សៅប៉ូឡូ៖ ក្រុមអង្គការក្រៅរដ្ឋាភិបាលនៅក្នុងប្រទេសប្រេស៊ីល កាលពីថ្ងៃទី២០ ខែមីនា ឆ្នាំ២០២៥ បានចាប់ផ្តើមបង្កើតមូលនិធិមួយតាមរយៈការរៃអង្គាសប្រាក់ឲ្យបានយ៉ាងហោចណាស់ចំនួន១៧៦លានដុល្លារ នៅត្រឹមឆ្នាំ២០៣០ ដើម្បីបម្រុងទុកជាប្រាក់កម្ចីដល់អ្នកដាំកាកាវខ្នាតតូច អាចយកទៅជួយក្នុងការពង្រីកការដាំដុះរបស់ពួកគេ។
មូលនិធិនេះត្រូវបានផ្តួចផ្តើមឡើងដោយវិទ្យាស្ថានស្រាវជ្រាវ សហការជាមួយអង្គការសប្បុរសធម៌ ក្រុមតស៊ូមតិ និងអ្នកវិនិយោគ ដែលធ្លាប់ផ្តល់ប្រាក់កម្ចីលើកដំបូងចំនួនជាងបីលានដុល្លារដល់កសិករដាំដំណាំកាកាវខ្នាតតូចចំនួន១២០០នាក់ នៅក្នុងប្រទេសប្រេស៊ីល។
អ្នកគ្រប់គ្រងសេដ្ឋកិច្ចកសិកម្មប្រេស៊ីល បាននិយាយថា ជាទូទៅ កសិករដាំដំណាំកាកាវខ្នាតតូចទាំងនេះ តែងតែជួបការលំបាកក្នុងការទទួលបានឥណទានសម្រាប់ជួយទ្រទ្រង់របរកសិកម្មដាំដុះរបស់ពួកគេ រួមទាំងខ្វះចំណេះដឹងក្នុងការបង្កើនផលិតភាពផងដែរ។
លោកបាននិយាយថា «ភាគច្រើននៃផលិតកម្មកាកាវ គឺស្ថិតនៅក្នុងដៃរបស់ផលិតករតូចតាច ហើយអ្នកផលិតទទួលបានផលប្រយោជន៍តូចតាចដែរ ដោយសារពួកគេមិនមានលទ្ធភាពវិនិយោគបន្ថែម ហើយពួកគេថែមទាំងមិនមានលទ្ធភាពទទួលបានជំនួយផ្នែកបច្ចេកទេសទាល់តែសោះ»។
ក្រុមអ្នកជំនាញផ្នែកដំណាំកាកាវ បានលើកឡើងថា ការចាប់ផ្តើមបង្កើតមូលនិធិសម្រាប់ជួយកសិករតូចតាចនេះ គឺធ្វើឡើងក្នុងពេលវេលាដ៏លំបាកសម្រាប់ឧស្សាហកម្មនេះ ដោយសារតែប្រទេសផលិតកាកាវធំជាងគេលើពិភពលោក មានដូចជាប្រទេសកូតឌីវ័រ និងប្រទេសហ្គាណា បានទទួលរងការខាតបង់ដំណាំកាកាវនេះយ៉ាងធ្ងន់ធ្ងរដោយសារតែអាកាសធាតុមិនល្អ ព្រមទាំងដំដាំសណ្ដែកសៀងមានជំងឺ ការរត់ពន្ធខុសច្បាប់ និងការកាត់បន្ថយផ្ទៃដីដាំដំណាំកាកាវ ដើម្បីរក្សាទុកដីឲ្យនៅទំនេរសម្រាប់ជីកយករ៉ែមាសដោយខុសច្បាប់ទៅវិញ។
ចំណែកប្រធានសមាគមឧស្សាហកម្មកែច្នៃកាកាវរបស់ប្រទេសប្រេស៊ីល បានមានប្រសាសន៍ថា កាលពីឆ្នាំ២០២៤ ការផលិតកាកាវរបស់ប្រទេសប្រេស៊ីលបានធ្លាក់ចុះប្រមាណ២០ភាគរយ ហើយនៅឆ្នាំ២០២៥មេះ បញ្ហាខ្វះជំនួយដល់កសិករដាំដំណាំកាកាវកំពុងក្លាយជាការប្រឈមរបស់ពួកគេ។
យោងតាមសេចក្តីថ្លែងការណ៍របស់មូលនិធិនេះ បានឱ្យដឹងថា មូលនិធិនឹងផ្តល់ប្រាក់កម្ចីដល់កសិករដាំកាកាវរយៈពេលបីឆ្នាំ ដើម្បីសងប្រាក់កម្ចីមកវិញ រួមជាមួយនឹងរយៈពេលអនុគ្រោះជាមធ្យមប្រាំមួយខែ។ ប្រាក់កម្ចីខាងលើនេះ ត្រូវយកទៅប្រើដើម្បីទិញជី កសាងប្រព័ន្ធធារាសាស្រ្ត និងទិញឧបករណ៍ប្រើប្រាសផ្សេងៗ ដោយគិតការប្រាក់ចំនួន១២ភាគរយក្នុងមួយឆ្នាំ។
សេចក្តីថ្លែងការណ៍ដដែល បាននិយាយទៀតថា នៅក្នុងប្រទេសប្រេស៊ីល ៨៥ភាគរយនៃអ្នកផលិតកាកាវ គឺមិនស្ថិតនៅក្នុងប្រព័ន្ធអនុគ្រោះផ្នែកហិរញ្ញវត្ថុរបស់ប្រទេសទេ ហើយពូកគេពិបាកទទួលបានប្រាក់កម្ចីណាស់។
សេចក្តីថ្លែងការណ៍បានបន្តនិយាយថា ៨០ភាគរយនៃផលិតផលកាកាវរបស់ប្រទេសប្រេស៊ីល គឺបានមកពីកសិករខ្នាតតូច ដែលរកបានប្រាក់ចំណូលទាប និងមានសមត្ថភាពផលិតកាកាវបានតិចតួច។ ដូច្នេះ តាមរយៈមូលនិធិបង្កើតឡើង ប្រាក់កម្ចីនេះ គឺសម្រាប់អ្នកផលិតកាកាវដោយប្រើប្រាស់វិធីសាស្រ្តកសិ-រុក្ខាប្រមាញ់ ព្រមលើកទឹកចិត្តដល់ការអភិរក្សព្រៃឈើ និងការដាំដើមឈើឡើងវិញ នៅក្នុងប្រទេសប្រេស៊ីល៕
