ប្រទេសអូម៉ង់ ៖ សេចក្តីប្រកាសព័ត៌មានស្តីពីកិច្ចប្រជុំក្រុមប្រឹក្សាភិបាលនៃសមាគមគ្រឹះស្ថានហិរញ្ញវត្ថុអភិវឌ្ឍន៍ក្នុងតំបន់អាស៊ី និង ប៉ាស៊ីហ្វិក (Association of Development Financing Institutions in Asia and the Pacific-ADFIAP) លើកទី៩៨ និងការចូលរួមកិច្ចប្រជុំប្រចាំឆ្នាំ ADFIAP លើកទី៤៨ ព្រមទាំងកិច្ចប្រជុំពាក់ព័ន្ធនានា នៅទីក្រុងមូស្អាត ប្រទេសអូម៉ង់ នាថ្ងៃទី២២-២៥ ខែមេសា ឆ្នាំ២០២៥
ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម (ARDB) និងជាប្រធានសមាគមគ្រឹះស្ថានហិរញ្ញវត្ថុអភិវឌ្ឍន៍ក្នុងតំបន់អាស៊ី និងប៉ាស៊ីហ្វិក (ADFIAP)បានអញ្ជើញដឹកនាំកិច្ចប្រជុំក្រុមប្រឹក្សាភិបាលសមាគម ADFIAP លើកទី៩៨,ព្រមទាំងបានដឹកនាំប្រតិភូធនាគារ ARDBចូលរួមកិច្ចប្រជុំប្រចាំឆ្នាំនៃសមាគម ADFIAP លើកទី ៤៨ និងកិច្ចប្រជុំពាក់ព័ន្ធនានា ដោយទទួលបាននូវលទ្ធផលដូចការរំពឹងទុក។
កិច្ចប្រជុំក្រុមប្រឹក្សាភិបាលនៃសមាគម ADFIAP លើកទី៩៨ នេះ បានរៀបចំឡើងក្នុងគោលបំណ ពិភាក្សាលើរបៀបវារៈសំខាន់ៗ ដែលពាក់ព័ន្ធនឹងដំណើរវិវត្តន៍និងវឌ្ឍនភាពការងារនៃសមាគម ក៏ដូចជាដើម្បី អនុម័តលើការផ្តួចផ្តើមនានា សំដៅលើកកម្ពស់ការផ្តល់ហិរញ្ញប្បទានអភិវឌ្ឍន៍ និងលើកកម្ពស់ការអភិវឌ្ឍ ប្រកបដោយចីរភាពក្នុងតំបន់អាស៊ី និងប៉ាស៊ីហ្វិក។
ជាលទ្ធផលនៃកិច្ចប្រជុំនេះក្រុមប្រឹក្សាភិបាលនៃសមាគម ADFIAPបានអនុម័តលើរបាយការណ៍វឌ្ឍនភាពការងាររបស់សមាគម និងគំនិតផ្តួចផ្តើមនានាដែលស្នើដោយ សមាជិក និងអគ្គលេខាធិការដ្ឋាន។
ទន្ទឹមនេះ, ឯកឧត្តមបណ្ឌិត កៅ ថាច បានដឹកនាំប្រតិភូធនាគារ ARDB ចូលរួមកិច្ចប្រជុំប្រចាំឆ្នាំ សមាគម ADFIAP លើកទី៤៨ ផងដែរ ដែលត្រូវបានរៀបចំឡើងដោយ ធនាគារអភិវឌ្ឍន៍នៃប្រទេសអូម៉ង់ និង បានប្រព្រឹត្តទៅក្រោមមូលបទ “ការអភិវឌ្ឍសួនសេដ្ឋកិច្ចក្នុងស្រុក និងឥទ្ធិពលទៅលើការអភិវឌ្ឍ (Economic Gardening and Development Impacts)” ដើម្បីលើកទឹកចិត្តដល់គ្រឹះស្ថានហិរញ្ញវត្ថុអភិវឌ្ឍន៍ឱ្យផ្តោតសំខាន់ ខ្លាំងទៅលើការប្រើប្រាស់ធនធានក្នុងស្រុក ការជំរុញសហគ្រិនភាព និងការពង្រឹងភាពធន់ក្នុងកម្រិតសហគមន៍។ យុទ្ធសាស្ត្រនេះ តម្រូវឱ្យមានការលើកកម្ពស់សហគ្រិនក្នុងស្រុក ការវិនិយោគលើការផ្តួចផ្តើម នានាក្នុងកម្រិត។
សហគមន៍ និងការកសាងប្រព័ន្ធអេកូឡូស៊ីសម្រាប់សហគ្រិន ដែលអាចគាំទ្រដល់អាជីវកម្ម និងជំរុញនវានុវត្តន៍ ក្នុងស្រុក សំដៅដោះស្រាយបញ្ហានានាក្នុងការអភិវឌ្ឍសេដ្ឋកិច្ចសកល និងការជំរុញកំណើនសេដ្ឋកិច្ចក្នុងស្រុក។ កិច្ចប្រជុំប្រចាំឆ្នាំនេះ មានការចូលរួមពីនាយកប្រតិបត្តិ សមាជិកក្រុមប្រឹក្សាភិបាល និងមន្ត្រី ជាន់ខ្ពស់នៃគ្រឹះស្ថាន ហិរញ្ញវត្ថុដែលជាសមាជិកនៃសមាគម ADFIAP រួមទាំងតំណាងដៃគូនានារបស់សមាគម ADFIAP សរុបជាង ៣០០ នាក់ មកពីប្រមាណ ៣៥ប្រទេសក្នុងតំបន់អាស៊ី និងប៉ាស៊ីហ្វិក។
