អន្តរជាតិ៖ រដ្ឋាភិបាលវៀតណាមបានបង្កើនការយកចិត្តទុកដាក់យ៉ាងខ្លាំងនូវគោលដៅសម្រាប់ប្រើប្រាស់ថាមពលដើរដោយកម្លាំងខ្យល់ និងពន្លឺព្រះអាទិត្យ ព្រមទាំងមានគោលបំណងបង្កើនការផលិតថាមពលនៅឆ្នាំ២០៣០ ដើម្បីបំពេញតម្រូវការកើនឡើងនៃការប្រើប្រាស់ពិសេសទៅលើវិស័យកសិកម្ម។
គម្រោងប្រើប្រាស់ថាមពលដើរដោយកម្លាំងខ្យល់ និងពន្លឺព្រះអាទិត្យនេះដែរ គឺឆ្លើយតបទៅនឹងការកើនឡើងនៃតម្រូវការអគ្គិសនី និងស្របតាមគោលដៅរបស់រដ្ឋាភិបាលក្នុងការកាត់បន្ថយថ្លៃដើមសម្រាប់ទាំងការវិនិយោគ និងការប្រើប្រាស់របស់ប្រជាពលរដ្ឋ។
ទីភ្នាក់ងារព័ត៌មាន AFP រាយការណ៍ពីទីក្រុងហាណូយ ប្រទេសវៀតណាម បាននិយាយកាលពីដើមសប្តាហ៍កន្លងមកថា ប្រទេសវៀតណាមបានប្តេជ្ញាសម្រេចឱ្យបាននូវការបំភាយកាបូនឌីអុកស៊ីតត្រឹមឆ្នាំ២០៥០ ហើយផែនការអភិវឌ្ឍន៍ថាមពលជាតិលើកទី៨ ដែលជាផែនការអភិវឌ្ឍន៍ថាមពលជាតិចុងក្រោយបង្អស់បានបញ្ជាក់ពីវិធីសាស្រ្តដើម្បីសម្រេចបាននូវគោលដៅនេះ។
ផែនការអភិវឌ្ឍន៍ថាមពលជាតិលើកទី៨ បានចែងបានថា “វៀតណាមពឹងផ្អែកយ៉ាងខ្លាំងលើធ្យូងថ្ម ដើម្បីបំពេញតម្រូវការថាមពល ដែលកំពុងកើនឡើងយ៉ាងឆាប់រហ័ស ប៉ុន្តែក្នុងពេលបច្ចុប្បន្ននេះ រដ្ឋាភិបាលចង់អភិវឌ្ឍយ៉ាងយកចិត្តទុកដាក់នូវប្រភពថាមពលកកើតឡើងវិញ”។
លោក អាន់ឌ្រីប្រាសេត ឡូយូ អ្នកស្រាវជ្រាវជាន់ខ្ពស់ប្រចាំនៅ Zenic Center Asia បាននិយាយថា ផែនការរបស់វៀតណាម “មើលទៅមានមហិច្ឆតាខ្លាំងណាស់” ជាមួយនឹងគោលដៅនៃការបង្កើតអគ្គិសនីពីថាមពលពន្លឺព្រះអាទិត្យ និងថាមពលដើរដោយខ្យល់នៅលើគោកជាមួយថាមពល៧៣ ជីហ្គាវ៉ាត់(GW)និង៣៨ ជីហ្គាវ៉ាត់ នៅឆ្នាំ២០៣០ និងកើនឡើងយ៉ាងខ្លាំងដល់២៩៦ជីហ្គាវ៉ាត់ និង ២៣០ជីហ្គាវ៉ាត់ នៅឆ្នាំ២០៥០។
លើសពីនេះ ផែនការអភិវឌ្ឍន៍ថាមពលជាតិលើកទី៨ សម្រាប់ឆ្នាំ២០២៣ កំណត់ទិសដៅផលិតអគ្គិសនីពីថាមពលពន្លឺព្រះអាទិត្យ និងថាមពលដើរដោយកម្លាំងខ្យល់១២.៨ ជីហ្គាវ៉ាត់ និង២១ជីហ្គាវ៉ាត់ នៅចុងទសវត្សរ៍នេះ។
លោក អាន់ឌ្រីប្រាសេត ឡូយូ បាននិយាយថា “ខ្ញុំគិតថា បញ្ហានេះវាបានបញ្ជូនសញ្ញាយ៉ាងច្បាស់ថា វៀតណាមកំពុងដាក់ផែនការដើម្បីរក្សាភាពជាអ្នកដឹកនាំរបស់អាស៊ីអាគ្នេយ៍ក្នុងការផ្លាស់ប្តូរថាមពលស្អាត និងដើរតួនាទីកាន់តែលេចធ្លោនៅក្នុងតំបន់។ គោលដៅថ្មីរបស់វៀតណាម បើទោះបីគេមើលឃើញថា លើសពីទីផ្សារទាក់ទងនឹងគោលដៅនេះក៏ដោយចុះ៕
