ដោយ អៀវ ឈៀងនី
ភ្នំពេញ៖ កសិករដាំដំឡូងមីសរីរាង្គនៅខេត្តព្រះវិហារ កំពុងរីករាយនិងការប្រមូលផលនៅឆ្នាំ២០២៦នេះ ខណៈការដាំដុះពូជដំឡូងមីសរីរាង្គរបស់ខ្លួន ទទួលបានទិន្នផលខ្ពស់ និងគ្មានជំងឺ ស្របពេលការទទួលបានលំនឹងទីផ្សារល្អ និងមានស្ថេរភាពតម្លៃ ដោយលក់ចេញទៅឱ្យក្រុមហ៊ុនប្រមូលទិញ ក្នុងមួយគីឡូថ្លៃជាង២៦២រៀល សម្រាប់ដំឡូងមីស្រស់។
លោក ពឹង ទ្រីដា ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តព្រះវិហារ បានប្រាប់ទូរទស្សន៍អនឡាញ ARDB ថា នៅឆ្នាំ២០២៦នេះ ខេត្តព្រះវិហារ មានសហគមន៍កសិកម្មចំនួន ០៩សហគមន៍ បានចុះកិច្ចសន្យាលក់ជូនក្រុមហ៊ុន CACC ក្នុងបរិមាណចំនួន៦២ពាន់តោន ដោយមានកសិករផលិតដំឡូងមីសរីរាង្គចំនួន១ ១៦៦គ្រួសារ លើផ្ទៃដីផលិតសរុប២៣០៨ហិតតា។
លោកបានបន្តថា សហគមន៍កសិកម្មសាមគ្គីភ្នំពេជ្របូរី ស្ថិតក្នុងភូមិស្របាល ស្រុកគូលែន ខេត្តព្រះវិហារ ជាសហគមន៍មួយក្នុងចំណោមសហគមន៍ទាំងប្រាំបួនខាងលើ ដែលមានសមាជិកសរុបចំនួន៦៦៧នាក់ ស្រី៣៣៧នាក់។ ក្នុងឆ្នាំ២០២៦នេះ សហគមន៍មានសមាជិកផលិតដំឡូងមីសរុបចំនួន២៦៧គ្រួសារ លើផ្ទៃដីផលិតសរុបចំនួន៧៤០ហិកតា និងបានចុះកិច្ចសន្យារួមគ្នា លក់ជូនក្រុមហ៊ុន CACC ចំនួន ១៣ ០០០តោន។
គិតត្រឹមថ្ងៃទី២៦ ខែមករា ឆ្នាំ២០២៦ ក្រុមហ៊ុន CACC បានប្រមូលទិញដំឡូបពីសហគមន៍ខាងលើបានចំនួនប្រាំថ្ងៃមកហើយ ដែលសកម្មភាពនេះនឹងបន្តទិញរហូតគ្រប់ចំនួនតាមកិច្ចសន្យា ដែលតម្លៃកិច្ចសន្យា បច្ចុប្បន្នសហគមន៍ទទួលបានក្នុងតម្លៃពីក្រុមហ៊ុនចំនួន២៦២,២៥រៀល ក្នុងមួយគីឡូក្រាម សម្រាប់ដំឡូងមីស្រស់។
បើតាមប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តព្រះវិហារ បានឱ្យដឹងបន្ថែមថា តាមរយៈកិច្ចសន្យាជាមួយក្រុមហ៊ុន កសិករទទួលបានអត្ថប្រយោជន៍ជាច្រើន ដូចជាទទួលបានការគាំទ្រពីក្រុមហ៊ុនដៃគូ វគ្គបណ្តុះបណ្តាលបច្ចេកទេស និងធាតុចូលកសិកម្មជាដើម។ លើសពីនេះ កសិករផលិតទទួលបានលំនឹងទីផ្សារ ស្ថេរភាពតម្លៃល្អ និងពូជដំឡូងមី ដែលមានទិន្នផលខ្ពស់ គ្មានជំងឺ មិនមានកាត់ភាគរយទម្ងន់ ឧទាហរណ៍កសិករអាចលក់ដំឡូងមួយតោន ទទួលបានថវិកាស្មើនិង១០០០គីឡូក្រាម ដោយថ្លឹងជញ្ជីងសហគមន៍ មានភាពសុក្រិតល្អ មិនស៊ីភ្នែកជញ្ជីង។
ដំណាំដំឡូងមី បានដើរតួនាទីយ៉ាងសំខាន់ក្នុងការលើកកម្ពស់ជីវភាពប្រជាជននៅតាមទីជនបទ បើទោះបីដំឡូងមីមិនមែនជាអាហារមូលដ្ឋានសម្រាប់ចិញ្ចឹមជីវិតរបស់ប្រជាជនកម្ពុជាក្តី ប៉ុន្តែវាជាដំណាំសំខាន់បំផុតបន្ទាប់ពីស្រូវ និងពោត ដែលត្រូវបានដាំដុះដោយប្រជាកសិករនៅតាមទីជនបទ និងបានក្លាយទៅជាដំណាំសក្តានុពល ដោយសារការដាំដុះ និងបរិមាណនៃផលិតផល មានការពង្រីកច្រើនឡើងៗយ៉ាងឆាប់រហ័ស។
យោងតាមរបាយការណ៍របស់ក្រសួងកសិកម្ម បានឱ្យដឹងថា កម្ពុជាបាននាំចេញផលិតផលកសិកម្មចំនួន១៤,៩លានតោន ក្នុងឆ្នាំ២០២៥ កើនឡើង២៧,៨ភាគរយ បើធៀបនឹងរយៈពេលមួយឆ្នាំដូចគ្នា ដោយបានបង្កើតប្រាក់ចំណូលប្រហែល៥ ០០០លានដុល្លារ។
នៅក្នុងគោលនយោបាយជាតិដំឡូងមី ឆ្នាំ២០២០-២០២៥ បានកំណត់គោលដៅផ្លាស់ប្តូរពីផលិតកម្មដំឡូងមីបែបប្រពៃណី ឬគ្រួសារឱ្យទៅជាផលិតកម្មដំឡូងមីបែបពាណិជ្ជកម្ម និងការអនុវត្តតាមគោលការណ៍បច្ចេកទេស ដែលកសិករអាចទទួលបានប្រាក់ចំណូលខ្ពស់។
នៅឆ្នាំ២០២៥ ក្រសួងពាណិជ្ជកម្មបានជំរុញ និងពង្រីកទីផ្សារនាំចេញដំឡូងមីរហូតដល់ប្រមាណ១០ លានតោន ទៅកាន់ទីផ្សារអន្តរជាតិ ខណៈមន្រ្តីក្រសួងពាណិជ្ជកម្មបានអះអាងថា កម្ពុជាបានបង្កើនការកែច្នៃលើកកម្ពស់គុណភាពដំឡូងមីស្របតាមតម្រូវការទីផ្សារ៕
