចតួចពេកពីសហរដ្ឋអាម៉េរិក។
ជុំវិញបញ្ហានេះលោករដ្ឋមន្រ្តីក្រសួងសេដ្ឋកិច្ចជប៉ុន បាននិយាយថា «ប្រទេសជប៉ុននឹងមិនយល់ព្រមចំពោះការចរចាណាមួយ ដែលនឹងដាក់សម្ពាធដល់ប្រទេសជប៉ុននោះឡើយ»។
លោក រីអូសី អាកាសាវ៉ា បានបញ្ជាក់បន្ថែមថា កិច្ចចរចាពាណិជ្ជកម្មរវាងសហរដ្ឋអាម៉េរិក និងជប៉ុន សម្រាប់ប្រទេសជប៉ុនគឺអំពីការការពារផលប្រយោជន៍របស់ប្រទេសជប៉ុន។
ជាក់ស្តែង ប្រទេសជប៉ុនបាននិងកំពុងនាំចូលអង្ករកាន់តែច្រើនពីសហរដ្ឋអាម៉េរិក ក្នុងរយៈពេលប៉ុន្មានខែថ្មីៗកន្លងមកនេះ ខណៈពេលប្រទេសជប៉ុនកំពុងតែជួបវិបត្តតម្លៃស្រូវអង្ករ។ ទោះជាយ៉ាងណាក៏ដោយ រដ្ឋាភិបាលជប៉ុនបានកំណត់បរិមាណអង្ករ ដែលត្រូវនាំចូលសម្រាប់ប្រើប្រាស់ជាអាហារ មិនមែនសម្រាប់ជាចំណីសត្វ ឬគ្រឿងផ្សំផ្សេងទៀត ដែលត្រូវបានលើកលែងពន្ធ គឺមួយសែនតោនក្នុងមួយឆ្នាំ ហើយប្រសិនបើនាំចូលលើសពីចំនួននេះ នឹងត្រូវចាប់ពន្ធប្រមាណ២,៧០ដុល្លារ ក្នុងមួយគីឡូក្រាម។ ចំនួននេះគឺគ្រាន់តែមួយចំណែកនៃការប្រើប្រាស់អង្ករប្រចាំឆ្នាំរបស់ប្រទេសជប៉ុនប្រមាណជាប្រាំពីរលានតោនប៉ុណ្ណោះ។
គួរបញ្ជាក់ថា ដោយសារតែតម្លៃអង្ករក្នុងស្រុករបស់ប្រទេសជប៉ុន មានការឡើងថ្លៃឥតឈប់ឈរធ្វើឱ្យភោជនីយដ្ឋាន និងហាងកាន់តែច្រើននៅក្នងប្រទេសជប៉ុន កំពុងងាកទៅរកទិញអង្ករ ដែលនាំចូលពីក្រៅប្រទេសវិញ។
ការផលិតស្រូវអង្ករនៅក្នុងប្រទេសជប៉ុន បានថយចុះយ៉ាងគំហុក បណ្តាលឱ្យតម្លៃស្រូវជប៉ុនឡើងថ្លៃ។ ការថយចុះនៃការផលិតនេះ បានកើតមានឡើងក្រោយពីរដ្ឋាភិបាលជប៉ុន បានបញ្ចប់ជំនួយជាថវិកាសម្រាប់ការដាំស្រូវ កាលពីឆ្នាំ២០១៣ និងបានលើកទឹកចិត្តឱ្យកសិករដាំស្មៅជាចំណីគោវិញ។ សម្រាប់តម្លៃអង្ករនាំចូលនេះ គឺមានតម្លៃប្រហែល២,៧ដុល្លារប៉ុណ្ណោះក្នុងមួយគីឡូក្រាម ដែលថោកជាងអង្ករក្នុងស្រុកប្រហែល៣០ភាគរយ៕
