ឥណ្ឌា៖ លោកស្រីបណ្ឌិត សុនីឡា កុមារី (Sunila Kumari) ជាស្ថាបនិក និងជានាយកប្រតិបត្តិនៃកសិដ្ឋាន ឈ្មោះ ដ្រាហ្គន ហ្វ្លរ៉ា (Dragonflora Farms) លោកស្រីចូលចិត្ត និងស្រលាញ់ការដាំដុះបន្លែ ផ្លែឈើ។ ក្នុងនាមជាកសិសហគ្រឹន និងជាអ្នកដឹកនាំសង្គម លោកស្រីបានធ្វើឱ្យសហគមន៍នៅក្នុងប្រទេសឥណ្ឌាមានការផ្លាស់ប្តូរផ្នត់គំនិតក្នុងការដាំ ផ្លែស្រកានាគ ទទួលបានផលច្រើនប្រកបដោយជោគជ័យ ។
លោកស្រី សុនីឡា មានសញ្ញាបត្របណ្ឌិតផ្នែកសាកវប្បកម្ម និងអនុបណ្ឌិតផ្នែកគ្រប់គ្រងពាណិជ្ជកម្ម
អន្តរជាតិ លោកស្រីបានរួមបញ្ចូលគ្នានូវជំនាញវិទ្យាសាស្ត្រជាមួយនិងភាពប៉ិនប្រសប់នៃអាជីវកម្ម ដើម្បីលើកកម្ពស់ការធ្វើកសិកម្មប្រកបដោយនិរន្តរភាព។
តាមរយៈបទពិសោធន៍ចម្រុះ ជាង១៥ឆ្នាំ នៅក្នុងវិស័យអប់រំ វិស័យសាជីវកម្ម និងសហគ្រិនភាព លោកស្រីបានបង្កើតកសិដ្ឋានផ្ទាល់ខ្លួនមួយ ឈ្មោះថា កសិដ្ឋាន ដ្រាហ្គន ហ្វ្លរ៉ា (Dragonflora Farms) ដែលជា កន្លែងដាំស្រកានាគ ដ៏ធំមួយ កសិដ្ឋាននេះបង្កើតឡើង ដើម្បីលើកកម្ពស់ការដាំដុះរុក្ខជាតិកម្រ ជាពិសេសផ្លែស្រកានាគតែម្តង។ បេសកកម្មរបស់លោកស្រី គឺគាំទ្រកសិករ ណែនាំបច្ចេកទេសកសិកម្មដល់កសិករ ឱ្យចេះធ្វើកសិកម្មប្រកបដោយភាពច្នៃប្រឌិត និងចូលរួមចំណែកដល់ការរីកលូតលាស់នៃវិស័យកសិកម្មរបស់ប្រទេសឥណ្ឌា។
១– ដំណើរជីវិតលោកស្រីបណ្ឌិត សុនីឡា កុមារី និងកសិដ្ឋានដ្រាហ្គន ហ្វ្លរ៉ា
លោកស្រីបណ្ឌិត សុនិឡា កុមារី បានមានប្រសាសន៍ថា “យើងច្រើនតែហៅផ្លែស្រកានាគថា ជាផ្លែនៃអនាគត និងផ្តល់សំណាងល្អ។ ដំណាំនេះមានភាពធន់អាចសម្របទៅនឹងលក្ខខណ្ឌអាកាសធាតុ និងសម្បូរទៅដោយអត្ថប្រយោជន៍ដ៏ច្រើនដល់សុខភាពដែលធ្វើឱ្យស្រកានាគក្លាយជាដំណាំប្រកបដោយនិរន្តរភាព ព្រមទាំងទទួលបានផលចំណេញខ្ពស់”។
តាមរយៈការបំផុសគំនិតចំពោះសក្តានុពលរបស់ដំណាំស្រកានាគ លោកស្រីបានបើកដំណើរការ
