ប៉េកាំង៖ កាលពីថ្ងៃទី៩ ខែឧសភា ឆ្នាំ២០២៥ប្រទេសចិន បានចុះហត្ថលេខាលើកិច្ចព្រមព្រៀង ទិញសណ្តែកសៀង ពោត និងប្រេងឆា ពីប្រទេសអាហ្សង់ទីន មានតម្លៃទឹកប្រាក់ចំនួន៩០០លានដុល្លារ ដែលជាសញ្ញានៃការផ្លាស់ប្តូរកាន់តែឆ្ងាយពីអ្នកផ្គត់ផ្គង់របស់សហរដ្ឋអាម៉េរិក ចំពេលមានជម្លោះពាណិជ្ជកម្មរបស់លោកប្រធានាធិបតី ដូណាល់ ត្រាំ។
មន្ត្រីចិន បាននិយាយក្នុងពិធីចុះហត្ថលេខាលើកិច្ចព្រមព្រៀងនេះ ជាមួយមន្ត្រីអាហ្សង់ទីន កាលពីសប្តាហ៍មុនថា ក្រុមហ៊ុនធំរបស់ចិន នឹងនាំចេញផលិតផលកសិកម្មរបស់ប្រទេសអាហ្សង់ទីន ទៅកាន់ទីផ្សារក្នុងប្រទេសចិន ជំនួសការនាំចូលពីសហរដ្ឋអាម៉េរិក ដោយរបាំងពាណិជ្ជកម្មធ្ងន់ធ្ងរពេក។
សារព័ត៌មានអាហ្សង់ទីន បានរាយការណ៍ព័ត៌មាននេះថា គណៈប្រតិភូមកពីក្រុមប្រឹក្សាចិនសម្រាប់ការលើកកម្ពស់ពាណិជ្ជកម្មអន្តរជាតិ បានធ្វើទស្សនកិច្ចនៅប្រទេសអាហ្សង់ទីន កាលពីថ្ងៃទី៧ ខែឧសភា ហើយបានជួបពិភាក្សាជាមួយមន្ត្រីទទួលបន្ទុកទីផ្សារពាណិជ្ជកម្ម និងកសិកម្មអន្តរជាតិ របស់អាហ្សង់ទីនផងដែរ។
យោងតាមសេចក្តីថ្លែងការណ៍ ដែលបានចេញផ្សាយនៅលើគេហទំព័ររបស់ស្ថាប័នពាណិជ្ជកម្មរដ្ឋាភិបាល អាហ្សង់ទីន បានលើកឡើងថា គណៈប្រតិភូចិនក៏បានពិភាក្សាជាមួយតំណាងធុរកិច្ចនៅប្រទេសអាហ្សង់ទីន ដោយផ្តោតលើប្រធានបទ រួមគ្នាលើកកម្ពស់ការអភិវឌ្ឍសេដ្ឋកិច្ចទ្វេភាគី និងការពារពាណិជ្ជកម្មសេរី។
សេចក្តីថ្លែងការណ៍បាននិយាយទៀតថា ភាគីទាំងពីរបានចុះហត្ថលេខាលើអនុស្សរណៈនៃការយោគយល់គ្នា ប៉ុន្តែមិនបានផ្តល់នូវព័ត៌មានលម្អិតបន្ថែមនោះទេ។
ប្រទេសចិន គឺជាអ្នកទិញសណ្តែកសៀងមិនទាន់កែច្នៃធំបំផុតរបស់អាអាហ្សង់ទីន ព្រមទាំងទិញផលិតផលប្រេងសណ្តែកមួយចំនួនទៀត ហើយកាលពីឆ្នាំមុន ក៏បាននាំចេញពោតយ៉ាងច្រើនផងដែរ។
ចំណែករបាយការណ៍នាំចេញរបស់អាហ្សង់ទីន បានបង្ហាញថា ការលក់ស្រូវសាលីមានការកើនឡើងគួរឱ្យភ្ញាក់ផ្អើលក៏ដោយ ក៏ប្រទេសអាហ្សង់ទីន នៅត្រឹមជាអ្នកផ្គត់ផ្គង់កសិផលតិចតួចនៅឡើយ ហើយក៏មិនបាននាំចេញសណ្តែកសៀងច្រើន ទៅកាន់ទីផ្សាររបស់ចិនដែរ ចាប់តាំងពីខែមករា ឆ្នាំ២០២៥នេះ។
ចំណែកបើយោងតាមទិន្នន័យគយចិនវិញ បានឱ្យដឹងថា ការនាំចេញពោតពីអាហ្សង់ទីន មិនទាន់មាននៅឡើយទេ ទោះបីការប្តេជ្ញាចិត្តដ៏ធំមួយរបស់ប្រទេសចិនសម្រាប់កសិផលអាហ្សង់ទីន ក៏ដោយ ស្របពេលមានសង្រ្គាមពាណិជ្ជកម្មកាន់តែតានតឹងឡើង ដែលជាសញ្ញាបង្ហាញថា ប្រទេសចិន បានត្រៀមខ្លួនរួចជាស្រេចដើម្បីរក្សាពន្ធលើសហរដ្ឋអាមេរិកឱ្យកម្រិតដដែល និងការប្រឆាំងនឹងអត្រាពន្ធថ្មីរបស់លោក ដូណាល់ ត្រាំ។
ការិយាល័យសារព័ត៌មានផ្នែកពាណិជ្ជកម្មចិន បាននិយាយនៅក្នុងសេចក្តីថ្លែងការណ៍មួយ កាលពីថ្ងៃព្រហស្បតិ៍ សប្តាហ៍មុនថា ក្រុមហ៊ុនរដ្ឋទទួលបន្ទុកគ្រប់គ្រងទុនបម្រុងសម្រាប់យុទ្ធសាស្ត្រស្បៀងរបស់ប្រទេសចិន បានចាប់ផ្តើមពង្រីកការផ្គត់ផ្គង់ទំនិញកសិកម្មពីប្រទេសអាហ្សង់ទីន ទៅកាន់ប្រទេសចិន និងស្វែងរកកិច្ចសហប្រតិបត្តិការរយៈពេលវែងបន្ថែមទៀត៕
