ទីក្រុងណាននីង៖ ចិនគឺជាប្រទេសមួយ ដែលពលរដ្ឋនិយមចូលចិត្តបរិភោគផ្លែទុរេន ម្ល៉ោះហើយទើបធ្វើឱ្យបណ្តាប្រទេសអាស៊ីអាគ្នេយ៍ បានប្រជែងគ្នាក្នុងការនាំយកផ្លែទុរេនទៅកាន់ទីផ្សារប្រទេសចិន ដោយទទួលបានកម្រៃខ្ពស់ និងជាទីផ្សារស្រូបទាញ បន្ទាប់ពីរដូវប្រមូលផលទុរេន មកដល់នាពេលថ្មីៗមកនេះ។
ផ្លែទុរេនរបស់ថៃ និងវៀតណាម ត្រូវបានហាមឃាត់នៅតាមច្រកព្រំដែនដោយសារតែសារជាតិគីមី ដែលបង្កផលប៉ះពាល់ដល់អ្នកបរិភោគ។ ប្រទេសចិន គឺជាប្រទេសនាំចូល និងអ្នកបរិភោគទុរេន ច្រើនជាងគេលើពិភពលោក។
នាដើមសប្តាហ៍នេះ ទុរេនថៃ ចំនួន៦កុងតឺន័រ ទម្ងន់សរុប៩៦តោន ត្រូវបានភ្នាក់ងារគយចិនអនុញ្ញាតឱ្យដឹកជញ្ជូនដោយជោគជ័យទៅកាន់កំពង់ផែ លុងភីង ក្នុងទីក្រុងជីងហ្សី ភាគខាងត្បូងប្រទេសចិន។ ផ្លែទុរេនទាំងនេះ ត្រូវបានដឹកជញ្ជូនទៅក្រុងណាននីង និងចែកចាយទៅកាន់ទីផ្សារទូទាំងប្រទេសចិន។
ការនាំចេញផ្លែទុរេនរបស់ប្រទេសថៃ ទៅកាន់ប្រទេសចិន បានប្រឈមមុខនឹងការប្រកួតប្រជែងកាន់តែខ្លាំងពីបណ្តាប្រទេសផ្សេងទៀត ជាសមាជិកអាស៊ាន ដូចជាម៉ាឡេស៊ី វៀតណាម និងឥណ្ឌូណេស៊ី។
ទីភ្នាក់ងារព័ត៌មានស៊ីនហួរ របស់ចិន បានរាយការណ៍ពីទីក្រុងណាននីង នៅថ្ងៃទី៨ ខែឧសភា ឆ្នាំ ២០២៥ថា ផ្លែទុរេន ដែលមានរសជាតិ និងក្លិនពិសេសនេះ បានក្លាយជាការពេញនិយមកាន់តែខ្លាំងឡើងក្នុងចំណោមអ្នកបរិភោគជនជាតិចិន ហើយបានក្លាយជាជម្រើសពេញនិយមបរិភោគក្នុងគ្រួសាររបស់ជនជាតិចិន។ទុរេនមានសាច់ពណ៌លឿងមាស និងសាច់ក្រាស់ គឺជាអាហារដ៏ពិសេសក្នុងមួយឆ្នាំម្តង សម្រាប់អ្នកចូលចិត្តបរិភោគផ្លែទុរេន។ នៅផ្សារទំនើបមួយក្នុងសង្កាត់យុងនីង នៃទីក្រុងណាននីង មានអតិថិជនជាច្រើនកំពុងចោមរោមទិញទុរេន។ ស្រី្តម្នាក់ឈ្មោះ វ៉ាង បាននិយាយប្រាប់ថា គ្រួសារអ្នកស្រីតែងទិញផ្លែទុរេនបរិភោគរៀងរាល់ឆ្នាំក្នុងនេះ មានផ្លែទុរេនមកពីអាស៊ីអាគ្នេយ៍ ដែលអ្នកស្រីចូលចិត្តជាងគេ។
