ភ្នំពេញ៖ ឯកឧត្តម វ៉ាង វិនពីន (Wang Wenbin) ឯកអគ្គរដ្ឋទូតចិន ប្រចាំព្រះរាជាណាចក្រកម្ពុជា កាលពីថ្ងៃទី១២ ខែឧសភា ឆ្នាំ២០២៥ បានផ្សព្វផ្សាយលើកតម្កើងផ្លែស្វាយខ្មែរនៅទំព័រហ្វេសប៊ុកផ្លូវការផ្ទាល់ ដើម្បីបង្ហាញជាសាធារណៈថា ពូជស្វាយមួយប្រភេទឈ្មោះ កែវចិន ពិតជាមានរសជាតិផ្អែមឆ្ងាញ’។
នៅក្នុងឃ្លីបវីដេអូ មានរយៈ៣នាទី និង៦០វិនាទី អមដោយចំណងជឿងថា «ស្វាគមន៍មកភ្លក្សស្វាយកែវចិនដ៏ឈ្ងុយឆ្ងាញ់ និងទស្សនាទេសភាពកម្ពុជាដ៏ស្រស់ស្អាត!» ឯកឧត្តមឯកអគ្គរដ្ឋទូតបានបង្ហាញអំពីចម្ការស្វាយ ផ្លែស្វាយកែវចិនមួយកន្ត្រក និងផ្លែស្វាយទុំស្រស់មួយចំណិតនៅក្នុងចាន ដាក់លើតុយ៉ាងស្អាត បន្ទាប់មកលោកលើកផ្លែស្វាយទុំបង្ហាញអ្នកទស្សនា។
ដៃកាន់ផ្លែស្វាយទុំ ឈរនៅពីមុខតុមួយមានដាក់តម្កល់ចម្លាក់ផ្តិលថ្មខ្មែរមួយគូ លោកបានមានប្រសាសន៍ជាភាសាចិន ដែលត្រូវបានបកប្រែជាភាសាខ្មែរថា «ខែឧសភា ជារដូវកាលប្រមូលផលផ្លែស្វាយ។ ស្វាយជាផលិតផល ដែលមានលក្ខណៈពិសេសមួយ។ មិត្តភក្តិកម្ពជាបានប្រាប់ខ្ញុំថា នៅកម្ពុជាមានផ្លែស្វាយមួយប្រភេទ ដែលគេហៅថា កែវចិន។ ឆ្នាំ២០២៥ ក៏ជាឆ្នាំទេសចរណ៍ចិន-កម្ពុជាផងដែរ។ សូមស្វាគមន៍អ្នកទាំងអស់គ្នាមកកាន់កម្ពុជា ភ្លក្សស្វាយកែវចិនដ៏ឈ្ងុយឆ្ងាញ់ និងទស្សនាទេសភាពដ៏ស្រស់ស្អាតក្នុងប្រទេសកម្ពុជា»។
ក្រោយពីមានប្រសាសន៍រៀបរាប់ដូច្នេះ ឃ្លីបវីដេអូ ចាប់ផ្តើមបង្ហាញអំពីប្រាសាទអង្គរវត្ត ទេសភាពទឹកជ្រោះ និងសត្វដំរីពីរក្បាល។
តាមរយៈសកម្មភាពផ្សព្វផ្សាយអំពីផ្លែឈើរបស់ខ្មែរនេះ ឯកឧត្តម វ៉ាង វិនពីន កាលពីថ្ងៃទី១០ ខែឧសភា ឆ្នាំ២០២៥ បានបង្ហោះរូបភាពអញ្ជើញទស្សនាចម្ការទុរេនមួយកន្លែង ដែលឯកឧត្តមបញ្ជាក់ថា ស្ថិតនៅក្នុងខេត្តកំពតនៃព្រះរាជាណាចក្រកម្ពុជា។
ឯកឧត្តមឯកអគ្គរដ្ឋទូតបានសរសេរសារថា «ខ្ញុំរីករាយដែលបានមកលេងចម្ការទុរេនកំពត និងភ្លក្សទុរេនអៅខាក់ ដែលជាទុរេនឆ្ងាញ់ជាងគេលើពិភពលោក។ សូមអរគុណដល់សមាគមសហគ្រិនវ័យក្មេងកម្ពុជា (YEAC) សម្រាប់ការទទួលស្វាគមន៍យ៉ាងកក់ក្តៅ។ ជឿជាក់ថា ទុរេនខ្មែរឆ្ងាញ់កាន់តែច្រើននឹងត្រូវនាំចេញទៅកាន់ប្រទេសចិននាពេលអនាគត»។
សូមរំឭកថា រដ្ឋាភិបាលចិន បានតែងតាំងឯកឧត្តម វ៉ាង វិនពីន ដែលជាមន្ត្រីការទូតដ៏លេចធ្លោមួយរូបក្នុងកិច្ចការនយោបាយការបរទេសរបស់ចិន ឱ្យមកបំពេញបេសកកម្មជាឯកអគ្គរដ្ឋទូតចិនប្រចាំកម្ពុជា។ ការបញ្ជូនអតីតអ្នកនាំពាក្យក្រសួងការបរទេសចិនរូបនេះ ឱ្យមកបំពេញការងារនៅកម្ពុជា ត្រូវបានគេមើលឃើញថា ជាការលើកកម្ពស់តម្លៃការទូតរបស់ចិនជាមួយកម្ពុជា ដែលទំនាក់ទំនងប្រទេសទាំងពីរបាននិងកំពុងមានលក្ខណៈពិសេសជាមួយគ្នា៕