កសិដ្ខាន ដោយប្រើចក្ខុវិស័យក្នុផ្ទាល់ខ្លួនក្នុងគោលបំណងធ្វើឱ្យការដាំដំណាំស្រកានាគមានផ្លែច្រើន និងទទួលបានប្រាក់ចំណេញសម្រាប់កសិករឥណ្ឌា។ មានប្រវត្តិកើតចេញពីគ្រួសារអ្នកធ្វើសាកវប្បកម្ម លោកស្រីបានយល់ដឹងអំពីបញ្ហាប្រឈមរបស់កសិករជួបប្រទះក្នុងការដាំដុះដំណាំ ដែលមានផ្លែរបស់មានតម្លៃខ្ពស់នេះ ដោយសារកសិករភាគច្រើនខ្វះចំណេះដឹង និងធនធានដើមទុន។ ដោយសារឆន្ទៈចង់កាត់បន្ថយគម្លាតនេះ លោកស្រីក៏បូកបញ្ចូលគ្នារវាងវិទ្យាសាស្ត្រអនុវត្ត ជាមួយការធ្វើកសិដ្ឋានបែបប្រពៃណី ដើម្បីធ្វើយ៉ាងណាឱ្យការដាំដំណាំស្រកានាគទទួលបានទិន្នផលខ្ពស់។
ដំណើរជីវិតរបស់លោកស្រីបណ្ឌិត ចាប់ផ្តើមមានគេទទួលស្គាល់ ជាពិសេស តាមរយៈការណែនាំអប់រំ និងការបណ្តុះបណ្តាលបែបវិទ្យាសាស្ត្ររបស់លោកស្រី ដល់កសិករឥណ្ឌា ជាង១០០នាក់ ដើម្បីរួមគ្នាបង្កើតកសិដ្ឋានមួយ ដោយដាក់ឈ្មោះថា កសិដ្ឋាន ដ្រាហ្គន ហ្វ្លរ៉ា ដែលដាំដំណាំស្រកានាគប្រកបដោយនិរន្តរភាព និងចីរភាព។ រាល់ចំណុចសំខាន់ៗ គឺជាបទពិសោធន៍រៀនសូត្រ ហើយថ្ងៃនេះ កសិដ្ឋាននេះ គឺជាប្រភពចំណេះដឹងអាចទុកចិត្តបានសម្រាប់ស្វែងរកដំណោះស្រាយសម្រាប់កសិករ ក្នុងការលើកកម្ពស់ការដាំដំណាំស្រកានាគប្រកបដោយនិរន្តរភាព និងទទួលប្រាក់ចំណេញច្រើន។
លោកស្រីបណ្ឌិត សុនីឡា កុមារី មានសេចក្តីស្រមៃចង់ពង្រីកឥទ្ធិពលនៃការបណ្តាក់ទុនលើសពីនៅក្នុងប្រទេសឥណ្ឌា ហើយឈានជើងចូលទីផ្សារពិភពលោក។
គោលបំណងចម្បងរបស់លោកស្រីក្នុងធ្វើកសិកម្មបែបនេះ ដោយសារមលឃើញកសិករឥណ្ឌាប្រឈមមុខនឹងបញ្ហាជាច្រើន ចាប់ពីការដាំរហូតដល់ទីផ្សារលក់ផលិតផលរបស់ខ្លួន។ ដូច្នេះ ជំនួយផ្នែកចំណេះដឹង និងបច្ចេកទេស តាំងពីដាំរហូតដល់ប្រមូលផល គឺមានសារៈសំខាន់សម្រាប់លើកកម្ពស់ប្រព័ន្ធអេកូកសិកម្មប្រកបដោយនិរន្តរភាព និងទទួលបានប្រាក់ចំណេញ។ ការគាំទ្រដ៏ទូលំទូលាយនេះធានាថាកសិករទទួលបានសម្ភារៈ និងគ្រាប់ពូជដាំដុះ ដែលមានគុណភាពខ្ពស់ ការផ្តល់ប្រឹក្សាពីអ្នកជំនាញកសិកម្ម និងយុទ្ធសាស្ត្រទីផ្សារប្រកបដោយប្រសិទ្ធភាព។
