ហាណូយ៖ ក្រសួងឧស្សាហកម្ម និងពាណិជ្ជកម្មវៀតណាម បានប្រកាសវិធានការថ្មីមួយចំនួនដើម្បីលើកកម្ពស់ការនាំចេញអង្ករដល់ឆ្នាំ២០៣០ ដោយក្នុងនេះបានផ្តោតលើការត្រួតពិនិត្យ ការអនុវត្តយុទ្ធសាស្ត្រនាំចេញ និង ការជំរុញពាណិជ្ជកម្មជាដើម។
យោងតាមទីភ្នាក់ងារព័ត៌មានរបស់បារាំង AFP រាយការណ៍ពីទីក្រុងហាណូយ បានឱ្យដឹងថា ប្រទេសវៀតណាមនាពេលថ្មីៗកន្លងមកនេះ នៅក្នុងកិច្ចប្រជុំនៅខេត្ត ទៀនយ៉ាង (Tien Giang) បានដាក់ចេញវិធានការសម្រាប់ការនាំចេញអង្ករទៅកាន់ទីផ្សារក្រៅប្រទេស។
នៅក្នុងកិច្ចប្រជុំនេះ ត្រូវបានធ្វើឡើងមុនមានការពង្រីកការចរចា និងកិច្ចព្រមព្រៀងពាណិជ្ជកម្មជាមួយដៃគូអន្តរជាតិ រួមទាំងការលុបបំបាត់បញ្ហាភ័ស្តុភារកម្ម និងបទប្បញ្ញត្តិ ដែលបង្កើតបញ្ហាដល់វិស័យនាំចេញរបស់វៀតណាម។
លើសពីនេះ ខេត្ត ទៀនយ៉ាង មានទីតាំងយុទ្ធសាស្ត្រ និងហេដ្ឋារចនាសម្ព័ន្ធដឹកជញ្ជូនដ៏រឹងមាំ ទាំងផ្លូវថ្នល់ និងផ្លូវទឹក មានរោងម៉ាស៊ីនកិនស្រូវ និងរោងចក្រកែច្នៃធំៗប្រមាណ២០០កន្លែង ដែលអាចផលិតអង្ករបានយ៉ាងហោចណាស់បីលានតោនក្នុងមួយឆ្នាំ និងរកបានប្រាក់ចំណូលពីការនាំចេញប្រមាណ១០០លានដុល្លារ។
លោក លូ វីនហ្វី (Lu Wen Phi)ប្រធានការិយាល័យឧស្សាហកម្ម និងពាណិជ្ជកម្មខេត្ត ទៀនយ៉ាង បាននិយាយថា ដើម្បីសម្រេចបាននូវកំណើនរយៈពេលវែង អ្នកនាំចេញ និងពាណិជ្ជករ ត្រូវតែអភិវឌ្ឍផលិតកម្មវត្ថុធាតុដើម។ ជាមួយគ្នានេះត្រូវកែលម្អរោងចក្រ ធ្វើទំនើបកម្មខ្សែចង្វាក់ផលិតកម្ម បង្កើនសមត្ថភាពដំណើរការ និងពង្រឹងសក្តានុពលហិរញ្ញវត្ថុ។
ក្នុងរយៈពេលបួនខែដំបូងនៃឆ្នាំនេះ ឬចន្លោះខែមករា ដល់ខែមេសា ប្រទេសវៀតណាមបាននាំចេញអង្ករជាង៣,៤៣លានតោន ដោយរកបានប្រាក់ចំណូលសម្រាប់ប្រទេសជិត១,៨ពាន់លានដុល្លារ ទោះបីជាវាកើនឡើង៨,១ភាគរយ ក្នុងបរិមាណក៏ដោយ វាថយចុះ១៣,៣ភាគរយ បើប្រៀបធៀបទៅនឹងរយៈពេលដូចគ្នាកាលពីឆ្នាំមុន។
ពាណិជ្ជករ ដែលជាអ្នកនាំចេញអង្ករវៀតណាមម្នាក់ បាននិយាយថា តម្លៃអង្ករធ្លាក់ចុះយ៉ាងឆាប់រហ័សនេះ ដោយសារតែការប្រែប្រួលនៅលើទីផ្សារពិភពលោក នៅចុងឆ្នាំ ២០២៤រួមទាំងការលុបចោលការហាមឃាត់ការនាំចេញរបស់ឥណ្ឌាផងដែរ។
យោងតាមទិន្នន័យពីអគ្គនាយកដ្ឋានគយវៀតណាម បានឱ្យដឹងនាកន្លងមកថា ការនាំចេញអង្ករសរុបចំនួន ៩លានតោន ក្នុងឆ្នាំ២០២៤ ដោយទទួលបានប្រាក់ចំណូលចំនួន៥,៦៧ពាន់លានដុល្លារ កើនឡើង ១១,១ភាគរយ ជាបរិមាណធៀននិង២១,២ភាគរយ នៃឆ្នាំ២០២៣ ដែលជាទំហំនាំចេញ និងតម្លៃកំណត់ត្រាក្នុងប្រវត្តិសាស្ត្រឧស្សាហកម្មនាំចេញអង្ករ។ ជាមួយគ្នានេះដែរ ឆ្នាំ២០២៤ ក៏ជាឆ្នាំទី៥ ជាប់ៗគ្នាដែរ ដែលការនាំចេញអង្ករមានកំណើនកើនឡើងគួរឱ្យកត់សម្គាល់។
របាយការណ៍ដដែល បានឱ្យដឹងដែរថា ឆ្នាំ២០២៤ ទីផ្សារនាំចេញអង្ករឈានមុខគេរបស់វៀតណាមភាគច្រើន គឺប្រទេសហ្វីលីពីន ឥណ្ឌូនេស៊ី ម៉ាឡេស៊ី និងប្រទេសហ្គាណាជាដើម៕
