ទីក្រុងប៉េកាំង៖ ចិននាំចូលសណ្តែកសៀងពីសហរដ្ឋអាមេរិក កើនឡើង៨៤,១ភាគរយ ក្នុងរយៈពេលពីរខែដំបូងនៃដើមឆ្នាំ២០២៥ បើធៀបនឹងឆ្នាំមុន ប៉ុន្តែតម្លៃប្រកួតប្រជែងលើទីផ្សារ និងការប្រឈមមុខដាក់គ្នាក្នុងសង្គ្រាមពាណិជ្ជកម្មជាមួយសហរដ្ឋអាមេរិក ត្រូវបានគេរំពឹងទុកថា ចិនងាកទៅទិញសណ្តែកសៀងពីប្រទេសប្រេស៊ីល នៅក្នុងប៉ុន្មានខែខាងមុខទៀត។
ក្នុងនាមជាអ្នកទិញសណ្តែកសៀងលំដាប់កំពូលរបស់ពិភពលោក ប្រទេសចិនបាននាំចូលសណ្តែកសៀងចំនួន៩,១៣លានតោនពីសហរដ្ឋអាមេរិក គិតក្នុងខែមករា ដល់ខែកុម្ភៈ ឆ្នាំ២០២៥ គឺកើនឡើងពី៤,៩៦លានតោន នៅក្នុងរយៈពេលដូចគ្នាកាលពីឆ្នាំ២០២៤។
អ្នកវិភាគផ្នែកកសិកម្មនៅទីក្រុងសៀងហៃ ប្រទេសចិន បាននិយាយថា «ការកើនឡើងនៃការសម្រុកនាំចូលសណ្តែកសៀងរបស់សហរដ្ឋអាមេរិក គឺដោយសារតែឥទ្ធិពលនៃឱសានវាទរបស់ប្រធានាធិបតីអាមេរិក លោក ដូណាល់ ត្រាំ ដែលធ្វើឲ្យមានការព្រួយបារម្ភអំពីពន្ធឡើងខ្ពស់ ទើបនាំឱ្យមានការប្រញាប់ទិញសណ្តែកសៀងនាំចូល»។
អ្នកវិភាគរូបនេះបានបន្ថែមថា ការពន្យារពេលដាំដុះរបស់កសិករប្រេស៊ីល ក៏អាចចាត់ទុកជាការប្រមូលផលយឺតយ៉ាវ ដែលនាំឱ្យមានការបញ្ជាទិញសណ្តែកសៀងរបស់អាមេរិកកាន់តែច្រើនឡើង ដើម្បីបំពេញតម្រូវការទីផ្សារក្នុងប្រទេសចិន។
ការនាំចូលសណ្តែកសៀងពីប្រទេសប្រេស៊ីលរបស់ចិន ក្នុងខែមករា ដល់ខែកុម្ភៈ ឆ្នាំ២០២៥ បានធ្លាក់ចុះពី៦,៩៦លានតោន កាលពីដើមឆ្នាំ២០២៤ មកនៅត្រឹម៣,៥៩លានតោនប៉ុណ្ណោះ។
យោងតាមទិន្នន័យរបស់អាជ្ញាធរគយចិន បានបង្ហាញនៅដើមខែមីនានេះថា ការនាំចូលសណ្តែកសៀងសរុបក្នុងអំឡុងខែមករា ដល់ខែកុម្ភៈ ឆ្នាំ២០២៥ បានកើនឡើងដល់១៣,៦១លានតោន ខណៈទំនិញរបស់សហរដ្ឋអាមេរិក ដែលត្រូវបានបញ្ជាក់ឱ្យនាំចេញមុនពេលលោកប្រធានាធិបតី ដូណាល់ ត្រាំ ចូលកាន់តំណែងម្លេះ ប៉ុន្តែពាណិជ្ជករនាំចេញសណ្តែកសៀងរំពឹងទុកថា នឹងមានការធ្លាក់ចុះទៅវិញ នៅចុងខែមីនា ឆ្នាំ២០២៥នេះ។
កាលពីដើមខែនេះ រដ្ឋាភិបាលទីក្រុងប៉េកាំង បានចេញប្រតិកម្មប្រឆាំងនឹងអត្រាពន្ធថ្មីរបស់សហរដ្ឋអាមេរិក ដោយការដំឡើងពន្ធលើផលិតផលកសិកម្ម ដែលមានតម្លៃរហូតដល់២១ពាន់លានដុល្លារ រួមទាំងពន្ធបន្ថែមលើសណ្តែកសៀង ដែលនាំឲ្យមានការគិតទុកជាមុនថា ប្រទេសចិននឹងងាកទៅរកការផ្គត់ផ្គង់សណ្តែកសៀបពីប្រេស៊ីលវិញ។
ប្រទេសប្រេស៊ីល ដែលជាអ្នកនាំចេញសណ្តែកសៀងធំជាងគេលើពិភពលោក គឺជាដៃគូប្រកួតប្រជែងជាមួយសហរដ្ឋអាមេរិកក្នុងការនាំចេញផលិតផលសណ្តែកសៀងទៅកាន់ទីផ្សារសំខាន់ៗរបស់ពិភពលោក មានដូចជាប្រទេសចិនជាដើម។
ប្រទេសប្រេស៊ីល បច្ចុប្បន្នកំពុងតែស្ថិតក្នុងដំណាក់កាលប្រមូលផលសណ្តែកសៀងដ៏ច្រើន សន្ធឹកសន្ធប់ ចំណែកគោលដៅនៃការនាំចេញធំបំផុតវិញ ត្រូវបានគេរំពឹងថា គឺប្រទេសចិនតែម្តង។
ទីភ្នាក់ងារប្រឹក្សាពាណិជ្ជកម្មរបស់ប្រទេសប្រេស៊ិល បាននិយាយថា ការប្រមូលផលសណ្តែកសៀងរបស់ប្រទេសប្រេស៊ីលសម្រាប់រដូវកាល២០២៤-២០២៥ បានកើនដល់៧០ភាគរយនៃផ្ទៃដីដាំដុះ ដែលបង្ហាញឱ្យឃើញល្បឿនដ៏ខ្លាំងបំផុត ក្នុងរយៈពេល១៤ឆ្នាំកន្លងមកនេះ៕