តាមរយៈការដោះស្រាយរាល់ដំណាក់កាលនៃដំណើរការធ្វើកសិកម្ម សហគ្រិនសម័យទំនើប ដូចជាលោកស្រីបណ្ឌិត សុនីឡា កុមារី ធ្វើឲ្យប្រសើរឡើងនូវផលិតភាព កាត់បន្ថយការខាតបង់ និងបង្កើនប្រាក់ចំណូលរបស់កសិករ ដោយហេតុនេះ កសិកម្មអាចគាំទ្រដល់កំណើន និងនិរន្តរភាពនៃវិស័យកសិកម្មរបស់ប្រទេសឥណ្ឌាទាំងមូល។
លោកស្រីបណ្ឌិត គឺជាអ្នកមានចក្ខុវិស័យវែងឆ្ងាយក្នុងវិស័យកសិកម្មប្រកបដោយនិរន្តរភាព គឺជាស្ថាបនិកដ៏គួរឱ្យគោរពនៃកសិដ្ឋានដំាដំណាំស្រកានាគ។ ការលះបង់របស់លោកស្រីចំពោះវិស័យកសិកម្មពិតជាបានពង្រីកសមត្ថភាពកសិករឥណ្ឌាឲ្យកែប្រែរបៀបដាំដុះបែបប្រពៃណីដោយបានយល់ដឹងអំពីការធ្វើកសិកម្មប្រកបដោយភាពច្នៃប្រឌិត និងមានការអភិវឌ្ឍប្រកបដោយចីរភាព។
ជាក់ស្តែង ដំណាំស្រកានាគ បើតាមទម្លាប់របស់កសិករនាពេលកន្លងមក ពួកគាត់ដាំសម្រាប់តែបរិភោគក្នុងគ្រួសារតែប៉ុណ្ណោះ ហើយក៏មិនសូវគិតគូរពីគុណភាពផ្លែប៉ុន្មានដែរ។ ប៉ុន្តែ កសិដ្ឋាន ដ្រាហ្គន ហ្វ្លរ៉ា បានកែប្រែដំណាំបែបប្រពៃណីឲ្យក្លាយជាដំណាំផ្តល់ផលប្រយោជន៍ផ្នែកពាណិជ្ជកម្ម ទាំងនៅក្នុងស្រុក និងនាំចេញទៅក្រៅប្រទេស ដើម្បីទទួលប្រាក់ចំណូលយ៉ាងច្រើនថែមទៀតផង។
២-វិធីសាស្រ្តកសិដ្ឋាន ដ្រាហ្គន ហ្វ្លរ៉ា ក្នុងវិស័យកសិកម្មប្រកបដោយនិរន្តរភាព និងបច្ចេកវិទ្យានវានវត្តន៍
ការធ្វើកសិកម្មប្រកបដោយនិរន្តរភាព គឺជាចំណុចស្នូលដ៏សំខាន់របស់កសិដ្ឋាន ដ្រាហ្គន ហ្វ្លរ៉ា។
កសិដ្ឋាននេះលើកទឹកចិត្តដល់ការអនុវត្តវិធីសាស្ត្រធ្វើកសិកម្មសរីរាង្គ និងណែនាំកសិករឱ្យកាត់បន្ថយការប្រើប្រាស់សារធាតុគីមី ជាពិសេស សំណល់សារធាតុគីមី ដែលអាចបង្កគ្រោះថ្នាក់ដល់ជីវិតមនុស្ស និងជីវិតសត្វ។ បច្ចេកទេសធ្វើកសិកម្មច្បាស់លាស់ ក៏ត្រូវបានកសិដ្ឋាននេះយកផ្សព្វផ្សាយផងដែរ ដើម្បីលើកកម្ពស់ការប្រើប្រាស់ធនធានប្រកបដោយប្រសិទ្ធភាពខ្ពស់។
