ទីក្រុងតូក្យូ៖ រដ្ឋមន្ត្រីក្រសួងកសិកម្មប្រទេសជប៉ុន លោក ស៊ីនជីរ៉ូ កូអ៊ីហ្សូមី (Shinjiro Koizumi) បាននិយាយថា ប្រទេសជប៉ុននឹងបញ្ចេញស្រូវបម្រុងចំនួន២០ម៉ឺនតោនទៀត ពីស្តុកទុកសម្រាប់គ្រាអាសន្នរបស់ប្រទេស ដើម្បីដោះស្រាយការឡើងថ្លៃទ្វេដង ចាប់តាំងពីឆ្នាំមុន។
លោកបានមានប្រសាសន៍ថា ក្នុងចំណោមការបញ្ចេញស្តុកថ្មីនេះ ស្រូថចំនួន១០ម៉ឺនតោននៃទិន្នផលស្រូវប្រមូលផលឆ្នាំ២០២១ នឹងត្រូវលក់មុនគេទៅកាន់អ្នកលក់រាយគ្រប់ទំហំ និងអ្នកលក់អង្ករក្នុងស្រុក ដែលមានសមត្ថភាពកិនគ្រប់គ្រាន់។ បន្តមកទៀត នឹងដល់ពេលបញ្ចេញស្តុកស្រូវប្រមូលទិន្នផល កាលពីឆ្នាំ២០២០។
ការឡើងថ្លៃអង្ករបានក្លាយទៅជាកង្វល់ដ៏ធំមួយសម្រាប់អ្នកទទួលបាន និងអ្នកធ្វើគោលនយោបាយនៅមុនការបោះឆ្នោតសំខាន់ៗនៅទីក្រុងតូក្យូ និងនៅទូទាំងប្រទេស។ អ្នកទទួលទានបានឈរតម្រង់ជួរ ដើម្បីទិញស្រូវស្តុកទុកទម្ងន់ប្រាំគីឡូក្រាមក្នុងមួយបាវ តម្លៃ២០០០យ៉េន ឫស្មើប្រមាណ ១៣,៨២ដុល្លារ ចាប់តាំងពីការចាប់ផ្តើមដាក់តាំងលក់ កាលពីជាងមួយបប្តាហ៍មុន។
លោក ស៊ីនជីរ៉ូ កូអ៊ីហ្សូមី បានមានប្រសាសន៍ក្នុងសន្និសីទកាសែតថា “យើងចង់បន្តឆ្លើយតបដោយមិនបង្អង់យូរ ដើម្បីឱ្យស្រូវស្តុកទុក អាចបានទៅដល់អ្នកបរិភោគយ៉ាងឆាប់រហ័ស និងក្នុងតម្លៃទាប។ យើងមិនបណ្តោយឱ្យតម្លៃឡើងថ្លៃវិញ និងប្រាក់ឈ្នួលនៅក្នុងសេដ្ឋកិច្ចជប៉ុនទាំងមូលដួលរលំនោះទេ។ ប្រសិនបើវាប្រាកដជារឿងរបស់អង្ករ នោះខ្ញុំជឿថា យើងត្រូវតែដោះស្រាយបញ្ហាបែបនេះឱ្យបានទាន់ពេលវេលា”។
ចាប់តាំងពីខែមីនា រហូតមកដល់ពេលនេះ ប្រទេសជប៉ុនបានបញ្ចេញស្រូវប្រហែល៦០ម៉ឺនតោន ពីបរិមាណស្រូវស្តុកទុកបម្រុងគ្រាអាសន្នប្រហែល៩០ម៉ឺនតោន។ ប្រហែលស្រូវពាក់កណ្តាលត្រូវបានលក់ដោយផ្ទាល់ទៅឱ្យអ្នកលក់រាយ ក្នុងរយៈពេលពីរសប្តាហ៍ចុងក្រោយនេះ ក្រោមគោលការណ៍ចែកចាយថ្មីរបស់រដ្ឋមន្ត្រីក្រសួងកសិកម្មប្រទេសជប៉ុន។
ទិន្នន័យកាលពីដើមសប្តាហ៍នេះ បានបង្ហាញថា តម្លៃស្រូវក្នុងផ្សារទំនើបជាមធ្យមបានធ្លាក់ចុះក្នុងសប្តាហ៍ទីពីរជាប់ៗគ្នា មកនៅត្រឹម៤ ២២៣យ៉េន ឬស្មើនឹង២៩ដុល្លារក្នុងស្រូវមួយបាវទម្ងន់ប្រាំគីឡូក្រាម សម្រាប់រយៈពេលប្រាំពីរថ្ងៃ រហូតដល់ថ្ងៃទី០១ ខែមិថុនា បន្តធ្លាក់ចុះចំនួន៣៧យ៉េន ឬស្មើនឹង០,២៦ដុល្លារ។
លោក ស៊ីនជីរ៉ូ កូអ៊ីហ្សូមី បានបង្ហាញសញ្ញាការត្រៀមខ្លួនក្នុងការបញ្ចេញស្តុកស្រុវសង្គ្រោះបន្ទាន់ទាំងមូល និងប្រើប្រាស់ស្រូវនាំចូលថែមទៀត ប្រសិនបើចាំបាច់ ដើម្បីរក្សាស្ថិរភាពតម្លៃរហូតដល់ការប្រមូលផលថ្មីចូលមកដល់ក្នុងខែសីហា៕
