ដោយ នៅ ស៊ីវុត្ថា
ព្រៃវែង-កំពង់ចាម៖ ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម (ARDB) នៅថ្ងៃទី៥ ខែកញ្ញា ឆ្នាំ២០២៦ បានដឹកនាំសហការី និងថ្នាក់ដឹកនាំនៃសហព័ន្ធស្រូវអង្ករកម្ពុជា (CRF)ចុះតាមដានពិនិត្យសកម្មភាព និងជំរុញខ្សែង្វាក់អាជីវកម្មរបស់រោងម៉ាស៊ីនកិនស្រូវចំនួន៣ ទីតាំង ស្ថិតនៅស្រុកស្វាយអន្ទរ ខេត្តព្រៃវែងឱ្យមានប្រសិទ្ធភាព និងនិរន្តភាព។
រោងម៉ាស៊ីនកិនស្រូវទាំង៣ មាន ទី១ រោងម៉ាស៊ីនកិនស្រូវ ឈិត ប៊ុនថន ស្ថិតនៅភូមិក្រចាប៣ ឃុំព្រៃខ្លា ស្រុកស្វាយអន្ទរ ខេត្តព្រៃវែង,ទី២ រោងម៉ាស៊ីនកិនស្រូវ រស់ ណេង និងទី៣ រោងមាស៊ីនកិនស្រូវ ឈុន ធំ ស្ថិតនៅភូមិស្វាយអន្ទរ ឃុំស្វាយអន្ទរ ស្រុកស្វាយអន្ទរ ខេត្តព្រៃវែង ដែលមានសកម្មភាពសំខាន់ជាច្រើនចាប់ពីការស្តុកទុក ការកិនកែច្នៃ ការវេចខ្ចប់ រហូតដល់ការចែកចាយអង្ករទៅកាន់ទីផ្សារក្នុងស្រុក និងការនាំចេញ។
បន្ទាប់មកនៅថ្ងៃដដែលនេះ ឯកឧត្តមបណ្ឌិត កៅ ថាច និងសហការី បានចុះពិនិត្យមើលរោងម៉ាស៊ីនកិនស្រូវ៣ ទីតាំងផ្សេងទៀត ស្ថិតនៅក្នុងខេត្តកំពង់ចាម មានទី១. រោងម៉ាស៊ីនកិនស្រូវ យូ ឃីម (You Khim Rice Mill) ស្ថិតនៅភូមិផ្អាវ ឃុំផ្អាវ ស្រុកបាធាយ ខេត្តកំពង់ចាម តាមបណ្តោយផ្លូវជាតិលេខ៦។ ទី២. រោងម៉ាស៊ីនកិនស្រូវ សេកមាស ស្ថិតនៅភូមិតាសែន ឃុំសូទិព្វ ស្រុកជើងព្រៃ ខេត្តកំពង់ចាម និងទី៣. រោងម៉ាស៊ីនកិនស្រូវ ភូមិយើង ស្ថិតនៅភូមិស្វាយ ឃុំបាធាយ ស្រុកបាធាយ ខេត្តកំពង់ចាម។
ការចុះពិនិត្យរោងម៉ាស៊ីនកិនស្រូវទាំងនេះ គឺជាផ្នែកមួយនៃការជំរុញ និងពង្រឹងខ្សែសង្វាក់តម្លៃវិស័យស្រូវអង្ករ ព្រមទាំងលើកកម្ពស់សមត្ថភាពកែច្នៃ និងប្រកួតប្រជែងរបស់សហគ្រាសក្នុងស្រុក ដើម្បីចូលរួមបង្កើនតម្លៃបន្ថែមដល់ផលិតផលកសិកម្ម និងជួយបង្កើនទីផ្សារសម្រាប់ស្រូវរបស់ប្រជាកសិករកម្ពុជា។
ជាងនេះទៅទៀត ការចុះពិនិត្យនេះក៏បានផ្តល់ជាមូលដ្ឋានសម្រាប់ការយល់ដឹងកាន់តែច្បាស់អំពីតម្រូវការ និងស្ថានភាពប្រតិបត្តិការរបស់សហគ្រាសក្នុងខ្សែសង្វាក់កសិកម្ម ដែលមានទំនាក់ទំនងដោយផ្ទាល់ជាមួយកសិករ និងទីផ្សារកសិផលរបស់កម្ពុជានៅលើទីផ្សារពិភពលោក។
ក្នុងឱកាសនេះ ឯកឧត្តមបណ្ឌិត កៅ ថាច បានជំរុញឱ្យម្ចាស់រោងម៉ាស៊ីនបន្តយកចិត្តទុកដាក់លើការវិនិយោគលើបច្ចេកវិទ្យា និងការពង្រីកសមត្ថភាពផលិតកម្ម ដើម្បីឱ្យការកែច្នៃស្រូវអាចសម្រេចបានគុណភាពខ្ពស់ កាត់បន្ថយការខាតបង់ និងបង្កើនតម្លៃបន្ថែមសម្រាប់ផលិតផលស្រូវអង្ករកម្ពុជា៕