ដើម្បីសម្រួលដល់ដំណើរការធ្វើកសិកម្ម ដ្រាហ្គន ហ្វ្លរ៉ា ផ្តល់ឱ្យកសិករនូវបច្ចេកទេសវិទ្យាសាស្ត្រតាមតម្រូវជាក់ស្តែងក្នុងតំបន់ពួកគេរស់នៅ។ បច្ចេកទេសទាំងនេះអាចជួយកសិករឱ្យបានយល់ដឹងអំពីអ្វី ដែលធាតុចូលត្រូវប្រើ និងដឹងពីពេលវេលា កាត់បន្ថយការចំណាយថ្លៃដើម និងកាត់បន្ថយកម្លាំងពលកម្ម ប៉ុន្តែបង្កើនទិន្នផលខ្ពស់បំផុតដោយមិនប៉ះពាល់ដល់បរិស្ថាន។
កសិដ្ឋាន ដ្រាហ្គន ហ្វ្លរ៉ា គាំទ្រកសិករនៅគ្រប់ដំណាក់កាល ចាប់តាំងពីការដាំរហូតដល់ពេលប្រមូលផលរួចរាល់។ ការបណ្តាក់ទុននេះ ក៏ជួយដល់ដំណើរការខ្សែចង្វាក់តម្លៃផងដែរ ដោយធានាថា កសិផលទៅដល់អ្នកបរិភោគ ដោយមិនចាំបាច់ប្រើឧបករណ៍សិប្បនិម្មិត ឬការអនុវត្តវិធីធ្វើសិកម្មគ្មាននិរន្តរភាព។ លើសពីនេះទៀត កសិករទទួលបានការអប់រំអំពីវិធីកែច្នៃ វេចខ្ចប់ ដែលមិនប៉ះពាល់ដល់បរិស្ថាន ដោយប្រើសម្ភារៈបែបធម្មជាតិ ដូចថង់ក្រចៅ និងកន្ត្រកឫស្សីជាដើម ដើម្បីលើកកម្ពស់និរន្តរភាពបរិស្ថានថែមទៀតផង។
៣- បញ្ហាប្រឈមក្នុងការប្រមូលផលផ្លែស្រកានាគ និងរបៀបដែលពួកគេត្រូវបានយកឈ្នះ
ការយល់ដឹង និងការផ្សព្វផ្សាយអំពីផ្លែស្រកានាគ នៅតែជាកត្តាយ៉ាងសំខាន់នៅក្នុងប្រទេសឥណ្ឌា។ ទោះបីជានៅក្នុងតំបន់ទីក្រុងក៏ដោយ ចំណេះដឹងរបស់អ្នកបរិភោគអំពីអត្ថប្រយោជន៍ផ្លែស្រកានាគនៅតែមានកម្រិត។ ដូច្នេះ ការអប់រំមានសារៈសំខាន់ណាស់ ទាំងអំពីអត្ថប្រយោជន៍របស់ផ្លែ និងសក្តានុពលផ្នែកវិស័យកសិកម្ម។
បញ្ហាប្រឈមចម្បងមួយទៀត គឺការធ្វើឱ្យមានតុល្យភាពរវាងកសិផលនាំចូល និងកសិផលក្នុងស្រុក ដោយហេតុថា ឥណ្ឌាក៏នាំចូលផ្លែស្រកានាគពីប្រទេសផ្សេងៗផងដែរ អ្នកដាំដុះក្នុងស្រុកក៏ត្រូវការស្ថិរភាព
