ទីក្រុងប៉េកាំង៖ យោងតាមប្រព័ន្ធផ្សព្វផ្សាយរបស់ចិន បានឱ្យដឹងថា នៅក្នុងខែមេសា ឆ្នាំ២០២៥នេះ យ៉ាងហោចមានកប៉ាល់ដឹកសណ្តែកសៀងប្រេស៊ីល ប្រហែល៤០គ្រឿង គ្រោងនឹងចូលចតនៅកំពង់ផែ ក្នុងខេត្ត ជឺជាំង (Zhejiang) ស្ថិតនៅភាគខាងកើតប្រទេសចិន ដោយកើនឡើង៤៨ភាគរយ ពីមួយឆ្នាំទៅមួយឆ្នាំ ដែលកាលពីខែមេសា ឆ្នាំ២០២៤ មានកប៉ាលដឹកជញ្ជូនសណ្តែកសៀងពីប្រេស៊ីលចំនួន២៧គ្រឿងប៉ុណ្ណោះ។
សេចក្តីការណ៍ដដែលនេះ បានលើកឡើងថា គ្រាន់តែនៅក្នុងខែមេសា ឆ្នាំ២០២៥នេះ កប៉ាល់ចិនដឹកសណ្តែកសៀងពីប្រទេសប្រេស៊ីល ជាច្រើនគ្រឿងទៀត បានចូលចតជារៀងរាល់ថ្ងៃ ដោយមានផ្ទុកសណ្តែកសៀងប្រេស៊ីលប្រមាណប្រាំពីរសែនតោន គឺកើនឡើង៣២ភាគរយ ខណៈឆ្នាំមុននាំចូលបានចំនួនប្រាំសែនបីម៉ឺនតោន។
អ្នកជំនាញចិនម្នាក់ បាននិយាយថា នេះជាការបង្ហាញឱ្យឃើញផ្ទាល់ភ្នែកនៃរបៀបដោះស្រាយបញ្ហាប្រឈមចំពោះការដំឡើងពន្ធបដិកា ដែលបង្កើតឡើងដោយសហរដ្ឋអាម៉េរិក គឺកំពុងធ្វើឱ្យប៉ះពាល់ដល់ឧស្សាហកម្មសំខាន់ៗរបស់ខ្លួន រួមទាំងប្រជាពលរដ្ឋសាមញ្ញ នៅក្នុងសហរដ្ឋអាម៉េរិកផងដែរ ហើយនេះក៏បង្ហាញឱ្យឃើញផងដែរថា ផលិតផលភាគច្រើន ដែលចិនធ្លាប់តែនាំចូលពីសហរដ្ឋអាម៉េរិក ក៏ចិនអាចរកជំនួសបានដែរ ដោយនាំពីប្រទេសផ្សេងៗ នៅទូទាំងពិភពលោក។
យោងតាមទិន្នន័យរបស់ក្រសួងកសិកម្មសហរដ្ឋអាម៉េរិក បានបង្ហាញថា ពីថ្ងៃទី១១ ដល់ថ្ងៃទី១៧ ខែមេសា ឆ្នាំ២០២៥នេះ ការនាំចេញផលិតផលកសិកម្មរបស់អាម៉េរិក រួមទាំងសណ្តែកសៀង និងសាច់ជ្រូក បាននិងកំពុងធ្លាក់ចុះយ៉ាងខ្លាំង បន្ទាប់ពីការដំឡើងពន្ធរបស់សហរដ្ឋអាម៉េរិក មកលើប្រទេសចិន។
នៅក្នុងទិន្នន័យនេះ បង្ហាញទៀតថា ការលក់សណ្តែកសៀងអាម៉េរិក បានធ្លាក់ចុះ៥០ភាគរយ បើប្រៀបធៀបទៅនឹងសប្តាហ៍មុន ខណៈពេលការលក់សាច់ជ្រូក បានធ្លាក់ចុះ៧២ភាគរយ ក្នុងរយៈពេលដូចគ្នានេះ។
ប្រទេសចិនបានកាត់បន្ថយការទិញសណ្តែកសៀង និងកាត់បន្ថយបរិមាណនាំចូលសាច់ជ្រូក ពីសហរដ្ឋអាម៉េរិក ឱ្យមកនៅត្រឹមកម្រិតទាបបំផុត បើប្រៀបធៀបនឹងបរិមាណនាំចូលពីប្រទេសប្រេស៊ីល។
