ខេត្តប៉េណាង៖ មនុស្សរាប់ពាន់នាក់ក្នុងប្រទេសម៉ាឡេស៊ី បានសម្រុកធ្វើដំណើរទៅកាន់ខេត្តប៉េណាំង ស្ថិតនៅភាគពាយព្យទីក្រុងកូឡាឡាំពួរ ដើម្បីភ្លក្សរសជាតិផ្លែទុរេន ដោយឥតគិតថ្លៃ នៅឯការប្រកួតគុណភាពស្តេចទុរេនក្នុងស្រុក។
សារព័ត៌មាន ឌឹ ស្តា របស់ម៉ាឡេស៊ី បានធ្វើសេចក្តីរាយការណ៍ថា កាលពីថ្ងៃទី៨ ខែមិថុនា ឆ្នាំ២០២៥ ផ្លែទុរេនស្រស់ជាង១ ៨០០គីឡូក្រាម ត្រូវបានរៀបចំជូនដល់ភ្ញៀវទេសចរមកកម្សាន្ត និងមកភ្លក្សរាសជាតិ នៅក្នុងពិធីតាំងពិព័រណ៍ប្រកួតគុណភាពផ្លែទុរេន ដោយមានកសិករ និងអាជីវករ៥០នាក់ រងចាំទទួលភ្ញៀវ។
ភ្ញៀវម្នាក់បាននិយាយថា ប្រសិនបើគេទិញទុរេនកូនកាត់ ឬផ្លែទុរេនលេខ១ នៅកន្លែងផ្សេងពីកន្លែងតាំងពិព័រណ៌ តម្លៃនឹងអាចលើសពី៣០រីងគីត ឬស្មើនឹង៧ដុល្លារ ក្នុងមួយផ្លែ។
ចំណែកភ្ញៀវខ្លះបានសម្តែងនូវក្តីរំភើបរីករាយចំពោះការទទួលទានទុរេនដោយឥតគិតថ្លៃ នៅក្នុងពិធីតាំងពិព័រណ៍នេះ ដែលមានមនុស្សតម្រង់ជួរយ៉ាងវែង ដើម្បីរងចាំភ្លក្សរសជាតិផ្លែទុរេន។
ប្រធានចៅក្រមដាក់ពន្ទុផ្លែទុរេន បានមានប្រសាសន៍ថា ការវិនិច្ឆ័យគឺផ្តោតលើទំហំផ្លែ លើពូជ បរិមាណសាច់ និងរសជាតិផ្អែមល្ហែមជាដើម។
ចំណែកមន្ត្រីក្រសួងកសិកម្មរបស់ម៉ាឡេស៊ី ប្រចាំខេត្តប៉េណាំង បានគូសបញ្ជាក់ថា ផ្លែទុរេនខ្លះយកមកពីតំបន់មួយចំនួនមានរសជាតិឆ្ងាញ់ប្លែកពីគេ មានគុណភាពល្អលើសគេតែម្តង។
លោកបានបញ្ជាក់ថា អ្នកឈ្នះត្រូវបានបែងចែកជាបីចំណាត់ថ្នាក់។ លេខ១ ទទួលបានថវិកាចំនួន១ ០០០រីងគីត ឬស្មើនឹង២៣៦ដុល្លារ លេខ២ ទទួលបាន៦០០រីងគីត ឬស្មើនឹង១៤២ដុល្លារ ចំណែកលេខ៣ ទទួលបាន៣០០រីងគីត ឬស្មើនឹង៧១ដុល្លារ។
កសិករដាំទុរេនអាយុ៤៨ឆ្នាំ ដែលជាប់លេខ១ សម្រាប់ផ្លែទុរេនសម្គាល់ភូមិសាស្ត្រ បានសម្តែងការភ្ញាក់ផ្អើលចំពោះជ័យជម្នះរបស់ខ្លួន។
ចំណែកកសិករម្នាក់ទៀត អាយុ៥៧ឆ្នាំ ទទួលបានចំណាត់ថ្នាក់លេខ១ សម្រាប់ប្រភេទទុរេន មូសាង ឃីង (Musang King) ដែលនៅក្នុងការប្រកួតកាលពីឆ្នាំ២០២៤ ជាប់ត្រឹមចំណាត់ថ្នាក់លេខ២។
អ្នកស្រីបានពន្យល់ថា ទុរេនរបស់គាត់ដាំលើផ្ទៃដីទំហំប្រាំហិកតា ដោយប្រើតែជីសរីរាង្គ ហើយខិតខំថែទាំដើមទុរេនយ៉ាងយកចិត្តទុកដាក់ចំផុត ទើបទទួលបានផ្លែល្អ និងមានគុណល្អដាច់គេ។
រីឯកសិករអាយុ៦៥ឆ្នាំ បានជាប់ចំណាត់ថ្នាក់លេខ១ នៅក្នុងប្រភេទទុរេនកូនកាត់ ឈ្មោះថា ចេះពុយ “Cheh Pui” ជាភាសាចិន ហុកកៀន ដែលមានន័យថា ទុរេនសម្បកខៀវ។
កសិកររូបនេះបានបញ្ជាក់ថា មានគូប្រកួតប្រជែងជាច្រើនណាស់ ហើយលោកមិនសង្ឃឹមថា នឹងឈ្នះគេនោះទេ។ ប៉ុន្តែដោយសារលោកប្រើតែជីសរីរាង្គ មិនប្រើជីគីមី ទើបធ្វើឱ្យផ្លែទុរេនមានគុណល្អ។
ពិព័រណ៍ប្រកួតប្រជែងផ្លែទុរេន នៅឆ្នាំ២០២៥នេះ គឺជាឆ្នាំទីបីហើយនៃការប្រកួតប្រជែងស្ដេចទុរេន នៅក្នុងខេត្តប៉េណាំងរបស់ប្រទេសម៉ាឡេស៊ី ដែលត្រូវបានរៀបចំឡើងដើម្បីផ្សព្វផ្សាយពីផលិតផលផ្លែទុរេនក្នុងស្រុក ដែលមានផ្ទៃដីដាំទុរេនសរុប៦០៧ហិកតា៕
