ប្រជាកសិករនៅក្នុងខេត្តមណ្ឌលគិរី ចាប់ផ្តើមមានចំណង់ចំណូលចិត្តដាំដំណាំបន្លែប្រភេទថ្មី ដែលមានប្រភពពូជពីប្រទេសជប៉ុន គឺដំណាំការ៉ុតឈ្មោះ “សាគោតា” ងាយដាំដុះ មិនពិបាកថែទាំច្រើន ព្រមទាំងមានតម្រូវការទីផ្សារថែមទៀតផង។
កសិកររស់នៅក្នុងសហគមន៍សាមគ្គីសែនមនោរម្យ ស្ថិតនៅភូមិចំការតែ សង្កាត់ស្ពានមានជ័យ ក្រុងសែនមនោរម្យ ខេត្តមណ្ឌលគិរី បានដាំដុះដើម្បីលក់នៅតាមទីផ្សារទំនើប និងផ្សារទូទៅ ដោយទទួលបានប្រាក់កម្រៃខ្ពស់គ្រាន់បើ។
ដំណាំការ៉ុតពូជជប៉ុននេះ កសិករត្រូវប្រើពេលវេលាដាំដុះរយៈពេល៣ខែ គិតចាប់ពីថ្ងៃដាក់គ្រាប់ រហូតដល់ថ្ងៃប្រមូលផល។
លោក ឡុង នី ប្រធានសហគមន៍សាមគ្គីសែនមនោរម្យ បានប្រាប់ពីរបៀបនៃការដាំដុះការ៉ុតនោះយ៉ាងដូច្នេះថា ការ៉ុតជាប្រភេទដំណាំមានគ្រាប់ល្អិត ដូច្នេះកសិករត្រូវមានការអត់ធ្មត់ នៅពេលដាក់ដាំគ្រាប់ ដោយមិនអាចព្រោះដូចគ្រាប់ដំណាំផ្សេងៗបាននោះទេ។
ប្រធានសហគមន៍សាមគ្គីសែនមនោរម្យ បានបញ្ជាក់ថា ’ក្នុងមួយថ្ងៃអាចដាំបានតែ២ ទៅ៣រង។ យើងព្យាយាមមែនទែនដើម្បីយកគ្រាប់តូចៗរបស់ការ៉ុតដាក់ក្នុងរង ដែលកសិករបានឆូត ព្រោះគ្រាប់ការ៉ុតតូចៗល្អិតពិបាកដាំបន្តិច”។
ដំណាំនេះមានភាពងាយស្រួលក្នុងការថែទាំ ព្រោះវាមិនសូវមានបញ្ហាប្រឈមជាមួយសត្វល្អិតចង្រៃច្រើននោះទេ ក្រោយពេលចាប់ដុះលូតលាស់។ ប៉ុន្តែវាក៏អាចមានជំងឺដែរ គឺអាស្រ័យទៅលើប្រភេទដី និងអាកាសធាតុ។ រីឯបញ្ហាប្រឈមការបំផ្លាញពីសត្វល្អិតវិញ មិនដូចដំណាំមួយចំនួននោះទេ។ នេះជាការរៀបរាប់របស់លោក ឡុង នី ដែលមានបទពិសោធន៍អនុវត្តដោយផ្ទាល់។
ចំពោះការស្រោចស្រព និងថែទាំវិញ ក្រោយពេលដាក់ដាំគ្រាប់រួច ត្រូវស្រោចទឹកឱ្យបានច្រើនដង ដោយក្នុងមួយថ្ងៃពី៤ ទៅ៥ដង ហើយស្រោចទឹកតិចៗ ដើម្បីកុំឱ្យស្ងួតដីផ្នែកខាងលើព្រោះវាអាចធ្វើឱ្យគា្រប់ ដែលរីកលូតលាស់មកហើយអាចនឹងស្វិតទៅវិញ។ ក្នុងរយៈពេល១សប្ដាហ៍ ការ៉ុតអាចដុះពន្លក និងចេញត្រួយបណ្តើរៗ។
ដំណាំនេះប្រើពេលវេលាលម្អិត ក្នុងការថែទាំដកស្មៅក្នុងមួយវដ្ដជីវិតរបស់វា សម្អាតស្មៅ៣ ទៅ៤ដង ដែលប្រើដៃសម្អាតស្មៅដោយផ្ទាល់តែម្តង។ ដំណាំការ៉ុតចំណាយពេលយូរជាងដំណាំផ្សេងៗ ដែលមានរយៈពេលរហូតដល់៣ខែ ទើបអាចប្រមូលផលបាន។
លោក ឡុង នី បានបញ្ចាក់ថា៖ “ចំពោះការប្រមូលផល គឺសម្គាល់ទៅលើអាយុកាលរបស់ការ៉ុត ហើយនឹងទំហំនៃតម្រូវការទីផ្សារ។ ដោយសារអំណោយផលពីដីក្នុងតំបន់ និងអាកាសធាតុនៅក្នុងខេត្តមណ្ឌលគិរីផងនោះ ការ៉ុតក្នុង១ម៉ែត្រម៉ែត្រការ៉េ ប្រមូលផលបានចន្លោះពី៣ទៅ៤គីឡូក្រាម ហើយក្នុង១គីឡូ ៤៥០០រៀល ឬអាចប្រែប្រួលទៅតាមតម្លៃទីផ្សារ”។
បើគិតទៅលើចំណូល និងចំណាយទៅលើដំណាំការ៉ុតនេះ លោក ឡុង នី បានលើកឡើងថា ភាគរយចំណេញអាចបាន៦០% បន្ទាប់ពីទូទាត់ថ្លៃដើម ដោយសារការដាំដុះដំណាំការ៉ុតចំណាយច្រើនតែលើការជួលអ្នកដកស្មៅនោះទេ។ ចំណែកគ្រាប់មួយកញ្ចប់ធំតម្លៃ៦២ដុល្លារ មានរហូតដល់ជាង១០ម៉ឺនគ្រាប់ ដែលអាចឱ្យកសិករដាំបានច្រើនដង និងងាយស្រួលក្នុងការរកទីផ្សារ៕