សារព័ត៌មានអាម៉េរិក បានធ្វើសេចក្តីរាយការណ៍មួយ ដោយដកស្រង់ទិន្នន័យរបស់ក្រសួងកសិកម្មសហរដ្ឋអាម៉េរិក ចេញផ្សាយកាលពីថ្ងៃទី២៤ ខែមេសាថា ប្រទេសចិនបានទិញសណ្តែកសៀងត្រឹមតែ១,៨០០តោនប៉ុណ្ណោះ នៅក្នុងរយៈពេលប៉ុន្មានសប្តាហ៍នេះ ពោលគឺធ្លាក់ចុះឆ្ងាយណាស់ពីចំនួន ៧២,៨០០តោន ដែលខ្លួនបានទិញ ក្នុងខែមេសា។
ទិន្នន័យរបស់ក្រសួងកសិកម្មសហរដ្ឋអាម៉េរិក ក៏បានបង្ហាញពីការកាត់បន្ថយបរិមាណនាំចូលសាច់ជ្រូកពីចំនួន១២,០០០តោន ដែលនៅត្រឹមថ្ងៃទី១៧ ខែមេសា មកត្រឹមតែ ៥,៨០០តោន។
លោក លី យ៉ុង (Li Yong) អ្នកស្រាវជ្រាវជាន់ខ្ពស់នៃសមាគមពាណិជ្ជកម្មអន្តរជាតិចិន បានមានប្រសាសន៍ កាលពីថ្ងៃទី២៦ ខែមេសាថា វិស័យកសិកម្មរបស់សហរដ្ឋអាម៉េរិក កំពុងទទួលរងផលប៉ះពាល់មុនគេពីការដំឡើងពន្ធរួច ព្រោះផលិតផលកសិកម្មមួយចំនួន ដូចជាសណ្តែកសៀង និងសាច់ជ្រូក ធ្លាប់តែពឹងផ្អែកលើទីផ្សារក្នុងប្រទេសចិន។
លោកបានកត់សម្គាល់ថា ទីផ្សារដ៏ធំរបស់ប្រទេសចិន និងអំណាចទិញដ៏រឹងមាំរបស់ចិន ដែលកើតឡើងក្នុងទំនាក់ទំនងពាណិជ្ជកម្មរវាងប្រទេសទាំងពីរ ត្រូវរលាយស្ទើរអស់។
លោក លី យ៉ុង បានមានប្រសាសន៍ទៀតថា តាមរយៈការបង្កើតឱ្យមានសង្រ្គាមពាណិជ្ជកម្ម សហរដ្ឋអាម៉េរិកកំពុងស្ម័គ្រចិត្តដកខ្លួនចេញពីទីផ្សារដ៏ធំសម្បើមនៅប្រទេសចិន។ ទោះបីសហរដ្ឋអាម៉េរិក ជាអ្នកផ្គត់ផ្គង់ ប្រកួតប្រជែងនៅក្នុងទីផ្សារពិភពលោកក៏ដោយ ពន្ធគយបានបង្ខំឱ្យកសិករអាម៉េរិកបាត់បង់ចំណែកទីផ្សារជាមួយដៃគូប្រកួតប្រជែង។
ចាប់តាំងពីខែមករា សហរដ្ឋអាម៉េរិកបានដំឡើងពន្ធបដិកាម្តងហើយម្តងទៀតលើទំនិញរបស់ចិន ដោយចេតនាបង្កឱ្យមានសង្គ្រាមពាណិជ្ជកម្មថ្មីម្តងទៀត។ ដូច្នេះជាការឆ្លើយតប ចិនបានអនុវត្តវិធានការតបតវិញយ៉ាងឆាប់រហ័ស។ ចាប់ពីថ្ងៃទី១០ ខែមីនា ឆ្នាំ២០២៥ ប្រទេសចិនបានដំឡើងពន្ធចំនួន១៥ភាគរយលើសាច់មាន់ ស្រូវសាលី ពោត និងកប្បាស ដែលមានដើមកំណើតនៅសហរដ្ឋអាម៉េរិក និងដំឡើងពន្ធ១០ភាគរយទៀត លើកសិផល មានដូចជា ស្ពៅ សណ្តែកសៀង សាច់ជ្រូក សាច់គោ គ្រឿងសមុទ្រ ផ្លែឈើ បន្លែ និងផលិតផលទឹកដោះគោជាដើម។
លោក លី យ៉ុង ព្យាករណ៍ថា ពន្ធគយរបស់សហរដ្ឋអាម៉េរិកនឹងនាំឱ្យប្រទេសចិនផ្លាស់ប្តូរឆ្ពោះទៅរកការទិញផលិតផលកសិកម្មបន្ថែមទៀត ពីប្រទេសផ្សេងៗ ដោយកាត់បន្ថយចំណែករបស់សហរដ្ឋអាម៉េរិកនៅក្នុងទីផ្សារចិន៕