ទីផ្សារ ដើម្បីលក់ផលិតផលរបស់ខ្លួនដែរ។ ការកាត់បន្ថយគម្លាតនេះ តម្រូវឱ្យមានការអប់រំដល់អ្នកបរិភោគជាបន្តទៀត តាមរយៈប្រព័ន្ធផ្សព្វផ្សាយសង្គម ខិត្តប័ណ្ណ និងតាមបណ្តាញសារព័ត៌មាន។ ចំណែក កសិដ្ឋាន ដ្រាហ្គន ហ្វ្លរ៉ា ខ្លួនឯងវិញ ដែលជាមជ្ឈមណ្ឌលចំណេះដឹងផ្នែកវិស័យកសិកម្មប្រកបដោយនិរន្តភាព និងចីរភាព មានព្យួរផ្ទាំងរូបភាព និងបដាផ្សេងៗ សម្រាប់ផ្សព្វផ្សាយអំពីអត្ថប្រយោជន៍របស់ផ្លែស្រកានាគ។
ការគាំទ្ររបស់រដ្ឋាភិបាល និងវិស័យឯកជន នៅក្នុងប្រទេស ក៏មានសារៈសំខាន់ផងដែរ ក្នុងការធ្វើឱ្យដំណើរការដាំដំណាំស្រកានាគទទួលបានជោគជ័យថែមទៀត នាពេលអនាគត។ ជាភព្វសំណាងល្អ កសិករឥណ្ឌាទទួលបានតម្លៃដ៏ល្អសម្រាប់ផលិតផលផ្លែស្រកានាគរបស់ខ្លួន ដែលមានគុណភាពខ្ពស់ ដោយគ្មានបញ្ហាត្រូវព្រួយបារម្ភនាពេលបច្ចុប្បន្ននេះឡើយ។
គន្លឹះសំខាន់ៗសម្រាប់ចាប់ផ្តើមបង្កើតកសិដ្ឋានស្រកានាគ
១. ការជ្រើសរើសពូជល្អត្រឹមត្រូវ៖
នៅទូទាំងពិភពលោក មានពូជស្រកានាគជាង១ ០០០ប្រភេទ។ បន្ទាប់ពីចំណាយពេលអស់ប្រាំមួយឆ្នាំដើម្បីស្រាវជ្រាវយ៉ាងម៉ត់ចត់ លោកស្រីបណ្ឌិត សុនីឡា កុមារី និងក្រុមការងាររបស់លោកស្រី បានកំណត់យកជម្រើសពីរប្រភេទ ដែលសាកសមបំផុតសម្រាប់លក្ខខណ្ឌអាកាសធាតុសម្រាប់ធ្វើកសិកម្មរបស់ឥណ្ឌា។ ជម្រើសទាំងពីរនេះ ត្រូវបានសាកល្បងនៅទូទាំងតំបន់ជាច្រើន ហើយបានបង្ហាញពីទិន្នផលដែលមានស្ថេរភាព និងមាននិរន្តភាព។
២. តម្លៃសម្រាប់ចាប់ផ្តើម៖
- រុក្ខជាតិស្រកានាគ ត្រូវការទ្រើងទ្រដើម ឬធ្នើដោយបង្គោលស៊ីម៉ង់ត៍ ឬស៊ុមដែក។ ដោយសាររុក្ខជាតិមានអាយុកាលពី២៥ ទៅ២៨ឆ្នាំ ដូច្នេះត្រូវការទ្រើង ឬធ្នើរឹងមាំល្អ ទើបនៅគង់វង្សបានយូរអង្វែង។
- ដោយសារបង្គោលស៊ីម៉ងត៍ មានតម្លៃថ្លៃពេក កសិករត្រូវសន្សំសំចៃ។ បើនៅតំបន់ភ្នំវិញ ឈើខ្លឹមក៏អាចធ្វើជាបង្គោលបានដែរ។
- តម្លៃនៃការបង្កើតកសិដ្ឋានស្រកានាគ ប្រែប្រួលទៅតាមតំបន់។ បង្គោលទ្រើង ឬធ្វើសម្រាប់ស្រកានាគមួយដើម អាចចំណាយអស់ប្រាក់ពីរង្វង់០,៨២ ទៅ០,៩៣ដុល្លារ អាស្រ័យលើតម្លៃទីផ្សារជាក់ស្តែង។
