ដោយ ឡុង សារេត
ភ្នំពេញ៖ ដោយទទួលបានការអនុញ្ញាតដ៏ខ្ពង់ខ្ពង់ពីឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម( ARDB) នៅរសៀលថ្ងៃទី២៦ ខែសីហា ឆ្នាំ២០២៦នេះ លោក គិត ខេមរារិទ្ធ ប្រធាននាយកដ្ឋានផ្នែកលក់ និងទីផ្សារ និងសហការី បានអញ្ជើញចូលរួមក្នុងកម្មវិធីវេទិកាធុរកិច្ច និងនវានុវត្តន៍ ឆ្នាំ២០២៦ ដែលរៀបចំដោយសភាពាណិជ្ជកម្មកម្ពុជា។
វេទិកានេះធ្វើឡើងនៅមណ្ឌលសន្និបាត អូស៊ីអាយស៊ី ជ្រោយចង្វារ ក្រោមអធិបតីភាពដ៏ខ្ពង់ខ្ពស់ឯកឧត្តមអ្នកឧកញ៉ា ហ៊ឺ បាវី ប្រតិភូរាជរដ្ឋាភិបាលទទួលបន្ទុកជាប្រធានអគ្គនាយកកំពង់ផែស្វយ័តភ្នំពេញ អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធានក្រុមប្រឹក្សាភិបាលពិគ្រោះយោបល់ធុរកិច្ចអាស៊ាន សម្រាប់កម្ពុជា រួមនិងភ្ញៀវកិក្តិយសផ្សេងទៀតប្រមាណ៥០០នាក់។
ឧកញ៉ា លឹម សុជាតិ អនុប្រធានសភាពាណិជ្ជកម្មកម្ពុជា បានមានប្រសាសន៍ថា លទ្ធផលទទួលបានពីការរៀបចំវេទិកាធុរកិច្ច និងនវានុវត្តន៍ កាលពីឆ្នាំ២០២៥កន្លងទៅ បានក្លាយទៅជាបទពិសោធន៍ដ៏ល្អសម្រាប់ម្ចាស់អាជីវកម្មយកទៅកែលម្អអាជីវកម្មរបស់ខ្លួន និងអនុវត្តបានចំគោលដៅសំដៅកាត់បន្ថយហានិភ័យ និងសម្រេចបានការវិវត្តន៍សេដ្ឋកិច្ចទាំងនៅក្នុងក្រុមហ៊ុន ក្នុងតំបន់ និងសកលលោក។
ឧកញ៉ាបន្តទៀតថា វេទិកាធុរកិច្ច និងនវានុវត្តន៍ ឆ្នាំ២០២៦នេះ ក៏មិនខុសពីឆ្នាំកន្លងទៅដែរ គឺក្នុងគោលបំណងចែករំលែកនូវព័ត៌មានថ្មីៗ ស្តីពីការប្រែប្រួលរចនាសម្ព័ន្ធសេដ្ឋកិច្ចសកល ដែលកំពុងទទួលរងឥទ្ធិពលអវិជ្ជមានជាច្រើន បណ្តាលមកពីភាពតានតឹងផ្នែកភូមិសាស្ត្រនយោបាយ សង្គ្រាមនៅមជ្ឈឹមបូព៌ា សង្គ្រាមរវាងរុស្ស៊ី និងអ៊ុយក្រេន។ ស្ថានភាពតានតឹងនៅតាមបណ្តោយព្រំដែនកម្ពុជាថៃ ដែលបានបង្កការលំបាកជាច្រើនដល់សកម្មភាពពាណិជ្ជកម្ម និងអាជីវកម្មនៅក្នុងប្រទេសកម្ពុជា ក៏ដូចជាប្រទេសជាច្រើនផ្សេងទៀតនៅលើសកលលោក។
ក្នុងឱសនេះដែរ អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា ក៏បានលើកឡើងពីគោលបំណងនៃការរៀបចំវេទិកាធុរកិច្ច និងនវានុវត្តន៍មានដូចជា បញ្ហានវានុវត្តន៍, បញ្ហាសង្គ្រាមរវាងរុស្ស៊ី -អ៊ុយក្រេន, បញ្ហាពាក់ព័ន្ធនូវមជ្ឈឹមបូព៌ា ដែលកំពុងឡើងកម្ដៅទាក់ទងបញ្ហាប្រេង និងជីគីមី និងចំណុចមួយផ្សេងទៀតពាក់ព័ន្ធបញ្ហាព្រំដែនកម្ពុជា ដែលកំពុងមានបញ្ហាធ្វើឱ្យការដឹកជញ្ជូនឡើងថ្លៃ។ ទន្ទឹមនឹងនេះរាជរដ្ឋាភិបាលខិតខំប្រឹងប្រែងប្រយុទ្ធប្រឆាំងបញ្ហាឆបោកតាមប្រព័ន្ធបច្ចេកវិទ្យា ឬ Online Scams ដើម្បីកម្ពុជាមានភាពស្អាតស្អំ សម្រាប់ឱ្យកម្ពុជាងាយស្រួលក្នុងការទាក់ទាញអ្នកវិនិយោគពីប្រទេសនានាផងដែរ។
សូមជម្រាបជូនផងដែរថា ក្នុងវេទិកាធុរកិច្ច និងនវានុវត្តន៍ ក៏មានកិច្ចពិភាក្សាផ្តោតលើប្រធានបទ ការបង្កើនប្រសិទ្ធភាពវិស័យដឹកជញ្ជូន និងភស្តុភាកម្មសម្រាប់ការប្រកួតប្រជែងក្នុងពាណិជ្ជកម្មសកល ដែលមានវាគ្មិនកិត្តិយសចូលរួមពីលោក JOHN GUIRY នាយកប្រតិបត្តិនៃក្រុមហ៊ុន រ៉ូយ៉ាល់ រេលវ៉េ, អ្នកឧកញ៉ាបណ្ឌិត សូរ វីរៈ នាយកប្រតិបត្តិ និងជាប្រធានក្រុមប្រឹក្សាភិបាលនៃក្រុមហ៊ុន វីរៈ ប៊ុនថាំ អេចប្រេស, ឧកញ៉ា ហាក់ លាងហ៊ ប្រធានសមាគមភស្តុភារកម្ពុជា និងឧកញ៉ាបណ្ឌិត ស៊ិន ចន្ធី នាយកក្រុមហ៊ុន ឡាញហល អេចប្រេស៕
