ភ្នំពេញ៖ ក្រសួងកសិកម្ម រុក្ខាប្រមាញ់ និងនេសាទ នៃព្រះរាជាណាចក្រកម្ពុជា បានដាក់ឱ្យអនុវត្តវិធានការហាមឃាត់ជាបណ្តោះរវាសន្នលើការនាំចូលសត្វពាហនៈ និងផលិតផលសាច់សត្វ ពីប្រទេសថៃ បន្ទាប់ផ្ទុះករណីឆ្លងជំងឺឈាមខ្មៅ ឬជំងឺអង់ត្រាក់ លើសត្វគោក្របី នៅក្នុងខេត្តមួយ នាភាគឦសានប្រទេសថៃ មានព្រំប្រទល់ជាប់ប្រទេសឡាវ។
វិធានការហាមឃាត់ការនាំចូលសត្វពាហនៈ និងផលិតផលសាច់សត្វនេះ ត្រូវបានធ្វើឡើងបន្ទាប់ពីបុរសជនជាតិថៃម្នាក់ នៅក្នុងខេត្ត មុខដាហាន បានស្លាប់ដោយសារជំងឺឈាមខ្មៅ ឬជំងឺអង់ត្រាក់ បន្ទាប់ឆ្លងពីសត្វគោ ឬក្របី ហើយក៏ស្របពេលប្រទេសឡាវ បានចាត់វិធានការដូចគ្នានឹងប្រទេសកម្ពុជាផងដែរ ដើម្បីទប់ស្កាត់ការឆ្លងរាលដាលនៃជំងឺដ៏សាហាវនេះ។
នៅក្នុងសេចក្តីប្រកាសព័ត៌មានរបស់ក្រសួងកសិកម្ម ចុះថ្ងៃទី៦ ខែឧសភា ឆ្នាំ២០២៥ បានលើកឡើងថា «បច្ចុប្បន្ន ពុំមានករណីជំងឺនេះនៅក្នុងប្រទេសកម្ពុជានោះទេ ប៉ុន្តែយ៉ាងណាក្តីជាវិធានការបង្ការ ក្រសួងបានដាក់ឱ្យរអនុវត្តការហាមឃាត់ជាបណ្តោះរវាសន្នលើការនាំចូលសត្វពាហនៈ និងផលិតផលសាច់សត្វ ពីច្រកព្រំដែនទាំងអស់នៃប្រទេសថៃ ព្រមទាំងបានសហការយ៉ាងជិតស្និទ្ធជាមួយស្ថាប័នពាក់ព័ន្ធនៅតាមបណ្តាច្រកព្រំដែនទាំងនេះ ដើម្បីពង្រឹងការត្រួតពិនិត្យ និងធានាការអនុវត្តវិធានការប្រកបដោយប្រសិទ្ធភាពខ្ពស់»។
សេចក្តីប្រកាសព័ត៌មានដដែលបានប្រាប់ដល់សាធារណជនថា «ក្រសួងកសិកម្ម រុក្ខាប្រមាញ់ និងនេសាទ កំពុងតាមដានយ៉ាងយកចិត្តទុកដាក់ចំពោះករណីកើតមានជំងឺឈាមខ្មៅ ឬជំងឺរអង់ត្រាក់លើសត្វពាហនៈ (គោ-ក្របី) ដែលកំពុងកើតមាននៅក្នុងតំបន់មួយចំនួននៃប្រទេសថៃ។ អគ្គនាយកដ្ឋានសុខភាពសត្វ និងផលិតកម្មសត្វ ក៏បានរៀបចំបណ្តាញប្រព័ន្ធប្រតិកម្មរហ័សមួយ នៅគ្រប់ រាជធានី-ខេត្តទាំង២៥ ក្នុងគោលដៅតាមដានសុខភាពសត្វពាហនៈ និងធ្វើការអន្តរាគមន៍ក្នុងករណីសង្ស័យ»។
យោងតាមសារព័ត៌មាន បាងកក ប៉ុស្តិ៍ របស់ថៃ ចេញផ្សាយថ្ងៃទី៧ ខែឧសភា ឆ្នាំ២០២៥ បានឱ្យដឹងថា ការិយាល័យសុខភាពសាធារណៈនៃខេត្តមុខដាហាន បានបញ្ជាក់ពីករណីឆ្លងថ្មីមួយទៀតនៃជំងឺឈាមខ្មៅ ឬជំងឺអង់ត្រាក់ ដែលនាំឱ្យចំនួនមនុស្សឆ្លងជំងឺកើនឡើងដល់បួននាក់ ដោយក្នុងនោះមានអ្នកស្លាប់ម្នាក់រួចទៅហើយ។ អ្នកជំងឺបីនាក់ត្រូវបានបញ្ជូនទៅសម្រាកព្យាបាលនៅមន្ទីរពេទ្យ ក្នុងខេត្តមុខដាហាន ។
សារព័ត៌មានដដែល បានដកស្រង់ប្រភពច្បាស់ការណ៍មួយ ដែលនិយាយបញ្ជាក់ថា មនុស្សសរុបចំនួន៦៣៦នាក់ ត្រូវបានដាក់ឱ្យស្ថិតក្រោមការត្រួតពិនិត្យផ្នែកវិជ្ជសាស្ត្រ ក្នុងនោះមាន៥៣៨នាក់ ត្រូវបានពិនិត្យសុខភាពរួចហើយ ចំណែកមនុស្ស៩៨នាក់ទៀត កំពុងស្ថិតក្រោមការតាមដានពីក្រុមគ្រូពេទ្យនៅឡើយ។
មនុស្សទាំង៦៣៦នាក់នេះ ធ្លាប់បានប៉ះពាល់គោមានជំងឺ ឬបានបរិភោគសាច់ងាប់ ដូច្នេះពួកគេត្រូវបានហៅមកធ្វើចត្តាឡីស័ក រយៈពេលប្រាំពីរថ្ងៃ ដើម្បីតាមដានសុខភាព។
អាជ្ញាធរថៃ បានអំពាវនាវឱ្យសាធារណជនជៀសវាងការបរិភាគសាច់គោឆៅ ឬសាច់គោងាប់ និងត្រូវតែបរិភោគសាច់ណា ដែលត្រូវបានចម្អិនយ៉ាងហ្មត់ចត់ក្នុងកំដៅយ៉ាងហោចណាស់១២០អង្សាសេ ឬចម្ពិនយ៉ាងហោចឆាប់ណាស់ក្នុងរយៈពេល៣០នាទី ដើម្បីសម្លាប់បាក់តេរីបង្កមេរោគអង់ត្រាក់៕