អ្នកស្រី វ៉ាង ដែលជាគ្រួសារតែងនិយមបរិភោគផ្លែទុរេន បាននិយាយថា ផ្លែទុរេនមានក្លិនក្រអូប បូករួមទាំងតម្លៃសមរម្យ គឺ៦០យន់ ឬស្មើនឹង៩,២ដុល្លារ ក្នុងគីឡូក្រាម។
គួរបញ្ជាក់ថា នៅក្នុងឧស្សាហកម្មទុរេន ត្រូវបានគេជឿជាក់ថា ការធ្វើពាណិជ្ជកម្មកាន់តែជិតស្និទ្ធរវាងប្រទេសចិន និងប្រទេសសមាជិកសមាគមប្រជាជាតិអាស៊ីអាគ្នេយ៍ ហៅកាត់ថា អាស៊ាន និងប្រព័ន្ធដឹកជញ្ជូនឆ្លងកាត់ព្រំដែន ដែលកំពុងតែរីកចម្រើនជាបន្តបន្ទាប់សម្រាប់ជួយបង្កើនប្រសិទ្ធភាព និងភាពងាយស្រួលនៃការដឹកជញ្ជូនទុរេនពីបណ្តាប្រទេសអាស៊ាន ទៅកាន់ទីផ្សារប្រទេសចិន។ ទាំងនេះវាបានផ្តល់នូវជម្រើសល្អសម្រាប់អ្នកបរិភោគជាជនជាតិចិន កាន់តែទូលំទូលាយ និងតម្លៃកាន់តែល្អប្រសើរ។
នៅក្នុងឆ្នាំ២០០៣ ប្រទេសថៃ គឺជាប្រទេសដំបូងគេ ដែលទទួលបានការយល់ព្រមពីអគ្គនាយកដ្ឋានគយនៃប្រទេសចិន ដើម្បីនាំចេញទុរេនស្រស់ដោយផ្ទាល់ទៅប្រទេសចិន។ ក្នុងពេលបច្ចុប្បន្ននេះ បើទោះបីជាការប្រកួតប្រជែង មានភាពស្វិតស្វាញក៏ដោយ ប៉ុន្តែទុរេនថៃ នៅតែអាចជ្រែកចូលទៅកាន់ប្រទេសចិនដោយធ្លាក់ចុះបរិមាណច្រើនយ៉ាងណាក៏ដោយ។
យោងតាមទីភ្នាក់ងារព័ត៌មានស៊ីនហួរ បានឱ្យដឹងនាកន្លងមកដែរថា ប្រទេសចិនកំពុងដាំដុះផ្លែទុរេន សម្រាប់ប្រើប្រាស់ក្នុងស្រុកនៅក្នុងទីក្រុងសាន់យ៉ា ក្នុងខេត្តហៃណាន។
សម្រាប់ទុរេនម៉ាន់ថង ដែលជាពូជល្បីរបស់ថៃ មានតម្លៃ៤០០បាត ឬស្មើនឹង១១ដុល្លារអាម៉េរិក ក្នុងមួយគីឡូក្រាមនៅប្រទេសចិន ដោយវាមានតម្លៃថ្លៃជាងនៅប្រទេសថៃប្រមាណពីរដង។
ដោយឡែក បើយោងតាមមជ្ឈមណ្ឌលស្រាវជ្រាវកសិកររបស់ប្រទេសថៃ បានឱ្យដឹងដែរថា ការនាំចេញផ្លែទុរេនស្រស់របស់ប្រទេសថៃទៅកាន់ប្រទេសចិន ត្រូវបានព្យាករណ៍ថា នឹងឈានដល់ទំហំទឹកប្រាក់៤,៥ពាន់លានដុល្លារ នៅក្នុងឆ្នាំ២០២៥នេះ៕