៣. ការវិនិយោគហិរញ្ញវត្ថុ និងប្រាក់ចំណេញរំពឹងទុក៖
- វិធីសាស្រ្តវិទ្យាសាស្ត្រក្នុងការដាំដុះស្រកានាគ ផ្ទៃដីមួយហិកតាអាចដាំបានប្រហែល៥ ០០០ដើម។
- ការវិនិយោគដំបូងមានចាប់ពី ៨ ១៧៥ ដុល្លារ ទៅ ៩ ៣៤២ដុល្លារ ក្នុងមួយហិកតា។ ប៉ុន្តែ នៅតាមតំបន់មួយចំនួន អាចចំណាយរហូតដល់ ១៥ ០០០ដុល្លារ សម្រាប់ថ្លៃពលកម្ម ការដឹកជញ្ជូន និងការចំណាយលើគ្រឿងចក្រផ្សេងៗ។
- ចំណែកការដាដុះវិញ ប្រសិនបើគ្រប់គ្រងតាមបែបវិទ្យាសាស្ត្រ អាចទទួលបានទិន្នផលជាមធ្យមពី២០ ទៅ២៦តោន ក្នុងមួយហិកតា។
- កសិករអាចទទួលបានប្រាក់ចំណូលមកវិញ សម្រាប់ការវិនិយោគដំបូងក្នុងរយៈពេលពីរឆ្នាំ តាមរយៈលក់ផ្លែស្រកានាគ ក្នុងតម្លៃប្រហែល១,១៧ដុល្លារ មួយគីឡូក្រាម។
- បច្ចុប្បន្ននេះ តម្លៃលក់ផ្លែស្រកានាគអាចប្រហែល ៣,៥០ដុល្លារ ក្នុងមួយគីឡូក្រាម ដែលធ្វើឱ្យផ្លែស្រកានាគក្លាយជាដំណាំផ្តល់ប្រាក់កម្រៃច្រើន។
- ទោះបីជាតម្លៃស្រកានាគលក់ដុំ ធ្លាក់ចុះមកត្រឹម០,៥៨ដុល្លារ ក្នុងមួយគីឡូក្រាមក៏ដោយ ក៏កសិករនៅតែអាចរកប្រាក់ចំណូលបានចំនួន ១១ ៦៧៧ដុល្លារ ក្នុងមួយហិកតាដែរ។
តាមរយៈកសិដ្ឋាន ដ្រាហ្គន ហ្វ្លរ៉ា លោកស្រីបណ្ឌិត សុនីឡា កុមារី បានប្រែក្លាយការដាំដំណាំស្រកានាគ ទៅជាការដាក់ទុនរកប្រាក់ចំណេញ និងមាននិរន្តរភាពសម្រាប់កសិករឥណ្ឌា។ ដោយការរួមបញ្ចូលគ្នារវាងការស្រាវជ្រាវបែបវិទ្យាសាស្ត្រជាមួយនឹងដំណោះស្រាយកសិកម្មជាក់ស្តែង លោកស្រីបានបង្កើតប្រព័ន្ធអេកូឡូស៊ី ដែលរីកចម្រើនអាចផ្តល់អត្ថប្រយោជន៍ទាំងកសិករ និងអ្នកបរិភោគ។ ជាមួយនឹងការអប់រំរៀនសូត្រជាប្រចាំ ការច្នៃប្រឌិត និងការគាំទ្រពីកសិករនៅក្នុងប្រទេសឥណ្ឌា កំពុងតែជំរុញឱ្យ
កសិដ្ឋាន ដ្រាហ្គន ហ្វ្លរ៉ា មានមហិច្ឆតាធ្វើឱ្យផ្លែស្រកានាគ ក្លាយជាកសិផលសំខាន់មួយក្នុងវិស័យកសិកម្មឥណ្ឌា និងអាចនាំចេញទៅលក់លើទីផ្សារទូទាំងពិភពលោក៕
