អន្តរជាតិ៖ ពិព័រណ៍ផលិតផលនាំចេញឆ្នើមរបស់វៀតណាមឆ្នា២០២៥ បានប្រមូលផ្តុំស្តង់ជាង៧០០ ស្តង់ ដែលតាំងបង្ហាញផលិតផលសំខាន់ៗដូចជា ផលិតផលកសិកម្ម ម្ហូបអាហារ សិប្បកម្ម វាយនភណ្ឌ និងបច្ចេកវិជ្ជាកែច្នៃម្ហូបអាហារ។ ពិព័រណ៍នេះរៀបចំឡើងដោយនាយកដ្ឋានឧស្សាហកម្ម និងពាណិជ្ជកម្មទីក្រុងហូជីមិញ ដែលបានប្រព្រឹត្តទៅពីថ្ងៃទី២៧ ដល់ថ្ងៃទី២៩ ខែមីនា ឆ្នាំ២០២៥។
អ្នកទិញអន្តរជាតិប្រមាណ២០០នាក់មកពីប្រទេសចិន កូរ៉េខាងត្បូង ឥណ្ឌា ម៉ាឡេស៊ី សិង្ហបុរី ថៃ សហរដ្ឋអាម៉េរិក និងជប៉ុន បានមកចូលរួមពិព័រណ៌នេះផងដែរ។
លោក ង្វៀង វ៉ាន់ដុង (Nguyen Van Dung) អនុប្រធានគណៈកម្មាធិការប្រជាជនទីក្រុងហូជីមិញបានមានប្រសាសន៍ថា ពិព័រណ៍ឆ្នាំនេះផ្តោតលើយុទ្ធសាស្ត្រនាំចេញក្នុងទិសដៅ “បៃតង – ស្អាត – ឌីជីថល” ដើម្បីសម្របទៅនឹងតម្រូវការនៃទីផ្សារពិភពលោក។ ក្នុងនោះ ផ្តោតលើការជំរុញការនាំចេញបៃតង ការលើកកម្ពស់ផលិតកម្ម និងការនាំចេញផលិតផល ដែលមិនប៉ះពាល់ដល់បរិស្ថាន និងបំពេញតាមស្តង់ដារអន្តរជាតិ។ ជំរុញការផ្លាស់ប្តូរឌីជីថលក្នុងពាណិជ្ជកម្ម ជាមួយនឹងកម្មវិធី បញ្ញាសិប្បនិម្មិត និងពាណិជ្ជកម្មអេឡិចត្រូនិច ដើម្បីបង្កើនប្រសិទ្ធភាពបណ្តាញចែកចាយ និងការចូលទៅកាន់ទីផ្សារកាន់តែលឿន។
យោងតាមអនុប្រធានគណៈកម្មាធិការប្រជាជនទីក្រុងហូជីមិញ គណៈប្រតិភូមកពីប្រទេសចិន និងកូរ៉េខាងត្បូង ដែលជាទីផ្សារសំខាន់សម្រាប់កសិផលវៀតណាម បានសម្តែងចំណាប់អារម្មណ៍នឹងឱកាសសហប្រតិបត្តិការក្នុងពិព័រណ៍ឆ្នាំនេះ។
លោក ង្វៀង វ៉ាន់ដុង បានលើកឡើងថា «ជាមួយនឹងតម្រូវការផលិតផលកសិកម្ម ដែលមានគុណភាពខ្ពស់ ជាពិសេសសំបុកបក្សី និងយិនស៊ិន ដៃគូអន្តរជាតិនឹងតភ្ជាប់ និងអភិវឌ្ឍផលិតផលទាំងនេះ នាំមកនូវឱកាសដ៏អស្ចារ្យសម្រាប់អាជីវកម្មវៀតណាម»។
ចំណែកនាយកទីភ្នាក់ងារជំរុញពាណិជ្ជកម្មវៀតណាមនៃក្រសួងឧស្សាហកម្ម និងពាណិជ្ជកម្ មបានឱ្យដឹងថា ពិព័រណ៍ផលិតផលនាំចេញឆ្នើមរបស់វៀតណាម គឺជាផ្នែកមួយដ៏សំខាន់នៃយុទ្ធសាស្ត្ររបស់ក្រសួងឧស្សាហកម្ម និងពាណិជ្ជកម្ម ដើម្បីគាំទ្រសហគ្រាសវៀតណាម ក្នុងការពង្រីកឱកាសទីផ្សារ និងជំរុញកិច្ចសហប្រតិបត្តិការអន្តរជាតិ និងការអភិវឌ្ឍប្រកបដោយចីរភាព ដែលជាផ្នែកមួយជួយអាជីវកម្មវៀតណាមស្វែងរកដៃគូ ពង្រីកបណ្តាញចែកចាយ និងកែលម្អតម្លៃម៉ាកយីហោជាតិ។
ពិព័រណ៍នេះបានទាក់ទាញការចូលរួមពីវេទិកាពាណិជ្ជកម្មអេឡិចត្រូនិកឈានមុខគេរបស់ពិភពលោក ជាពិសេសវេទិកាឆ្លងព្រំដែនដូចជា Alibaba បើកឱកាសដើម្បីនាំយកផលិតផលវៀតណាមទៅកាន់អតិថិជនអន្តរជាតិដោយផ្ទាល់ និងជំរុញការនាំចេញតាមរយៈបណ្តាញពាណិជ្ជកម្មអេឡិចត្រូនិក៕