ក្រៅពីនេះ, សន្និបាតនៃសមាគម ADFIAP លើកទី២៦ (Ordinary Meeting of the General Assembly) ក៏បានប្រព្រឹត្តទៅស្របពេលគ្នានេះដែរ ដើម្បីតាមដានវឌ្ឍនភាពការងាររបស់សមាគម និងពិភាក្សាពីការផ្តួចផ្តើមគំនិតថ្មីៗ, ហើយព្រឹត្តិការណ៍នេះរួមមាន នូវការធ្វើបទបង្ហាញ និងកិច្ចពិភាក្សាលើប្រធានបទសំខាន់ៗ ដូចជា ការកសាងប្រព័ន្ធអេកូឡូស៊ី និងសហគមន៍ សហគ្រិន។
តួនាទីរបស់អាជីវកម្មធុនតូច និងមធ្យមក្នុងការអភិវឌ្ឍសេដ្ឋកិច្ច-សង្គម, ការផ្តល់ហិរញ្ញប្បទានសម្រាប់ ការអភិវឌ្ឍ និងការពង្រឹងភាពធន់, ហិរញ្ញប្បទានបៃតង និងការអភិវឌ្ឍប្រកបដោយចីរភាព, និងសារៈសំខាន់នៃ កិច្ចសហប្រតិបត្តិការក្នុងតំបន់ និងជាសកល។
ក្នុងកិច្ចប្រជុំនេះ, ធនាគារARDBក៏បានទទួលពានរង្វាន់ ADFIAP Sustainable Development Award សម្រាប់គម្រោង “យន្តការសម្របសម្រួលសំដៅលើកស្ទួយផលិតកម្ម, រកទីផ្សារ និងរក្សាលំនឹងថ្លៃកសិផលសំខាន់ៗ ក្នុងកម្រិតសមរម្យ (Special Vehicle for Strategic Agriculture Commodities Financing Program)” ដែលទទួលស្គាល់ការចូលរួមរបស់ ARDB ក្នុងការជំរុញការអភិវឌ្ឍ សេដ្ឋកិច្ច-សង្គម តាមរយៈការផ្តល់ហិរញ្ញប្បទាន។
ឆ្លៀតក្នុងកិច្ចប្រជុំដ៏មានសារៈសំខាន់នេះ ឯកឧត្តមបណ្ឌិត កៅ ថាច ក៏បានដឹកនាំប្រតិភូធនាគារ ARDB និងអគ្គលេខាធិការដ្ឋាននៃសមាគម ADFIAP ជួបសម្តែងការគួរសមជាមួយនឹងអគ្គលេខាធិការនៃក្រសួង ហិរញ្ញវត្ថុ និងជាប្រធានក្រុមប្រឹក្សាភិបាលនៃធនាគារអភិវឌ្ឍន៍នៃប្រទេសអូម៉ង់ ដើម្បីផ្លាស់ប្តូរបទពិសោធគ្នា ទៅវិញទៅមក និងសិក្សាអំពីឧត្តមានុវត្តន៍នានាជុំវិញការផ្តល់ហិរញ្ញប្បទានប្រកបដោយចីរភាព។
បន្ថែមពីនេះ, ឯកឧត្តមបណ្ឌិត កៅ ថាច និងប្រតិភូធនាគារ ARDBក៍បានជួបពិភាក្សាជាមួយថ្នាក់ដឹកនាំជាន់ខ្ពស់នៃ គ្រឹះស្ថានហិរញ្ញវត្ថុអភិវឌ្ឍន៍ ដែលជាសមាជិកសមាគម ADFIAP ដូចជា ធនាគារអភិវឌ្ឍន៍នៃប្រទេសអូម៉ង់ និងធនាគារអភិវឌ្ឍន៍នៃប្រទេសហ្វីជី ដើម្បីចែករំលែកបទពិសោធអំពីការផ្តល់ហិរញ្ញប្បទានដល់វិស័យកសិកម្ម ការគ្រប់គ្រងហានិភ័យ និងការលើកកម្ពស់ហិរញ្ញប្បទានបៃតង ជាដើម។
ជាចុងក្រោយ ក្នុងនាមជាប្រធានសមាគម ADFIAP, ឯកឧត្តមបណ្ឌិត កៅ ថាច បានសម្តែងមោទន ភាពចំពោះលទ្ធផលនៃកិច្ចប្រជុំប្រចាំឆ្នាំនៃថ្នាក់ដឹកនាំជាន់ខ្ពស់នៃតំបន់អាស៊ី និងប៉ាស៊ីហ្វិកនេះ និងបានគូស បញ្ជាក់សាជាថ្មីពីសារៈសំខាន់នៃការជំរុញឱ្យមានការអភិវឌ្ឍសេដ្ឋកិច្ចតាមរយៈយុទ្ធសាស្ត្រជំរុញកំណើនខាងក្នុង នៃសហគ្រាស៕
